RONDA PROBINSYA

Arestado ang isang  miyembro ng  gun-for-hire at high value target list sa isinagawang buy-bust sting sa Barangay Cuta Central, Batangas City.

Kinilala ang suspek na si Jessie Gumban, alias Bakol, 26 anyos.

Ayon kay Batangas Police Director Col. Glicerio Cansilao, ang suspek ay hindi lamang contract killer kundi supplier din ng iligal na droga.

Ang pagkaaresto suspek ay batay sa sumbong mga concerned citizens, kaya agad na isinagawa ang buy-bust at nasamsam dito ang mga walang lisensyang baril.

Nakumpiska rin kay Gumban ang nasa 13.5 grams ng  shabu na nagkakahalaga ng 91,000 pesos.

Patay ang anim na indibidwal habang sugatan naman ang dalawa pa matapos mahulog sa bangin ang isang Tamaraw FX sa besao, Mt. Province.

Base sa imbestigasyon, tinatahak ng naturang sasakyan ang mabanging kalsada sa bahagi ng Sitio Bunga, Barangay Calengan sakay ang walong pasahero kabilang na ang driver nang mahulog ito sa bangin.

Dead on arrival ang anim na indibidwal habang isinugod naman sa pinaka malapit na ospital ang dalawa pa.

Nagsasagawa na ng imbestigasyon ang mga otoridad kung ano ang sanhi ng aksidente at inaalam narin ang mga pagkakakilanlan sa mga nasawi.

Patay ang dalawang magpinsan sa Silang, Cavite matapos sumemplang ang sinasakyan nilang motorsiklo kahapon ng madaling araw.

Kinilala ang mga biktima na sina Gladier Alcaraz, 17 anyos at ang pinsan nitong si Mark Jerald Alcaraz Asinas,  23 anyos na siyang nagmamaneho ng motorsiklo.

Ayon kay P/Master Sgt. Johnny Dumangeng, galing sa birthday party ang mga biktima at papauwi na nang maganap ang insidente.

Bagamat patuloy ang imbestigasyon ng mga otoridad ay hinihinalang lasing ang mga biktima nang maganap ang aksidente.

Patay ang isang guro at isang human resource manager habang sugatan ang isang negosyante sa magkahiwalay na pamamaril sa lungsod ng Lipa, Batangas noong Martes.

Kinilala ang mga nasawi na sina Richard Bon, 36 anyos,  guro at Lorena Roaring, 36 anyos, human resource manager.

Sugatan naman ang negosyanteng si George Sagarbarria, 59 anyos.

Ayon sa mga otoridad, sakay ng motorsiklo si Bon nang barilin ng dalawang suspek nang malapitan sa ulo na naging sanhi ng kanyang agad na kamatayan.

Dead-on-the-spot naman ang sakay nakaparadang kotse na si Lorena Roaring at sugatan si George Sagarbarria nang biglang sumulpot ang isang gunman pinagbabaril ang mga biktima.

Sa ngayon ay patuloy paring tinutugis ng mga otoridad ang mga suspek sa magkahiwalay na insidente.

Nakapagtala ang Department of Health -Davao region ng apat na nasawi dahil sa leptospirosis ngayong taon.

Ayon kay DOH Davao Assistant Regional Director Dr. Gerna Manatad mula ang mga namatay sa lalawigan ng Davao del Norte, Davao City at Davao Occidental.

Kumpara noong 2021, mas mataas ang death toll na naitala ngayong taon.

Samantala, ang mataas na pagkamatay ay dahil sa masamang panahon at tropical cyclones na nagdulot ng pagbaha sa naturang rehiyon.

Aabot sa pitong mga baril at isang bala ang sinurrender ng isang lalaki sa Kalibo na sakop ng munisipalidad ng Panay, Aklan.

Ayon sa mga otoridad, isang 44-anyos na lalaki ang nagpunta sa Anilao PNP, upang isuko ang kaniyang mga baril at bala.

Sa ngayon, isinasailalim sa examination ang hindi na pinangalanang lalaki matapos i-surrender ang kaniyang kagamitan.

Patay ang apat na miyembro ng isang pamilya matapos imasaker ng mga salarin sa Purok 3, Brgy New Katipunan, Midsalip, Zamboanga Del Sur.

Kinilala ang mga biktima na sina Lolifer Zamora Udarbe, 33-anyos, ama ng pamilya; Julieta Arapon Aligo, 26-anyos ina naman ng pamilya; Elna Mae Udarbe, 7-anyos at Eljune Udarbe, 5-anyos.

Base sa imbestigasyon ng mga otoridad, pinasok ng mga armadong kalalakihan ang bahay ng pamilya Udarbe saka pinagtataga ang mga biktima.

Nang rumesponde ang mga otoridad, dito na tumambad ang hiwa-hiwalay na bahagi ng katawan ng mga biktima.

Sa ngayon, inaalam pa ng mga otoridad ang pagkakakilanlan sa mga salarin at kung ano ang motibo sa pagpaslang sa mga biktima.

Patay ang isang lalaking bumili lang umano ng lugaw sa Manila East Road, sa Brgy. Calumpang, Binangonan, Rizal.

Kinilala ang biktima na si Raymart Godoy habang nakatakas naman ang salarin sakay ng isang tricycle.

Base sa imbestigasyon ng mga otoridad, pasakay na sana ng kaniyang scooter motorcycle ang biktima nang bigla na lamang itong nilapitan ng isang armadong lalaki saka binaril sa ulo si Godoy gamit ang isang revolver saka mabilis na tumakas.

Patuloy pang iniimbestigahan ng mga otoridad ang naganap na krimen.

Patay matapos malunod ang isang lalaki sa isang beach resort sa Barangay Bucana na sakop ng Ternate, Cavite.

Kinilala ng Ternate Municipal Police Station ang biktima na si Daniel Francisco na lumalangoy umano sa dagat pero ilang sandali pa ay natagpuan na lamang ang katawan nito na lumulutang.

Naisugod pa sa Cavite Municipal Hospital ang biktima sa Maragondon, Cavite pero idineklara itong dead-on-arrival ng attending physician.

Isa umanong miyembro ng New People’s Army ang patay matapos makipagsagupaan sa militar sa bayan ng Cauayan, Negros Occidental.

Ayon kay Capt. Kim Apitong, Officer-in-Charge ng 3rd Infantry Division-Public Affairs Office, dakong ala-6 kahapon ng umaga nang maganap ang engkwentro sa Sitio Bajay, Barangay Caliling.

Isinumbong anya ng ilang residente ang pagsulpot ng mga hinihinalang rebeldeng komunista sa kanilang lugar.

Agad sumaklolo ang 15th Infantry Battalion ng Philippine Army at naka-engkwentro ang nasa 10 miyembro ng NPA.

Tumagal ang sagupaan ng 15 minuto na nagresulta sa pagkamatay ng isa sa mga rebelde.

Narekober naman ng mga otoridad sa encounter scene ang isang M4 rifle.