RONDA PROBINSYA

Naabo ang mahigit 100 bahay matapos sumiklab ang sunog sa ilang barangay sa Cavite City.

Ayon sa mga tauhan ng Bureau of Fire Protection (BFP) Cavite Provincial Office, mabilis kumalat ang apoy dahil karamihan sa mga bahay na tinamaan ng sunog ay gawa umano sa light materials.

Ayon sa imbestigasyon ng mga otoridad, 30 minutong nawalan ng kuryente ang lugar at nang bumalik ang kuryente, napansin ng mga residente ang biglang pagsiklab ng apoy sa mga kabahayan.

Wala namang naitalang nasawi o nasugatan sa naganap na sunog.

Sa ngayon, pansamantalang mananatili sa Ladislao Diwa Elementary School sa barangay 20 ang mga nasunugan. —sa panulat ni Kim Gomez

Kalaboso ang tatlong lalaki matapos mahulihan ng shabu sa magkahiwalay na buy bust operation na isinagawa sa Negros Occidental.

Kinilala ng Western Visayas Regional Police, ang mga suspek na sina Jesther Soquena at Biboy Dacumos, sa Barangay 21, Victorias City habang nahuli si Mark Daniel Angas sa Purok Kabulakan 1, Barangay Singcang, Bacolod City.

Nasmsam ng mga otoridad ang nasa 705 grams o P3.4M halaga ng shabu na nagkakahalaga sa halos P4.8M halaga.

Ang tatlong naarestong suspek ay itinuturing na “high-value target” sa kampanya laban sa droga at nakatakdang kasuhan ng paglabag sa comprehensive dangerous drugs law.  —sa panulat ni Kim Gomez

Patay ang isang miyembro ng New People’s Army (NPA) matapos maka-engkwentro ang mga militar sa Alegria, Surigao Del Norte.

Kinilala ng mga militar, si Ricky Vocales Rosaldo alyas “kenz”. Miyembro ng isang platoon sa ilalim ng North-Eastern Mindanao Regional Committee’s Guerrilla Front 16.

Narekober ng tropa ng mga militar ang isang improvised explosive na may detonating device, blasting cap, magazine para sa m16 rifles, at bandolier. —sa panulat ni Kim Gomez

Malubha ang kalagayan ng isang lalaki sa ospital matapos pukpukin sa ulo ng kaniyang kasamahan sa trabaho sa Tondo, Manila.

Kinilala ang biktima na si Jason Sapuan,31 anyos, at ang suspek na si Arvin Maiz, 36 anyos, kapwa helper sa nasabing lugar.

Ayon sa Manila Police District (MPD), madalas binu-bully ng biktima si Maiz na nagtanim ng galit. Tiniyempuhan niya na abala sa paglalaro ng cellphone si Sapuan saka pukpukin ng tatlong beses para mailabas ang kaniyang galit.

Nakakulong at sasampahan ng mga otoridad ng kaukulang kaso laban sa suspek. —sa panulat ni Kim Gomez

Patay ang isang driver ng trak matapos siyang masagasaan ng isa pang trak sa kahabaan ng Bokawkan Road sa Baguio City.

Kinilala ang nasawi na si Henry Payang, 38 anyos.

Ayon sa mga otoridad, nag-malfunction ang preno ng trak na minamaneho ni Elmer Langgoy 48 anyos sa pababang bahagi ng kalsada at nawalan ng kontrol kung saan, nabangga ang biktima na agad nitong ikinasawi.

Nakakulong na si Langgoy at sasampahan ng kasong homicide at reckless imprudence resulting in damage to property. —sa panulat ni Kim Gomez

Inanunsyo ng Subic Bay Metropolitan Authority (SBMA) na walang naitalang bagong kaso ng COVID-19 matapos makaranas ng pagtaas ng kaso ng virus sa loob ng halos isang buwan.

Ayon kay SBMA Chair at Administrator Wilma Eisma, na ang pagpapabuti ng sitwasyon ng COVID-19 ay dahil sa paggaling ng maraming pasyenteng nahawaan ng virus at sa patuloy na vaccination drives ng ahensya.

Samantala, sinabi ni eisma na mayroon pa ring dalawang aktibong kaso ng COVID-19 na parehong empleyado ng SBMA na kasalukuyang sumasailalim sa quarantine at treatment.

Tiniyak naman ni Eisma, na ipinagpapatuloy ng ahensya ang pagsunod sa mga health protocols dahil ito ang pinakatiyak na paraan para maiwasan ang virus. —sa panulat ni Kim Gomez

Isa pang miyembro ng Philippine National Police (PNP) ang namatay dahil sa COVID-19.

Ayon kay PNP Deputy Chief for Administration Lieutenant General Joselito Vera Cruz, ito ay ang 46-anyos na Staff Sargeant at Intelligence Operative ng Cotabato City Police na namatay habang ginagamot sa ospital.

Nabakunahan ito ng Johnson & Johnson pero may sakit na diabetes.

Dahil sa panibagong tala, umabot na sa 128 ang bilang ng nasawi sa hanay ng PNP dahil sa COVID-19. —sa panulat ni Abigail Malanday

Aabot sa 9.6 million pesos na halaga o katumbas ng 80 kilo ng marijuana ang nakumpiska sa dalawang suspek makaraang ikasa ng mga otoridad ang buy-bust operation sa San Miguel, Bulacan.

Kinilala ang dalawang suspek na sina Dexter Asban at Jomerson Macusi na naaresto ng mga tauhan ng Bulacan Provincial Intelligence Unit (PIU) sa isang inuupahang apartment sa Brgy. Paliwasan, San Miguel, Bulacan.

Nahaharap ngayon sa kasong paglabag sa RA 9165 o comprehensive dangerous drugs act of 2002 ang dalawang suspek. —sa panulat ni Angelica Doctolero

Sugatan ang limang indibidwal sa banggaan ng dalawang sasakyan sa Malolos, Bulacan.

Sa imbestigasyon ng mga otoridad, isang SUV ang nag-counterflow sa kalsada at sumalpok sa isang pampasaherong jeep.

Agad na rumesponde ang mga otoridad kabilang na ang mga tauhan ng Bureau of Fire Protection (BFP) makaraang magliyab at mawasak ang harapang bahagi ng naturang sasakyan.

Mabilis namang isinugod sa ospital ang mga biktima kung saan, dalawa ang kritikal. —sa panulat ni Angelica Doctolero

Sampu ang nasawi habang sugatan naman ang walo pang indibidwal makaraang mahulog at tumagilid ang isang truck sa Sitio Quary, Barangay Mamawan Baliguian, Zamboanga Del Norte.

Base sa imbestigasyon ng mga otoridad, patungo sa munisipyo ng labason ang nasabing truck sakay ang mga pasahero pero nang makarating sa pababang kalsada ng Sitio Quary ay nawalan ng kontrol ang driver sa manibela dahil sa brake malfunction o problema sa preno.

Ayon sa mga otoridad, overloaded ang nasabing truck dahil sa dami ng pasaherong nakasakay dahilan para mahulog ito sa mahigit 20 kilometro na lalim.

Agad na isinugod sa ospital ang mga biktima na ngayon ay patuloy na nagpapagaling.