RONDA PROBINSYA

Umabot na sa limang kilometro ang haba ng pila ng mga truck sa Matnog Port sa Sorsogon matapos maantala ang mga biyahe bunsod ng bagyong Agaton.

Ayon sa Philippine Coast Guard, nakataas parin kasi ang Signal no. 1 sa ilang bahagi ng bansa kaya’t suspendido parin ang biyahe ng mga sasakyang pandagat.

Dahil dito, umabot narin sa kalsada ang pagmamando ng mga tauhan ng PCG dahil sa pagdagsa ng mga truck sa mga pantalan.

Samantala, nasa mahigit 9,400 naman ang bilang ng mga pasaherong na-stranded sa ibat-ibang mga pantalan kung saan, ang ilan sa kanila ay sa terminal na nagpalipas ng gabi.

Binigyan naman ng PCG ng pagkain at maiinom na malinis na tubig ang mga pasaherong naapektuhan ng kanseladong biyahe. —sa panulat ni Angelica Doctolero

Bagaman nakararanas pa rin ng manaka-nakang mga pag-ulan sa nakalipas na magdamag, unti-unti nang bumabalik sa kani-kanilang mga tahanan ang mga nagsilikas dahil sa bagyong Agaton sa Baybay City sa Leyte.

Ito ang ipinabatid ni Police Regional Office 8 Director, P/BGen. Bernard Banac makaraang hagupitin ng bagyo ang naturang lungsod gayundin ang malaking bahagi ng Eastern Visayas.

Ayon kay Banac, ilan sa mga residente sa Baybay City ang naglilinis na ng kanilang mga naiwang tahanan maliban na lamang sa mga lugar na tinabunan ng nangyaring landslide.

Dahil delikado na kagabi ang sitwasyon, sinabi ni Banac na ipinagpaliban muna ang Search, Rescue and Recovery Operations para na rin sa kaligtasan ng mga rescuer at kanila namang ipagpapatuloy ngayong araw.

Batay sa pinakahuling datos ng Baybay City Disaster Risk Reduction and Management Council, aabot sa 36 na ang bilang ng mga naitala nilang nasawi, 27 ang nawawala habang nasa 105 ang naitalang sugatan. —ulat mula kay Jaymark Dagala (Patrol 9)

Nasamsam ng mga otoridad ang aabot sa P15-M halaga ng Marijuana sa bulubunduking bahagi ng Barangay Adlaon sa Cebu City.

Sa tulong ng pinagsanib puwersa ng mga tauhan ng Cebu City Police Office (CCPO), CCPO-Drug Enforcement Unit, Intelligence Unit, Station 8 at Naval Forces Central ay nadiskubre ang mga tanim na Marijuana.

Kasunod ito ng pagpapaigting ng kampanya kontra Loose firearms o mga iligal na pagbibit-bit ng baril.

Agad namang sinunog ang mga Marijuana upang hindi na mapakinabangan pa habang pinaghahanap narin ng mga otoridad ang salarin sa pagtatanim ng Marijuana. — sa panulat ni Angelica Doctolero

Nagdeklara na ng Dengue outbreak sa Zamboanga City matapos sumirit ang kaso ng naturang sakit.

Ayon sa Zamboanga City Disaster Risk Reduction Council pumalo na sa 893 ang dengue cases sa siyudad simula pa noong Enero a-1 hanggang Abril a-2.

Gumagawa na ng hakbang ang Department of Health (DOH) katuwang ang Center for Health Development of Zamboanga at Regional Epidemiology Surveillance Unit laban sa sakit.

Naglaan na rin ang City Government ng Dengue Fast Lanes at hiwa-hiwalay na silid sa mga ospital upang matugunan ang pangangailangan ng mga pasyente.

Kaugnay nito, pinayuhan ng DOH ang publiko na ugaliing maging malinis ang kapaligiran at takpan ang mga nakaimbak na tubig upang hindi pamahayan ng mga lamok. — sa panulat ni Angelica Doctolero

Arestado ang magkakapatid na hinihinalang miyembro ng Gun-for-Hire Group sa Brgy. Del Rosario at Brgy. Cabay sa Tiaong Quezon Province.

Ayon sa mga otoridad, nahaharap sa patung-patong na kaso matapos mahulihan ng mga baril at iligal na droga sa magkakahiwalay na operayson sina Teodoro Aquino Satumba, 34-anyos; Abelardo Aquino Satumba, 47-anyos; at Lorenzo Aquino Satumba, 43-anyos.

Nabatid na ang mga naaresto ay nag-o-operate sa Quezon, Batangas at Cavite at sangkot din umano sa paglaganap ng iligal na droga sa bayan ng Tiaong at sa mga karatig-lugar.

Nakuha sa kanila ang isang cal. 38 revolver, apat na bala, isang carbine rifle, isang cal. 30, dalawang magazine ng carbine, dalawang cal. 45, limang bala ng baril, isang stabilizer, isang granada, 2 plastic sachet ng shabu at drug paraphernalias.

Nahaharap sa kasong paglabag sa Republic Act 10591 o Illegal Possession of Firearms and Ammunition ang mga inarestong suspek. —sa panulat ni Angelica Doctolero

Arestrado ang 2 drug suspek matapos makuhanan ng mahigit P20-M halaga ng shabu sa ikinasang operasyon ng Central Luzon Regional Police kagabi.

Kinilala ng Nueva Ecija Provincial PNP ang mga drug suspek na sina Sittie Pindatun at Nor-an Bilal na kapwa residente ng Dasmarinas Cavite na umano’y major distributor ng shabu sa NCR, Bulacan at Nueva Ecija.

Nakuha mula sa mga naarestong suspek ang nasa 3 kilo ng hinihinalang shabu na nakasilid sa 2 pakete ng Chinese Tea bags gayudi sa 10 piraso ng nakataling plastic bags na nagkakahalaga ng P20,400,000.00.

Nasamsam din sa kanila ang marked money na ginamit ng Pulis na nagpanggap na poseur buyer at 2 smart phones mula sa mga suspek.

Dahil dito, ipaghaharap ang dalawang naarestong drug suspek ng kasong paglabag sa Republic Act 9165 o Comprehensive Dangerous Drugs Act of 2002. —ulat mula kay Jaymark Dagala (Patrol 9)

Patay ang isang lalaki matapos pagbabarilin sa harap ng kaniyang mag-ina sa loob mismo ng kanilang bahay sa San Jose Del Monte, Bulacan.

Kinilala ang biktima na si Marvin Mendoza kung saan, itinuturong may gawa ng krimen ang kaniyang kapitbahay na si Alexander Gumapac.

Base sa pahayag ni Carmela Gugulan, kinakasama ni Mendoza, kakain sila noon kasama ang 5-taon gulang nilang anak nang biglang dumating sa kanilang bahay si Gumapac saka namaril.

Dead on arrival si Mendoza habang nakaligtas naman ang mag-ina.

Ayon sa mga otoridad, posibleng away sa lupa ang ugat ng krimen dahil dati na umanong gustong sakupin ng suspek ang lupain ng biktima kung saan, sinunog pa ng suspek ang sagingan na pagmamay-ari ng biktima.

Patuloy pang iniimbestigahan ng mga otoridad ang naganap na krimen. —sa panulat ni Angelica Doctolero

Dalawa ang nasawi habang apat ang sugatan, matapos tumama sa flyover railings ang kanilang sasakyan sa Magsaysay Avenue sa Baguio City.

Ayon sa mga imbestigador, kinilala ang nasawi na sina; Cherry Lyn Monte Sasa, 25 anyos at Rodel Polano, 18 anyos.

Habang ang mga sugatan naman ay sina; Fe Serafino Trino, 25; Dariel Pacalso Soligan, 21; Jonar Talabing Taukan, 17; at Marson Anhibey Sabit, 18.

Dead-on-the spot sa aksidente si Sasa habang namatay sa ospital si Polano.

Isinugod naman sa ospital ang mga sugatan at pagkatapos ay pinauwi na matapos gumaling. —sa panulat ni Abby Malanday

Kalaboso ang isang binata matapos masamsaman ng aabot sa isang milyong pisong halaga ng umano’y shabu sa Bacoor, Cavite.

Kinilala ang suspek na si alyas Mak habang nakatakas ang dalawa nitong kasama na sina alyas Tabo at Nora.

Ayon sa pulisya, nasa 150 gramo ng iligal na droga ang nakuha sa suspek.

Nananatili ngayon sa kustodiya ng Department of Social Welfare and Development (DSWD) ang binata habang patuloy na iniimbestigahan ng mga otoridad kung may kinalaman sa Drug Trafficking Group ang mga kasama nito na gumagamit ng mga menor de edad sa pagbebenta ng shabu sa lugar.