RONDA PROBINSYA

Patay ang isang 11-taong gulang na bata matapos na malunod nang tangayin ng alon sa Dagupan City.

Ayon sa pulisya, naliligo sa beach at magkahawak ng kamay ang biktima at ina nitong si Ruffa Figueroa, kasama ang iba pa nilang kaanak nang bigla umanong tumaas ang tubig sa dagat at lumakas ang alon.

Sinabi ni Figueroa na muntik na rin malunod ang iba pa nilang kaanak dahil sa biglang pagtaas ng tubig sa dagat.

Samantala, umaga na ng kasunod na araw nang lumulutang sa dagat ang katawan ng biktima. — sa panulat ni Mara Valle

Patay ang isang seaman sa bayan ng Badoc, Ilocos Norte matapos siyang pagbabarilin ng hindi pa nakikilalang mga salarin.

Ayon sa pulisya, habang bumibili ang biktima ng niyog sa tindahan ay bigla na lamang dumating at pinagbabaril ng mga salarin na magka-angkas sa motorsiklo.

Nagtamo ng tama ng baril sa dibdib at ulo ang biktima.

Samantala, may pagkakakilanlan na sa gunman at may mga motibong pinag-aaralan na ang mga otoridad pero hindi pa ito idinetalye. — sa panulat ni Mara Valle

Ikakasa ng Department of Health – Region 3 sa Abril a-1 ang mass vaccination para sa mga edad lima pataas.

Isasagawa ang pagbabakuna Central Luzon Center for Health Development Compound sa Maimpis Village sa siyudad ng San Fernando.

Pinayuhan naman ng DOH-3 ang mga lalahok sa  “Bayanihan Bakunahan” program na magsuot ng face masks at panatilihin ang One-meter physical distance.

Patay ang isang Environmental officer matapos na paulanan ng bala sa Hilongos, Leyte.

Kinilala ang biktima na si Jenifer Mendoza, 49- anyos.

Ayon sa mga otoridad, papunta sa kanyang bukid si Mendoza sakay ng motorsiklo nang pagbaba nito ay pagbababarilin ng hindi pa nakikilalang suspek.

Tinamaan si Mendoza ng bala sa iba’t ibang parte ng kanyang katawan na siyang rason kung bakit binawian din agad ito ng buhay.

Samantala, iniimbestigahan na ng pulisya ang pamamaril sa tulong ng CCTV footage sa nasabing lugar. — sa panulat ni Mara Valle

Nakumpiska ng mga otoridad sa loob ng isang simbahan ang iligal na pagbebenta ng mga krudong nakasilid sa mga drum at iba pang container sa bayan ng Kitaotao, Bukidnon.

Ayon sa mga tauhan ng Philippine National Police-Regional Special Operations Unit (PNP-RSOU), agad silang nagsagawa ng buy-bust operation sa nabanggit na lugar matapos makatanggap ng tip mula sa isang concerned citizen.

Sinabi ni Pol. Brig.-Gen. Benjamin Acorda, Regional Director PRO 10 na ang narekober na diesel ay iligal na ibinebenta sa isang pamamaraan na tinatawag na “paihi” kung saan, aabot sa P150-K ang halaga ng nakumpiskang langis sa loob ng mga container.

Base sa imbestigasyon ng mga otoridad, kabilang sa mga bumili ng diesel ay ang mga cargo at heavy construction truck, na nagbabayad ng P1, 000 para sa 20 litro ng krudo.

Samantala, aabot din sa mahigit P400-K  halaga ng langis ang nasabat naman sa iligan kung saan, tumangging magbigay ng pahayag ang mga suspek na naresto ng mga otoridad.

Paglabag sa PD No. 1865 o mas kilala bilang iligal na pagbebenta ng mga produktong petrolyo ang mga akusado na makukulong ng aabot sa dalawa hanggang limang taon at may multang aabot sa P20,000 hanggang P50,000. —sa panulat ni Angelica Doctolero

Napagdesisyuna na ng Department of Justice (DOJ) na magsasampa sila ng kaso laban sa 10 indibidwal na naaresto noong Marso 15 kaugnay ng pag-transport ng  P11B a halaga ng droga sa Infanta, Quezon.

Kinilala ng DOJ ang sampung naaresto na sina Alvin Ibardo, Jaymart Gallardo, Reynante Alpuerto, Jenard Samson, Jamelanie Samson, Mark Bryan Abonita, Marvin Gallardo, Dante Mannoso, Eugene Roger Bandoma At Kennedy Abonita.

Kakasuhan sila ng paglabag sa of Section 5, Article II of Republic Act No. 9165 Comprehensive Dangerous Drugs Act of 2002 para sa pag-transporta ng 1,680.563 kilograms o methamphetamine hydrochloride o kilala sa tawag na shabu.

Nabatid na ihahain ang reklamo sa mga suspek sa regional trial court sa naturang lalawigan.  - sa panulat ni Mara Valle