RONDA PROBINSYA

Kinundena ng LTFRB ang pambobomba sa isang pampasaherong bus sa Parang, Maguindanao kung saan malubhang nasugatan ang apat katao.

Dahil dito hiningi ng LTFRB sa mga otoridad sa Parang ang mga detalye sa nasabing insidente partikular ang mga suspek na nasa likod ng nasabing inasidente.

Tuluy-tuloy naman ang pagkalap ng impormasyon ng mga otoridad sa naturang insidente kung saan patungong Pagadian City ang rural tour bus sakay ang 23 pasahero nang biglang sumabog ang isang improvised explosive device sa likod nito.

Patay ang isang ginang at dalawa nitong anak na edad tatlo at apat matapos pagsasaksakin ng isang lalaki sa bayan ng San Quintin, Pangasinan.

Kinilala ang mga biktimang sina Crystalene Ogaco, 36 na taong gulang, online tutor at mga anak niyang sina Ashley Jewel Morante, 10 at Jacob Morante, anim na taong gulang.

Nagtamo ng 11 saksak si Crystalene habang isa hanggang dalawa sa kanyang mga anak.

Ayon kay Pangasinan Provincial Police Director, Col. Richmond Tadina, naaresto ang suspek na si Dexter Lichauco alyas Terio, 24 anyos, pinsan ni Crystalene at residente ng Purok 5, Barangay Lagasit.

Matagal na umanong may alitan ang ginang at pinsan nito at nagtalo kamakailan nang hindi pautangin ni Crystalene si Dexter.

Hindi naman narekober ng mga imbestigador ang patalim na ginamit sa krimen habang nahaharap na ito sa kasong 3 counts of murder.

Idineklarang special non-working holiday ang Abril a-30 para sa Dagupan City, bilang selebrasyon ng Bangus Festival.

Batay sa Proclamation 1340 na nilagdaan ni executive secretary Salvador Medialdea alinsunod sa authority ni Pangulong Rodrigo Duterte, idineklarang holiday ang nasabing petsa upang makapagdiwang ang mga residente.

Bilang selebrasyon, magkakaroon ng Street Party sa lalawigan, Music and Arts Festival at maging ang pagprito ng bangus.

Kinansela ang pagdiriwang ng Bangus Festival sa nakalipas na dalawang taon dahil sa COVID-19 pandemic.

Patuloy naman ang paalala ng DOH sa mga lalahok na obserbahan pa rin ang health protocols.

Patay ang isang 2-taong gulang na bata matapos magulungan ng umaandar na 10-wheeler truck, sa National Highway ng Paradise Gonzaga sa Cagayan.

Ayon sa imbestigasyon, halos madurog ang buong katawan ng bata na nakatira sa Purok 7 ng naturang lugar.

Bigla umanong tumawid sa Highway ang bata at nagkataon na padaan ang truck.

Nasawi ito habang ginagamot sa APEM Hospital ng naturang lugar.

Kusa namang sumuko sa mga otoridad ang drayber ng truck.

Nagkakahalaga ng P350 na pekeng chinese insecticides, ang nakumpiska ng National Bureau of Investigation (NBI) sa Batangas at Laguna.

Ayon sa NBI, kinabibilangan ito ng 2k pirasong pekeng kemikal na itinuturing na masama sa mga consumers.

Hindi naman matukoy kung epektibo ang mga nakumpiska laban sa mga insekto kaya mas mabuting sirain na ito.

Sa ngayon, hihingi na ng permiso ang NBI sa korte upang agad masira ang mga produkto.

Mahigit P300-K halaga ng hinihinalang shabu ang nakumpiska mula sa isang drug suspect sa isinagawang operasyon sa Brgy. San Nicolas, Minalin, Pampanga.

Kinilala ang suspek na si Alezandro Cunanan, 43 taong gulang, at residente ng Donia Victoria Dau sa Mabalacat.

Bukod sa 360,000 pesos na halaga ng umano’y shabu, nakumpiska rin sa operasyon ang isang libong pisong buy-bust money, isang cellphone, driver’s license, at isang motorsiklo.

Reklamong paglabag sa comprehensive dangerous drugs act ang isasampa laban sa suspek.

Huli ang isang construction worker na matagal nang wanted dahil sa kasong rape sa ikinasang operasyon ng Muntinlupa Police sa Leyte.

Ang Top 9 Most Wanted Person ng Muntinlupa City Police Station na si Jayson Daloso Fabillo ay nadakip sa Brgy. Milagrosa, Sta. Fe, sa nasabing probinsya.

Si Fabillo ay matagal nang tinutugis mga awtoridad dahil sa kinakaharap nitong kasong rape sa sala ni Presiding Judge Antonietta Pablo Medina ng Muntinlupa City RTC Branch 276.

Walang inirekomendang piyansa ang korte laban sa akusado.

Naaagnas na nang matagpuan sa loob ng isang balon ang sakristang dalawang linggo nang nawawala sa balasan sa Iloilo.

Kinilala ang biktima na si Joshua Bandojo, 19-anyos, may problema sa pag-iisip at residente ng Batuan sa nasabing bayan.

Ayon kay Police Staff Sergeant Ramon Elambre, imbestigador ng Balasan Municipal Police Station,  dalawang linggo nang pinaghahanap ang lalaki dahil hindi naman nagpaalam sa kaniyang pamilya.

Nakita ng isang magsasaka ang katawan ng biktima nang iigib ito sa isang balon.

Palaisipan naman sa pulisya kung paano napunta sa balon ang biktima.

Madalas tumulong sa simbahan si Elambre at wala umanong kaaway sa lugar.

Anim na katao ang nasawi habang dalawa ang sugatan matapos na mahulog ang isang sasakyan sa bangin na may 100 metro ang lalim sa bayan ng Besao, Mountain Province.

Ayon kay Police Office Spokesman Police Captain Marnie Abellanida, lulan ng van ang mga kabataan na nasa edad 17 hanggang 21.

Mula aniya sa Ilocos Sur ang mga biktima nang mahulog ang sinasakyan sa nasabing bangin na posibleng dahilan nito ang malakas na pag-ulan sa lugar.

Samantala, patuloy ang imbestigasyon ng mga otoridad sa naturang insidente.

Nasakote ng PNP-Criminal Investigation and Detection Group (CIDG) ang isang barangay chairman na sangkot umano sa 2009 Maguindanao Massacre.

Kinilala ng PNP-CIDG Maguindanao Field Unit ang suspek na si Datu Harris Ampatuan Macapendeng, chairman ng Barangay Tuayan sa bayan ng Datu Hoffer na may patong sa ulo na 300,000 pesos.

Naaresto si Macapendeng ng CIDG sa BARMM compound sa Cotabato City, noong Miyerkules.

Kabilang ang suspek sa inisyuhan ni Quezon City Regional Trial Court Branch 221 Judge Jocelyn Solis-Reyes ng warrant of arrest para sa 43 counts ng murder.

Ayon sa CIDG, kabilang din si Macapendeng sa private army ng mga Ampatuan at isa sa mga dumalo sa mga pulong kung saan plinano ng mga mastermind ang pag-massacre sa 58 katao noong November 23, 2009.

Isa anila itong patunay na gumugulong at hindi natutulog ang batas at hustisya anumang sitwasyon upang mapanagot ang mga sangkot at mabigyang katarungan ang mga biktima at kanilang pamilya.