RONDA PROBINSYA

Idinepensa ng Philippine National Police (PNP) ang mga tauhan nito sa Pilar Municipal Police Station sa lalawigan ng Abra.

Ito’y matapos akusahan ng kampo ni Pilar Vice Mayor Jaja Josefina Disono na bias o may kinikilingan umano ang mga Pulis doon.

Ayon kay PNP Chief, P/Gen. Dionardo Carlos, tumutupad lang ang mga Pulis Pilar sa kanilang trabaho at patunay aniya rito ang CCTV footages na inilabas ng kampo mismo ni Disono.

Tinabla ni Carlos ang katwiran ni Disono na lisensyado ang mga baril na bitbit ng kaniyang mga bodyguard dahil mahigpit aniyang ipinagbabawal ito ng batas.

Wala rin aniya sa sasakyan ng Bise Alkalde ang matataas na kalibre ng armas na kanilang isinuko kung hindi ay nasa van na nagsisilbi niyang Security Escort.

Magugunitang 1 sa mga body guard ni Vice Mayor Disono ang nasawi matapos makipagbarilan sa mga Pulis nang takasan nito ang inilatag na checkpoint sa Brgy. Poblacion nuong isang linggo.

BINAWIAN ng buhay ang isang lalaki makaraang tagain umano sa ulo at leeg ng sariling ama sa bayan ng Sibunag, Guimaras.

Dead-on-the-spot ang biktimang si Edwin Galimba, 60 taong gulang, at residente ng Barangay Maabay.

Sa imbestigasyon ng Sibunag police, sinuntok umano ng biktima ang kanyang ina matapos ang mainitang pagtatalo kaya’t nagsumbong ito sa asawa na humantong sa pananaga.

Nasa kustodiya na ng awtoridad ang suspek na nahaharap sa kasong parricide.

PATAY ang dalawang hinihinalang miyembro ng Abu Sayyaf Group o ASG habang sugatan naman ang siyam na iba pa makaraang maka-bakbakan ang mga tropa ng pamahalaan sa Basilan province.

Ayon kay Joint Task Force-Basilan commander Brig. Gen. Domingo Gobway, kabilang sa mga nasawi ang limang followers ni ASG leader Radzmil Janatul alyas Abu Khubayb habang nilalapatan naman ng lunas sa ospital ang apat na sugatan na pawang mga miyembro ng 64th Infantry Battalion.

Sinabi ni Gobway na nakatanggap sila ng text message hinggil sa presensiya ng isang armadong grupo sa Barangay Sukaten sa bayan ng Sumisip kung kaya’t pinuntahan ito ng mga sundalo na naging sanhi ng nasabing engkwentro.

Nakilala na ang isang akyat-bahay matapos mahuling manloob sa isang subdivision sa Bacolod City.

Ayon sa mga otoridad, kitang-kita sa cctv ang pagpasok ng suspek sa isang residential compound.

Mahigit kalahating oras sa loob ng bahay ang suspek at muling inakyat ang pader at sumakay ng kanyang motor paalis na bitbit ang mga bag at jacket.

Sa pamamagitan ng cctv, nakilala ng mga otoridad ang suspek na pinaghahanap na ng mga pulis.—sa panulat ni Abby Malanday

Nasawi ang isang kagawad matapos magbabarilin habang natutulog sa loob ng kaniyang tahanan sa bayan ng Pilar sa Abra kahapon.

Kinilala ang biktima na si Marlon Tanurio, singkwenta’y anyos at kagawad ng Barangay Bolbolo.

Ayon sa Abra Police Provincial Office, nagising sa putok ng baril ang kinakasama ng biktima at nakita ang dumudugong ulo ni Tanurio.

Paliwagan naman ni Police Major Edwin Sergio, tagapagsalita ng Abra Police Provincial Office na iniimbestigahan pa ang motibo sa insidente at kung may kinalaman ito sa paparating na halalan.

Hindi tumatakbo sa posisyon ang biktima at wala ring napapabalitaang banta sa buhay. —sa panulat ni Abby Malanday

Patay ang dalawang katao kabilang ang groom habang 28 ang sugatan matapos mahulog ang sinasakyan nilang jeep sa bangin.

Naganap ang aksidente sa Bayan ng Torrijos sa Marinduque kung saan pauwi na ang mga ito galing sa kasalan.

Kinilala ang nasawing groom na si Engineer Allan Roldan at isang 10 gulang na bata na parehong dead-on-arrival sa ospital.

Ayon kay Police Lieutenant Lily Nicolas, Police Chief ng Torrijos, galing sa Bayan ng Sta. Cruz ang jeep na pauwi na dakong alas-3 ng hapon.

Dito na nawalan ng preno ang jeep at tuloy-tuloy na nahulog sa bangin. —sa panulat ni Abby Malanday