RONDA PROBINSYA

Sugatan ang isang lalaki makaraang pagsasaksakin ng ice pick ng dating live-in-partner ng kanyang kasintahan sa bayan ng Quezon, Nueva Ecija.

Kinilala ang biktima na si Angelo Corpuz, 20 anyos at ang suspek na si Jojo De Guzman, 25 anyos.

Ayon sa Nueva Ecija Provincial Police, nagkasundo ang suspek at live-in partner nitong si Joan Estadilla na maghiwalay dahil sa bago nitong nobyo na si Corpuz.

Napag-alaman na nagpasundo si Estadilla kay Corpuz at habang naglalakad ay sinundan sila ng suspek at pinagsasaksak sa iba’t ibang bahagi ng katawan ang biktima.

Kasalukuyang nagpapagamot na si Corpuz sa Dr. Paulino J. Garcia Memorial Medical Center sa Cabanatuan City habang pinaghahanap na ng mga otoridad ang suspek. —sa panulat ni Mara Valle

Arestado ng mga otoridad ang top 4 most wanted person sa Batan, Aklan.

Naaresto sa bisa ng warrant of arrest ang suspek na kinilalang si Rasel Inisa Agustino, 29-anyos na residente Brgy. Magubahay, Batan.

Nasa kustodiya na ng Batan PNP ang suspek na si Agustino na nahaharap sa kasong homicide at pinagkalooban ng piyansang 120,000 pesos ng korte suprema para sa kaniyang pansamantalang kalayaan. —sa panulat ni Angelica Doctolero

Arestado ng mga otoridad ang isang menor de edad matapos mahulihan ng marijuana sa Bgy. Tagumpay sa Puerto Princesa.

Ayon sa mga otoridad, naaresto ang suspek na kinilalang si Mario Gualdario alyas Pat, 21-anyos matapos ikasa ang drug buybust operation ng Anti Crime Task Force at City Drug Enforcement Unit.

Nakuha sa suspek ang isang sachet ng hinihinalang dahon ng marijuana, 500 pesos buybust money at isang motorsiklo.

Nakakulong na ngayon sa lock-up jail ng Puerto Princesa City Police Office ang inarestong suspek. —sa panulat ni Angelica Doctolero

Nagbalik-loob na sa pamahalaan ang apat na babaeng miyembro ng CPP-NPA sa Ilocos Norte.

Kinilala ang mga sumukong amazona na sina alyas Ka Ligaya, Ka Teresa, Ka Elvie at Ka Marinel, residente ng mga bayan ng Marcos, Vintar at Carasi sa Ilocos Norte.

Ayon kay Maj. Gen. Andrew Costelo, Commander ng 7th Infantry ‘Kaugnay’ Division ng Philippine Army, kasamang isinuko ng mgarebelde ang kanilang m14 rifle, US Remington model 03-a3 rifles at isang sumpak.

Inamin ng apat na na-recruit silanoong kasikatan ng rebeldeng paring katoliko na si Conrado Balweg pero nagpalamig sila nang mapagtanto na sinsero ang gobyerno na tapusin ang armadong pakikibaka sa pamamagitan ng ‘whole-of-nation’ approach. —sa panulat ni Mara Valle

Arestado ang isang binatilyo matapos nakawan ang isang construction company sa Meycauayan City, Bulacan.

Ayon sa Bulacan Provincial Police, pinasok ng 17 anyos na suspek ang opisina ng Sinian International Corporation sa pamamagitan nang pagdaan sa kisame matapos sirain ang isang bahagi ng bakod.

Nakunan naman ng CCTV camera ng kompanya ang ginawang binatilyo sa vault at pag-tangay nito sa limang milyong pisong cash.

Nailabas pa ng kawatan ang pera subalit agad namang nahuli matapos ang manhunt operationat kasalukuyang nahaharap sa kasong robbery. —sa panulat ni Mara Valle

Nakapagtala ang lalawigan ng Bulacan ng 18K mga batang edad 5 hanggang 11 ang nakatanggap na ng unang dose ng Reformulated Pfizer vaccine makaraang ikasa ang pediatric vaccination nito lamang February 7.

Pinangunahan ni Vaccine Czar Carlito Galvez Jr. ang Ceremonial launching ng “Resbakuna kids” sa Hiyas ng Bulacan Convention Center sa Malolos, Bulacan.

Ayon kay Galvez, layunin ng nasabing programa na maprotektahan ang mga bata upang hindi magkasakit at mailayo sa COVID-19.  —sa panulat ni Angelica Doctolero

Arestado sa kasong pangmomolestiya ang isang Norwegian National sa Laoag City.

Kinilala ng mga tauhan ng Bureau of Immigration (BI) ang suspek na si Alexander Calapini-Solberg, 53-anyos na naaresto sa barangay 48-A Cabunggaan, Laoag City, Ilocos Norte.

Ayon kay BI Commissioner Jaime Morente, ang naturang dayuhan ay isang high-profile fugitive na wanted sa kanilang bansa dahil sa ilang sex offense cases na isinampa sa kanya sa Korte.

Napag-alaman na nag isyu din ang kanilang bansa ng isang Interpol Red Notice noong December 2021 batay narin sa isinilbing warrant ng District Court sa Norway.

Sa ngayon, planong ilagay sa blocklist si Solberg at nakatakdang ipa-deport sa bansa. —sa panulat ni Angelica Doctolero

Umakyat na sa 5 ang kumpirmadong kaso na tinamaan ng Omicron variant ng Covid-19 sa lalawigan ng Batanes.

Isinailalim ang 5 specimen ng balikbayan ng nasabing probinsiya sa genome sequencing sa UP Phil Genome Center.

Samantala, patuloy ang pagtaas ng bilang ng kumpirmadong kaso sa lalawigan.

Mula sa 172 nuong araw umakyat ito sa 182.

Nagmula ang 14 na bagong kaso sa capital town na Basco, 8 sa bayan ng Sabtang habang tig 2 sa bayan ng Ivana, Itbayat at Mahatao.

Nagpositibo sa paralytic shellfish poison o red tide ang ilang coastal areas sa Visayas at Mindanao.

Ayon sa Bureau of Fisheries and Aquatic Resources (BFAR), lumagpas ang mga lugar na ito sa regulatory limit, kung saan lahat ng uri ng delikadong shellfish at alamang ay natagpuan.

Ang mga lugar ay kinabibilangan ng;

• Coastal waters sa Mariveles, Limay, Orion, Pilar, Balanga, Hermosa, Orani, Abucay at Samal sa Bataan;
• Coastal waters sa Milagros sa Masbate;
• Coastal waters sa Dauis (da-wis) at Tagbilaran City sa Bohol;
• Dumanquillas (du-man-kil-yas) bay sa Zamboanga del Sur;
• Litalit Bay, San Benito sa Surigao del Norte; at
• Lianga Bay sa Surigao del Sur

Ligtas naman sa red tide ang coastal waters sa Biliran Islands; Leyte, Carigara Bay, Cancabato Bay, Tacloban City sa Leyte; San Pedro Bay sa Samar; Guiuan (gi-wan), at Matarinao Bay sa Eastern Samar. —sa panulat ni Abby Malanday

Makakatanggap ng ‘sweet deals’ ang mga single employees ng local government unit sa Jose Abad Santos sa Davao Occidental at General Luna sa Quezon.

Ito ay ang paid leave na may kasamang P2,000 na allowances na matatanggap sa araw ng mga puso o sa February 14.

Hindi naman kasama sa deal ang mga may jowa na at ang may mga asawa.

Para makuha ang deal, kailangan na may litratong patunay na ipapakita pagpasok ng February 15 at kung wala ay ibabalik ang allowance. —sa panulat ni Abby Malanday