RONDA PROBINSYA

Sumuko sa mga awtoridad ang dalawa pang suspek sa pagkamatay ng labing walong taong gulang na estudyante sa hazing incident sa Laguna.

Kinilala ang dalawang sumukong suspek na sina Kirby Galero at Kevin Perez na umano’y master initiator sa naturang hazing.

Nauna nang naaresto at kinasuhan ng homicide at paglabag sa anti-hazing law sina Reyvine Espaldon At Venzon Benedict Lacaocao na umano’y mga opisyal ng tau gamma phi fraternity.

Ayon sa ama ng biktimang si Raymark Rabutazo, hindi bababa sa 23 miyembro ng fraternity ang sangkot sa hazing kabilang ang ilan nilang kaanak.

Samantala, batay sa report medico legal ay nagtamo ng subdural hemorrhage matapos na hampasin sa ulo habang isinasagawa ang initiation rites ang grade 12 student.  – sa panulat ni Mara Valle 

Magkasunod na lindol ang naramdaman sa Cagayan Province.

Unang naitala ang Magnitude 5.1 na lindol alas-8:02 kagabi sa layong 46 na kilometro, silangang bahagi ng Camiguin Island sa Calayan, Cagayan.

May lalim ang pagyanig ng 20 kilometro at tectonic ang origin o pinagmulan nito.

Sunod namang naitala ang Maginitude 5.4 na lindol alas-8:03 kagabi sa layong 20 kilometro, silangang bahagi ng Aparri, Cagayan.

May lalim ang pagyanig ng 9 na kilometro at tectonic ang origin o pinagmulan nito.

Dahil dito, naitala ang Instrumental Intensity III sa Gonzaga, Cagayan.

Intensity II sa Claveria, Cagayan; Pasuquin, Ilocos Norte at Intensity I naman sa Laoag City, Ilocos Norte. — sa panulat ni Angelica Doctolero

Patay ang 3-taong gulang na lalaki matapos ang naganap na sunog sa kanilang bahay sa Pampano Street, Barangay 14, Caloocan City kahapon.

Batay sa imbestigasyon ng Caloocan Bureau of Fire Protection, umabot lamang sa unang alarma ang sunog at naapula ito dakong alas-2 ng hapon.

Ayon kay Edmar Francisco, ama ng biktima, gumagawa siya ng kama bandang tanghali nang sabihan siya ng kaniyang pamangkin na may nasusunog sa kabilang kwarto kung saan naroon ang kaniyang anak.

Nang puntahan ito ni Francisco ay bumungad sa kaniya ang malaking apoy at nakaharang na foam ng  kama.

Sa pagpupumilit na iligtas ang kaniyang anak ay pinasok ni Francisco ang kwarto pero nabigo ito at nagtamo ng mga paso sa braso.

Samantala, inaalam pa ng BFP ang dahilan ng sunog at halaga ng ari-ariang natupok. —sa panulat ni Airiam Sancho

Natagpuang patay ang dalawang turista sa kanilang hotel room sa Boracay Island noong Lunes, Marso a-21.

Kinilala ang mga nasawi at kapwa sugatan na sina Dennis Yu, isang Pilipino base sa kaniyang Identification card, 44- anyos  at Australian National na si Maria Cecilia Jellicode.

Batay sa inisyal na imbestigasyon ni Police Chief, Lieutenant Colonel Don Dicksie De Dios ng Aklan Police Station, walang mga indikasyon na may ibang taong pumasok sa silid batay sa kuha ng security camera at ibang security records dahil naroon pa ang kanilang mga gamit, kabilang ang cash, alahas, laptop at cellphone.

Aniya, hinihintay pa nila ang resulta ng autopsy para matukoy ang dahilan ng pagkamatay ng mga ito.

Patuloy namang iniimbestigahan ng mga otoridad ang naturang insidente.  —sa panulat ni Airiam Sancho

Patay ang mag-ina matapos sumiklab ang sunog sa Brgy. Centro Norte, Cagayan.

Kinilala ang mga biktima na sina Marcelina Bernardo, 90 taong gulang at ina nang nasawi ding anak na si  Roger Bernardo 60 taong gulang makaraang lamunin ng apoy ang kanilang bahay.

Base sa imbestigasyon ng mga otoridad, mahilig magsindi ng kandila si Marcelina sa tuwing ito ay nagro-rosaryo ngunit nakalimutan umano nitong patayin ang kandila na naging sanhi ng pagkakasunog ng kanilang bahay at isa pang bahay na pag-aari naman isang Eleanor Ursua, isang retiradong guro.

Ayon sa mga otoridad, nagawa pa nilang mailigtas si Marcelina ngunit bumalik ito sa loob ng nasusunog na bahay para kumuha ng mahahalagang dokumento.

Nabatid na abala sa pagtulong sa mga bumbero sa pag-apula ng sunog ang anak na si Roger pero nang malaman na bumalik sa kanilang bahay ang kanyang ina dahilan para sundan niya ito.

Sinabi ng mga otoridad na hindi na nagawang makalabas ng dalawa dahil sa mabilis na pagkalat ng sunog. —sa panulat ni Angelica Doctolero

Narekober ng mga tauhan ng Philippine National Police (PNP) ang pakete ng hinihinilang cocaine na palutang-lutang sa karagatang sakop ng Cagayan.

Batay sa ulat ng PNP, rumesponde sila kasama ang mga tauhan ng Philippine Drug Enforcement Agency (PDEA) Region 2 sa ulat mula sa mga mangingisda sa lugar na may mga kahinahinalang bahay na lumulutang sa bahagi ng Abulug at Ballesteros.

Kanilang nadiskubre ang aabot sa 3 kilong hinihilang cocaine na tinatayang ₱15 million ang street value.

Positibong itong tinukoy na iligal na droga ng mga sinanay na K9 dogs.

Pero, isasailalim pa rin ito sa laboratory examination ng PDEA para makumpirma.

Sa ngayon, inaalam pa ng PNP at PDEA kung may iba pang mga hinihinalang cocaine ang nakakalat sa lugar.  – sa panulatt ni Mara Valle 

Arestado ang isang lalaki na tinaguriang No. 17 most wanted ng calabarzon region sa Antipolo City, Rizal.

Kinilala ang suspek na si Richard Jacinto.

Ayon kay Antipolo City Police Chief Lt. Col. June Paolo Abrazado, nagtago si Jacinto matapos umano makapatay noong 2012.

Sa ngayon mahaharap sa kasong murder si Jacinto.

Samantala, nagpaalala naman ang antipolo city police sa mga business owner, i-background check ng maigi bago tumanggap ng empleyado.  – sa panulat ni Mara Valle 

Arestado ang dalawang lalaking itinuturong lider at isa pang miyembro ng gun-for-hire syndicate sa Bulacan.

Kinilala ang mga suspek na sina alyas Noel, 56 anyos, lider umano ng rado crime gang at ang kasamang si alyas Jedson, 42 anyos, miyembro naman ng naturang gun-for-hire group.

Narekober ng mga otoridad sa mga suspek na pawang mga negosyante umano ang isang calibre .45 baril at 16 na bala.

Nabatid na ang rado crime gang ang itinuturong nasa likod ng malalaking insidente ng pagpatay, pagnanakaw, carnapping at pagtutulak ng ilegal na droga sa bulacan at ilang bahagi ng Metro Manila.

Sa ngayon ay nahaharap sa mga kasong paglabag ng comprehensive dangerous drugs act, r.a. 10591 in relation to omnibus election code, murder at carnapping ang mga suspek. - sa panulat ni Mara Valle 

Aabot sa mahigit P5.2-M ang halaga ng marijuana plants ang nasamsam ng mga otoridad sa ikinasang tatlong araw na operasyon sa Barangay Bolol Salo, Kiblawan, Davao del Sur.

Pinuri ni Philippine National Police (PNP) Chief, General Dionardo Carlos ang mga tauhan ng Davao del Sur Police Provincial Office, PDEG 11, at 39th Infantry Battalion ng Philippine Army sa matagumpay na operasyon na nagresulta ng pagkakadiskubre at pagkakasira ng 26,350 pirasong tanim ng marijuana.

Naaresto naman ang isang suspek na kinilalang si Lima Cansing na siyang nagtanim sa libu-libong marijuana plants at nahaharap sa Section 16 ng Comprehensive Dangerous Drugs Act of 2002 o RA 9165 na may multang kalahati hanggang P10-M.

Sa ngayon, nasa kustodiya ng Davao del Sur PPO ang suspek para sa dokumentasyon at pagsasampa ng kaso habang 11 pirasong sample ng marijuana plants naman ay itinurn-over sa Davao del Sur Provincial Forensic Unit para sa qualitative examination.

Samantala, nagbabala naman PNP Chief sa mga taong nagtatanim ng marijuana na mahaharap ang mga ito sa habambuhay na pagkakakulong kapag napatunayang guilty. —sa panulat ni Angelica Doctolero

Hawak na ng mga otoridad ang apat na persons of interest sa pagkamatay ng 18-anyos na estudyanteng kinilalang si Reymarc Rabutazo na residente ng Barangay Longos, Kalayaan, Laguna.

Matatandaang dead on arrival sa General Cailles hospital sa Pakil, Laguna ang biktima matapos sumailalim sa hazing o initiation rites ng Tau Gamma Phi Fraternity nitong linggo.

Base sa impormasyong nakuha ng mga tauhan ng Kalayaan Municipal Police Station, isang binata ang nasawi matapos malunod sa isang ilog pero kalaunan ay napag-alaman na isa pala itong hazing kung saan, nagtamo ng mga pasa sa mga hita ang biktima.

Bukod pa dito, sinabi din ng ina ng biktima na si Maricar Rabutazo na nakakuha din ng damaged sa ulo at paso sa katawan si Reymarc.

Humiling na ang Kalayaan Municipal Police Station na ma-autopsy ang bangkay ng biktima habang nakikipagtulungan narin ang ilang miyembro at opisyal ng Tau Gamma Phi sa Kalayaan, Laguna para sa imbestigasyon.

Nananawagan naman ng tulong ang ina ng biktima para mabigyan ng hustisya ang pagkamatay ng kaniyang anak.

Nangako naman ang Philippine National Police (PNP) na kanilang tututukan ang naturang kaso para makamit ang hustisya.  —sa panulat ni Angelica Doctolero