RONDA PROBINSYA

Kalaboso ang isang security guard matapos makuhanan ng mahigit kalahating milyong pisong halaga ng shabu sa buy bust operation sa lalawigan ng Quezon.

Kinilala ang suspek na si Erwin Villeta Banta, 38 anyos.

Nakuha sa suspek ang anim na plastic sachet ng hinihinalang shabu na may timbang na 27.61 gramo, isang sling bag, isang kulay pulang honda beat motorcycle at buy-bust money.

Nakatakdang sampahan ng kasong paglabag sa Republic Act 9165 o Comprehensive Dangerous Drugs Act of 2002 ang suspek. —sa panulat ni Kim Gomez

Patay ang isang lalaki matapos magpaputok ng baril sa isang COMELEC checkpoint sa lalawigan ng Nueva Ecija.

Kinilala ang suspek na si Aldrin Manalang, 33 anyos.

Ayon sa mga otoridad, pinahinto umano ng mga pulis si manalang nang biglang bumunot ng baril at pinaputukan ang mga pulis.

Habang ang ilang nakaposteng pulis sa lugar ay gumanti ng putok sa suspek na agad nitong ikinamatay.

Narekober ng mga operatiba sa suspek ang tatlong plastic sachet ng shabu at isang homemade cal. 38 revolver. —sa panulat ni Kim Gomez

Isasama na rin sa pilot run ng pediatric vaccination ang ilang piling vaccination sites sa Region 3 at 4-A.

Ayon kay Health Usec. Myrna Cabotaje, agad ipapamahagi ang dumating na bakuna ng Pfizer para sa nasabing age group.

Sa Pebrero7 hanggang 9magaganap ang itinakdang petsa para sa paglulunsad ng pediatric vaccinations.

Patuloy naman ang pakikipag-ugnayan ng DOH sa isang lugar sa Cotabato at isang regional ospital sa Davao City para sa pagpapalawig ng programa.

Pagsapit ng February 14, inaasahang maikakasa na sa buong bansa ang pediatric vaccination. —sa panulat ni Abby Malanday

Nananatiling ”very high” risk sa COVID-19 ang Iloilo City.

Ayon kay OCTA Research Fellow Dr. Guido David, nakitaan ng 60.45 percent na average daily attack rate (ADAR) ang Iloilo City, 1.08 na reproduction number, 71% na healthcare utilization rate, at 32% positivity rate.

Nasa high risk category naman ang Bacolod, Cebu City, Lapu Lapu, Mandaue, Ormoc at Tacloban hanggang kahapon, February 3, 2022.

Nakapagtala ang Bacolod ng pinakamataas na reproduction number na 1.11, habang ang Ormoc naman ang may pinamataas na positivity rate na 67%.

Mababatid na nakapailalim sa alert level 2 ang nasabing mga siyudad hanggang sa Pebrero a-15.

Arestado ang isang lalaki matapos magpanggap na militar sa Imus City, Cavite.

Ayon kay P/SSgt. Mark Anthony Salvador ng Imus City Police, naglalakad sa lugar ang suspek na kinilalang si Villardo Peradilla Jr., 40-anyos, na may sukbit na baril sa kanyang baywang.

Sinabi ni Salvador na nakatanggap sila ng reklamo laban sa kahina-hinalang kilos ng suspek.

Agad silang rumes­ponde kung saan naabutan si Peradilla sa lugar at narekober ang isang replica na kalibre ng baril.

Paglabag sa Comprehensive Firearms and Ammunition Regulation Act, Omnibus Election Code at Usurpation of Authority ang mga isinampang kaso laban kay Peradilla.  —sa panulat ni Angelica Doctolero

Inaresto ng pinagsanib pwersa ng Quezon City Police District (QCPD) at Philippine Drug Enforcement Agency (PDEA) ang siyam na suspek matapos makuhanan ng 1.4 na milyong pisong halaga ng shabu sa ikinasang buy-bust operation sa Brgy. Sta. Teresita, Quezon City.

Kinilala ni La Loma Police Station 6 Commander PLtCol Tyrone DG Valenzona, ang unang mga nadakip, na sina Kingsley Sakilan, 31-anyos at Rayson Gamatero, 33-anyos na nakuhanan ng 100 gramo ng shabu na nagkakahalaga ng mahigit 1.3 milyong piso, cellular phone, asul na Yamaha Nmax at buy-bust money.

Naaresto din sina Nholy Jacinto, 48-anyos; John Marphy Dela Cruz, 27-anyos; Angelo Magdaraog, 20-anyos; Alvin De Vera, 32-anyos,  Lionel Dela Cruz, 28-anyos; Rolando Quitua, 50-anyos at Sandy Dela Cruz, 37-anyos.

Narekober naman mula sa pito ang 15 gramo ng shabu na may halagang P102,000 kasama ng iba’t-ibang drug paraphernalias, at buy-bust money.

Nakakulong na ngayon ang mga suspek at nahaharap sa kasong paglabag sa RA 9165 o ang Comprehensive Dangerous Drugs Act of 2002. —sa panulat ni Angelica Doctolero

Aabot sa 3.4 na milyong pisong halaga ng shabu ang nasabat ng PNP at PDEA sa Mabalacat, Pampanga.

Kinilala ang suspek na si Dennis Balaba, 45 anyos.

Ayon kay PNP Chief, Gen. Dionardo Carlos, nakumpiska kay balaba ang limang transparent plastic sachet ng shabu na tumitimbang ng kalahating kilo.

Nahaharap naman ang mga suspek sa kasong paglabag sa Comprehensive Dangerous Drugs Act 2002. —sa panulat ni Mara Valle

Kaloboso ang tatlong lalaki sa Quiapo, Maynila matapos mahuling nagbebenta ng mga pekeng vaccine card.

Kinilala ang mga suspek na sina Ricardo Lugtu, 20 anyos; Rafael Cayabyab, 41 anyos at Samil Asmadi, 23 anyos.

Ayon sa Manila Police District, naaresto ang tatlo sa isang buy-bust operation sa lakay printing services sa Quezon Boulevard.

Napag-alamang nagbenta ng pekeng bakuna card ang mga suspek sa halagang limang daang piso kada isa.

Nahaharap naman ang mga ito sa kasong paglabag sa “mandatory reporting of notifiable diseases and health events of public health concern act” at falsification of public documents. —sa panulat ni Mara Valle

Tinatayang 7.4 million pesos na halaga ng shabu ang nasabat ng mga otoridad sa tatlong suspek sa San Mateo, Rizal.

Ayon kay Rizal Provincial Police Director, Col. Dominic Baccay, kabilang sa mga natimbog ang isang lalaking matagal ng nasa target list ng San Mateo Drug Enforcement Unit.

Inilunsad ang buy-bust operation sa isang pribadong sementeryo sa Barangay Gitnang Bayan 2.

Narekober sa mga hindi pa pina-pangalanang suspek ang mahigit isang kilo ng shabu na itinago sa mga tea bag.

Isang taga-pasig ang pinagkukunan ng mga iligal na droga habang ang kanilang amo ay nakokontak sa pamamagitan ng telepono sa loob ng New Bilibid Prison sa Muntinlupa.

Isang sunog at naaagnas na bangkay ang natagpuan sa liblib na lugar sa San Miguel, Bulacan.

Ayon sa San Miguel Municipal Police, isang tawag ang kanilang natanggap mula sa isang concerned citizen hinggil sa natagpuang bangkay sa Sitio Cogonan, Barangay Sibul.

Mag-aalas dose ng tanghali nang madiskubre ang hindi pa nakikilalang bangkay na nakasuot ng hikaw at blonde ang buhok, naaagnas at unti-unting kinakain ng aso ang ilang bahagi ng katawan.

Agad rumesponde ang mga otoridad pero ipinakuha na ng mga barangay officialsa punerarya ang sunog nabangkay.

Posibleng itinapon ang biktima dahil walang naitalang missing person sa naturang lugar.