Pinaghahanap na ng mga otoridad ang dalawang lalaking salarin sa panghoholdap sa isang babae sa Baguio City kahapon.
Sa impormasyong nakuha ng mga otoridad, hinarang ng mga suspek ang biktima na sinuntok at tinutukan pa ng patalim saka kinuha ang bag nito.
Mabilis namang tumakas ang dalawang salarin at nagpunta sa hindi malamang direksiyon.
Patuloy pang inaalam ng mga opisyal ng barangay ang pagkakakilanlan sa dalawang salarin. —sa panulat ni Angelica Doctolero
Nanlulumong dumulog sa Pulisya ang lola ng isang binatilyo sa Pakil, Laguna.
Ito’y matapos umanong ideklarang patay ng Gen. Cailles Hospital sa naturang bayan.
Ayon sa lola ng biktima na si Elizabeth Rabutazo, puno ng pasa sa katawan ang kaniyang apo na si Reymart Madrazo nang umuwi ito sa kanilang bahay.
Lumutang sa paunang imbestigasyon na sumailalim si Madrazo sa initiation rites o hazing ng isang fraternity sa bulubunduking bahagi ng Twin Falls sa Brgy. San Juan sa bayan ng Kalayaan.
Patuloy ang isinasagawang imbestigasyon hinggil sa kung sinu-sino ang nasa likod ng naturang hazing at kung may iba pang kasama ang biktima nang gawin ito.
Pinadapa ang ilang mga bahay sa Nueva Vizcaya kung saan aabot sa 119 na indibidwal ang apektado ng malakas na buhawi.
Sa pahayag ng Provincial Disaster Risk Reduction and Management Emergency Response Team, 2 barangay ang tinangay ng ipo-ipo kung saan, kaagad na lumikas ang 15 pamilya mula sa brgy. Sto. Domingo at 10 pamilya naman mula sa Brgy. Macate.
Ayon sa mga otoridad, wala namang naiulat na binawian ng buhay o nasaktan habanginaalam pa ang halaga ng nawasak na ari-arian.
Tiniyak naman ni Nueva Vizcaya Governor Carlos Padilla na hindi nila pababayaan ang mga naapektuhang pamilya.
Sa ngayon, nabigyan na ng food packs at iba pang pang-araw-araw na pangangailangan ang mga sinalanta ng buhawi. — sa panulat ni Angelica Doctolero
BAGSAK sa kulungan ang isang dating barangay captain at dalawang iba pa matapos umanong mang-holdap ng isang kilalang convenience store sa Poblacion, Sto. Domingo, Albay.
Kinilala ang mga suspek na sina Teodorico Balana Celso, dating tserman ng Brgy. Banao, Bacacay; Arnulfo Choque Bandola, dating negosyante, at James Cañesa Cobilla, kapwa ng residente ng Brgy. 14 Baclayon.
Pinasok umano ng mga suspek ang sangay ng 7-Eleven convenience store at nilimas ang P4,000 mula sa kahera.
Sa pamamagitan ng kuha sa CCTV, nakilala si Bandola at nahuli ito habang tumataya sa e-sabong betting station sa Diversion Road hanggang sa nginuso na nito ang iba pang mga suspek na ngayo’y nahaharap din sa patong-patong na reklamo.
Sugatan ang tatlong indibidwal matapos pagsasaksakin ng nakainom na suspek sa barangay pamukid sa San Fernando, Camarines Sur.
Kinilala ang mga biktima na sina; Anabel justiania, 47-anyos; Gina Paradela, 42-anyos at Jenrick Paradela, 18-anyos.
Batay sa ulat ng Camarines Sur Police Provincial Office, nasa ilalim ng impluwensiya ng alak ang suspek na si Ariel Paradela, 49-anyos nang kausapin nito si Justiniana at Gina.
Pero nauwi ito sa pagtatalo dahilan para saksakin ni paradela ang mga biktima.
Tinangka pang umawat ni jenrick, pero siya ay sinaksak din.
Agad namang itinakbo sa ospital ang mga biktima.
Nasa kustodiya na ng mga otoridad ang suspek para sa ihahaing kaso. – sa panukat ni Abby Malanday
Patay ang tatlong katao habang sugatan ang 15 iba pa matapos araruhin ng trak ang isang ban sa national highway ng Barangay South Poblacion, Jimalalud sa Negros Oriental.
Kinilala ang mga nasawi na sina; Erodetha Gacang, 67-anyos; Roel Gacang, 62-anyos; at Elizar Pontillano, 68-anyos.
Ayon sa mga otoridad, dumiretso ang trak sa kurbada dahilan para araruhin nito ang van.
May sakay na 26 na pasahero ang van kabilang ang driver.
Tatakas pa sana ang driver ng truck at tinangkang magtago sa kanal, pero nahuli ito sa tulong ng mga taong dumadaan.
Kasong Reckless Imprudence Resulting to Multiple Homicides, Physical Injury at Damage to Property ang kakaharapin nito na kasalukuyang nasa kustodiya ng Jimalalud Police Station. —sa panulat ni Abby Malanday
Aabot sa 2.4 milyong pisong halaga ng marijuana plants ang sinunog ng anti-narcotics operatives sa Sultan Kudarat.
Naganap ito sa Sitio Alyeng sa Barangay Datalblao na pagmamay-ari umano ng nakatakas na si Leng Labuayan.
Magkatuwang na sinunog ang mga tanim ng Philippine Drug Enforcement Agency (PDEA) at ng lokal na pulisya.
Patuloy namang nagsasagawa ng manhunt operation ang mga otoridad upang mahuli ang suspek. —sa panulat ni Abby Malanday
Patay ang isang city public officer habang sugatan ang kaniyang driver matapos barilin sa Cotabato kahapon.
Kinilala ang biktima na si dating Cotabato City Police Director at Retired Colonel Rolen Balquin na kasalukuyang hepe ng City Public Safety Office.
Habang ang driver naman nito ay si Police Chief Master Sergeant o pcms Arial Gutang.
Ayon kay Cotabato City Police Director Colonel Rommel Javier, paparada lamang sana ang sinasakyan ng mga biktima sa harap ng isang milktea house, nang pagbabarilin ng mga hindi nakilalang suspek.
Mabilis na tumakas ang mga salarin lulan ng hindi pa matukoy na sasakyan.
Dinala pa sa pagamutan ang mga biktima ngunit idineklarang dead on arrival si Balquin nang tamaan ng bala sa ulo at dibdib.
Mariin namang kinondena ni Cotabato City Mayor Cynthia Guiani Sayadi ang pagpatay kay balquin kasabay ng pagtiyak ng pagpapanagot sa mga suspek. —sa panulat ni Abby Malanday
Nagpahayag ng pagkabahala ang Center for Media Freedom and Responsibility ang nangyaring pagpaslang sa radio broadcaster na si Audrey Estrada sa Bacolod, Lanao del Norte.
Ayon kay CMFR Executive Director Melinda Quintos De Jesus, nakakabahala ang mga ganitong insidente lalo na’t nalalapit na ang eleksyon na gaganapin sa Mayo a-nuebe taong kasalukuyan.
Paalala ni de Jesus, kailangan maging maingat ang mga mamamahayag mula sa anumang uri ng karahasan bago ang eleksyon.
Matatandaang ilang araw lamang ang nakalipas matapos ang paghahain ng kandidatura noong nakaraang taon nang pagbababarilin ang isa pang radio commentator at reporter na si Orlando Dinoy sa Davao del Sur at pinaslang naman ang radio commentator na si Jaynard Angeles sa Sultan Kudarat noong January 12. – sa panulat ni Abie Aliño-Angeles
Tinatayang P9M ng pekeng sigarilyo ang nasamsam ng mga otoridad sa isang bodega sa Valenzuela City.
Batay sa Bureau of Customs, natuklasan sa nasabing bodega ng Manila International Container Port-Customs Intelligence and Investigation Service (MICP-CIIS) at Philippine Drug Enforcement Agency (PDEA) ang master cases na naglalaman ng limampung karton o sampung libong inangkat na pekeng sigarilyo gaya ng marlboro red, mighty, modern cigarettes, carnival, red golden dragon classics at iba pa.
Isasailalim naman sa seizure and forfeiture proceedings ang mga kontrabando dahil sa paglabag sa customs modernization and tariff act. – sa panulat ni Airiam Sancho