RONDA PROBINSYA

Arestado ang 31 pigeon breeders matapos lumabag sa health protocols sa Quezon City.

Nangunguna sa grupo si Richard Gravidez na inaresto ng Quezon City Police District Station 7 sa N. Domingo Street sa Barangay Kaunlaran.

Ayon kay Station Commander Lieutenant Colonel Elizabeth Jasmin, nakita ng Anti-Crime Operation ang grupo na hindi sumusunod sa social distancing at wala pang suot ng face mask ang iba.

Agad dinampot ang mga ito dahil sa paglabag sa Republic Act 11332 o ang Mandatory Reporting of Notifiable Diseases and Health Events of Public Health Concern Act. —sa panulat ni Abby Malanday

Nagbabala ang provincial veterinarian ng Negros Occidental sa mga online sellers at biyahero na nagtatangkang magpuslit ng karneng baboy papasok sa lalawigan.

Ayon kay Provincial Veterinarian Renante Decena, agad kukumpiskahin at sisirain ang mga makukuhang karneng baboy sa mga ito.

Nitong Huwebes, aabot sa 27.1 kilograms ng assorted pork products na nagkakahalaga ng 12,350 pesos ang sinunog matapos dumating sa Bacolod Silay Airport.

Nananatiling ASF-Province ang Negros Occidental upang protektahan ang anim na bilyong pisong swine industry sa lalawigan. —sa panulat ni Abby Malanday

Patay ang isang sundalo habang sugatan naman ang isang indibidwal matapos ang engkwetro sa pagitan ng militar at ng New People’s Army (NPA) sa Northern Samar.

Kinilala ang nasawi na si Private First Class John Jeffrey Dabalos, miyembro ng 19th Infantry Batallion ng Philippine Army na nakabase sa Northern Samar.

Hindi naman makilala ang nasugatang indibidwal na nadamay lang sa barilan.

Kwento ni Deputy Brigade Commander Colonel Efren Morados, kasama ni Dabalos ang mga kasamahan nito patungo sanang barangay maligaya sa Matuguinao, Samar nang maka-engkwentro ang 15 rebeldeng komunista.

Dead on the spot si Dabalos kaya dinala na ang labi nito sa St. Peter’s Funeral Homes sa Catarman. —sa panulat ni Abby Malanday

Siniguro ng Department of Trade and Industry (DTI) Isabela na patuloy ang pagbabantay ng kanilang mga kawani sa mga grocery at supermarket.

Ayon kay Consumer Protection Division Chief Elmer Agorto, ang pagmomonitor ng kagawaran sa mga nasabing establisyimento ay para matiyak na hindi mananamantala ang mga negosyante.

Aniya, ito rin ay upang masiguro na magkapareho ang presyo sa mga produkto at mga naka-rehistro sa computer cashier na dapat ding bantayan ng mga mamimili.

Una nang nagtaas-presyo ang mga raw material at packaging ng ilang produkto. —sa panulat ni Airiam Sancho

Arestado ang dalawang lalaki sa loob ng kanilang kulungan matapos mahulihan ng shabu sa Oplan Galugad sa Camarines Norte.

Kinilala ang mga suspek na sina Jacky De Mesa Pa­Lomar, 41 anyos at Julius Carlo Rieza, 31-anyos pawang nakakulong sa Camarines Norte Provincial Jail.

Narekober sa mga suspek ang limang sachet ng shabu na hindi binanggit ang katumbas na halaga ng nasabing droga.

Nakatakdang nang sampahan ng mga otoridad ang mga suspek ng kaukulang kaso.  —sa panulat ni Kim Gomez

Kalaboso ang isang security guard matapos makuhanan ng mahigit kalahating milyong pisong halaga ng shabu sa buy bust operation sa lalawigan ng Quezon.

Kinilala ang suspek na si Erwin Villeta Banta, 38 anyos.

Nakuha sa suspek ang anim na plastic sachet ng hinihinalang shabu na may timbang na 27.61 gramo, isang sling bag, isang kulay pulang honda beat motorcycle at buy-bust money.

Nakatakdang sampahan ng kasong paglabag sa Republic Act 9165 o Comprehensive Dangerous Drugs Act of 2002 ang suspek. —sa panulat ni Kim Gomez

Patay ang isang lalaki matapos magpaputok ng baril sa isang COMELEC checkpoint sa lalawigan ng Nueva Ecija.

Kinilala ang suspek na si Aldrin Manalang, 33 anyos.

Ayon sa mga otoridad, pinahinto umano ng mga pulis si manalang nang biglang bumunot ng baril at pinaputukan ang mga pulis.

Habang ang ilang nakaposteng pulis sa lugar ay gumanti ng putok sa suspek na agad nitong ikinamatay.

Narekober ng mga operatiba sa suspek ang tatlong plastic sachet ng shabu at isang homemade cal. 38 revolver. —sa panulat ni Kim Gomez

Isasama na rin sa pilot run ng pediatric vaccination ang ilang piling vaccination sites sa Region 3 at 4-A.

Ayon kay Health Usec. Myrna Cabotaje, agad ipapamahagi ang dumating na bakuna ng Pfizer para sa nasabing age group.

Sa Pebrero7 hanggang 9magaganap ang itinakdang petsa para sa paglulunsad ng pediatric vaccinations.

Patuloy naman ang pakikipag-ugnayan ng DOH sa isang lugar sa Cotabato at isang regional ospital sa Davao City para sa pagpapalawig ng programa.

Pagsapit ng February 14, inaasahang maikakasa na sa buong bansa ang pediatric vaccination. —sa panulat ni Abby Malanday

Nananatiling ”very high” risk sa COVID-19 ang Iloilo City.

Ayon kay OCTA Research Fellow Dr. Guido David, nakitaan ng 60.45 percent na average daily attack rate (ADAR) ang Iloilo City, 1.08 na reproduction number, 71% na healthcare utilization rate, at 32% positivity rate.

Nasa high risk category naman ang Bacolod, Cebu City, Lapu Lapu, Mandaue, Ormoc at Tacloban hanggang kahapon, February 3, 2022.

Nakapagtala ang Bacolod ng pinakamataas na reproduction number na 1.11, habang ang Ormoc naman ang may pinamataas na positivity rate na 67%.

Mababatid na nakapailalim sa alert level 2 ang nasabing mga siyudad hanggang sa Pebrero a-15.

Arestado ang isang lalaki matapos magpanggap na militar sa Imus City, Cavite.

Ayon kay P/SSgt. Mark Anthony Salvador ng Imus City Police, naglalakad sa lugar ang suspek na kinilalang si Villardo Peradilla Jr., 40-anyos, na may sukbit na baril sa kanyang baywang.

Sinabi ni Salvador na nakatanggap sila ng reklamo laban sa kahina-hinalang kilos ng suspek.

Agad silang rumes­ponde kung saan naabutan si Peradilla sa lugar at narekober ang isang replica na kalibre ng baril.

Paglabag sa Comprehensive Firearms and Ammunition Regulation Act, Omnibus Election Code at Usurpation of Authority ang mga isinampang kaso laban kay Peradilla.  —sa panulat ni Angelica Doctolero