RONDA PROBINSYA

Isang bangkay ng 10 taong gulang na babae ang natagpuang nakasilid sa sako at hinihinalang ginahasa dahil walang damit sa Itogon, Benguet.

Ayon kay Maj. Matthew Burgos, hepe ng Itogon Municipal Police, huling nakitang buhay ang bata na naliligo sa pampublikong paliguan noong Lunes ng umaga.

Kinabukasan ay bangkay na nang matagpuan ang biktima sa isang bangin sa barangay Ampucao malapit sa Philex Mining Corporation.

Nakita naman sa CCTV Ang isang lalaki na may pasan-pasang sako na pinaniniwalaang bangkay ng bata.

Agad namang nadakip ng mga otoridad ang suspek at nakita umano sa cellphone nito na kinunan ng video ang biktima habang naliligo. —sa panulat ni Mara Valle

Arestado ang tatlong indibidwal matapos ang inilargang operasyon ngmga otoridad sa isang drug den sa Lucena City, Quezon.

Nadakip sa buy-bust operation ang 41 anyos na babaeng nagpapatakbo at may-ari ng drug den maging ang isa pang babaeng vendor at isang lalaking pintor na kabilang sa mga gumagawa ng iligal na aktibidad sa naturang bahay.

Narekober sa mga suspek ang mahigit 100,000 pisong halaga ng shabu at mga drug paraphernalia.

Nahaharap sa kasong paglabag sa Comprehensive Dangerous Drugs Act of 2002 ang tatlo. —sa panulat ni Mara Valle

Patay ang isang miyembro ng Sangguniang Kabataan matapos tambangan sa Calbayog City, Samar.

Kinilala ang biktimang si Gerald Casaljay, 25 anyos, residente ng Purok 6, Barangay Osmeña habang nakatakbo ang kasama nitong Sibrandel Yrigonna pinaniniwalaang tinamaan din.

Ayon sa Calbayog City Police Station, dakong ala 7 ng umaga kahapon nang barilin sa dibdib at mukha ang biktima ng isang lalaking naka-gray jacket sa Purok 1.

Lulan ang mga biktima ng motorsiklo matapos dumalo sa piyesta nang sumulpot ang hindi nakilalang lalaki.

Narekober sa crime scene ang dalawang basyo ng kalibre 45 baril.

Inaalam na ang motibo sa krimen at sino o anong grupo ang nasa likod nito.

Binigyan na ng limang araw ni Santa Rosa, Nueva Ecija Mayor Josefino Angeles ang kanyang vice-mayor matapos mahuli ng pulisya sa isang buy-bust operation ang isang hinihinalang drug pusher na gumamit ng government vehicle ng munisipyo.

Nakapangalan kay Vice Mayor Marie Evangelista ang puting Nissan Navarra pickup na may conduction sticker ow 7007 na ginamit ng naarestong suspek na si Rey Gee Viñas, bente nwebe anyos at residente ng Barangay Soledad, noong Pebrero a–3.

Nasakote si Viñas ng pinagsanib na Philippine Drug Enforcement Agency, 303^rd Mobile Company ng PNP at Santa Rosa Police Office sa pangunguna ng hepe nilang si Major Fortune Bernardo.

Nakipag-transaksyon ang suspek sa isang ‘poseur-buyer’ at nahulihan ng dalawang plastic sachet ng shabu, buy-bust money, cellphone at puting Nissan Navarra pickup.

Kamakailan lamang binili ng munisipyo ang naturang sasakyan at ibinigay kay Evangelista bilang ‘official vehicle’ nito.

Bagaman hindi empleyado ni Evangelista, napag-alamang driver si Viñas ng pamilya ng bise alkalde sa kanilang trucking business.

Bukod sa suspek, madalas din umanong makita ng mga residente ang Navarra na ginagamit ng ama ni Evangelista na si dating Barangay Sta. Teresita Chairman Rodolfo Evangelista.

Arestado ng mga otoridad ang tatlo sa apat na shoplifter sa isang grocery sa Tanay, Rizal.

Kinilala ang mga nadakip na sina Alberto Salas y Marta, 53 years old; Joan Marcaida y Santos, 46 years old at Adelisa Paz y Boizon, 61 years old habang nakatakas naman ang isa pa nilang kasamahan na kinilalang si Amor, 51 years old.

Nabatid na pumasok ang mga suspek at nagpanggap na customer sa Michanmar Minimart sa JP Rizal Ave., Sampaloc, Tanay at agad na nanguha ng mga assorted grocery saka isa-isang lumabas nang hindi binayaran sa counter ang good items.

Agad na humingi ng tulong sa mga security guard sina Anna Marie Mago at witness na si Joan Lasay at narekober sa tatlo ang mga ninakaw na grocery items na nagkakahalaga ng mahigit P1K.

Ayon sa mga otoridad, modus na ng mga suspek ang dumayo sa mga probinsiya mula sa Caloocan at Malabon para makapambiktima.

Nakakulong na ang mga suspek at sinampahan na ng kasong Theft sa Korte. —sa panulat ni Angelica Doctolero

Inihayag ng Department of Health Bicol na hindi na irerequire sa pagdodonate ng dugo ang RT-PCR o Antigen Test Results.

Ayon kay Recruitment Officer Nicole Anne Bejo ng Regional Voluntary Blood Services, idadaan sa mahigpit na screening ang mga magdodonate ng dugo bakunado man o hindi upang matukoy kung ang donor ay maaaring mag-donate o hindi.

Tiniyak ni Bejo na sa kabila ng pagsasagawa ng mobile Blood Donation ay nasusunod parin ang health protocols kabilang na ang magsusuot ng face mask at social distancing.  —sa panulat ni Angelica Doctolero

3 ang patay kabilang ang isang bagong silang na sanggol dahil sa komplikasyong dulot ng Covid-19 sa Tarlac.

Kinumpirma ng Tarlac provincial government na isang araw pa lamang simula nang iluwal ang babaeng sanggol nang bawian ito ng buhay sa bayan ng Concepcion.

Residente naman ng Capas ang singkwenta’y dos anyos na lalaking namatay habang ang isa pang covid fatality ay sisenta’y otso anyos na lalaki mula Gerona.

Nitong linggo ay umabot sa animnapu ang panibagong covid-19 cases sa lalawigan, dalawandaan apatnapu’t siyam na recoveries habang limandaan at apat ang aktibong kaso.

Patay ang pulis matapos makaengkwentro ang mga rebelde sa Lapinig, Northern Samar.

Ayon kay Lieutenant Kenneth Tadawan, nagpapatrolya siya at ibang pulis bandang 6:40 a.m. sa naturang lugar nang makasagupa ang mga miyembro ng New People’s Army (NPA).

Samantala, nadiskubre malapit sa pinangyarihan ng insidente ang isang bahay na hinihinalang kuta ng mga rebelde at narekober dito ang mga explosive devices.—sa panulat ni Mara Valle

Nasa 460 kumpiskadong deformed steel bars ang winasak ng Department of Trade and Industry sa Nueva Ecija.

Ayon kay Bobby Faronilo, DTI chief trade industry specialist sa Nueva Ecija, ang 10-millimeter steel bars ay nakumpiska sa isang hardware sa bayan ng Santa Rosa noong November 2020.

Hindi anya tumalima ang manufacturer sa standards ng mga naturang produkto na itinakda ng Bureau of Philippine Standards.

Ibinabala ni Faronilo na hindi ligtas gamitin ang mga nasabing bakal at maaaring magdulot ng peligro sa buhay maging sa mga ari-arian at istruktura.

Inabot ng 3 buwan bago tuluyang wasakin ang mga steel bars matapos ang mahabang negosasyon at auditing process.

3 lalaki ang patay sa pamamaril sa bayan ng Sta. Margarita, Samar.

Kinilala ng Police Regional Office – 8 ang mga nasawing sina Ernesto Doinog, Jun-jun at Oeddie Deborbon habang sugatan sina Ronnie Medoranda at Gerry Deborbon.

Batay sa imbestigasyon, lulan ng motorsiklo ang mga biktima sa barangay Roxas nang tambangan sila ng mga armadong lalaki.

Ayon sa PRO – 8, ang mga suspek ay pawang miyembro ng Managaysay private armed group na binabantayan ng mga otoridad sa Samar.

Ito’y makaraang makilala umano ng isa sa mga biktima ang mga armadong lalaki.

Naganap ang insidente sa kabila ng umiiral na election gun ban kasabay ng opisyal na pag-arangkada ng campaign season bilang bahagi ng 2022 elections.