RONDA PROBINSYA

Isa umanong miyembro ng New People’s Army ang patay matapos makipagsagupaan sa militar sa bayan ng Cauayan, Negros Occidental.

Ayon kay Capt. Kim Apitong, Officer-in-Charge ng 3rd Infantry Division-Public Affairs Office, dakong ala-6 kahapon ng umaga nang maganap ang engkwentro sa Sitio Bajay, Barangay Caliling.

Isinumbong anya ng ilang residente ang pagsulpot ng mga hinihinalang rebeldeng komunista sa kanilang lugar.

Agad sumaklolo ang 15th Infantry Battalion ng Philippine Army at naka-engkwentro ang nasa 10 miyembro ng NPA.

Tumagal ang sagupaan ng 15 minuto na nagresulta sa pagkamatay ng isa sa mga rebelde.

Narekober naman ng mga otoridad sa encounter scene ang isang M4 rifle.

Walo ang sugatan, kabilang ang isang bata, sa naganap na shootout sa pagitan ng magkalabang political families sa bayan ng Malabang, Lanao del Sur.

Unang umalingawngaw ang putukan sa Barangay Tubod noong linggo ng gabi na nasundan dakong alas-2 at ala-5 ng madaling araw noong Lunes.

Ayon sa Bangsamoro Autonomous Region in Muslim Mindanao Police, walang naitalang casualties o kritikal sa mga biktima na pawang sibilyan.

Humupa lamang ang tensyon nang ideploy sa naturang lugar ang mga miyembro ng PNP-Special Action Force at Philippine Marines.

Aminado naman si Abdul Jabbar Noor, election officer ng Malabang na hindi pa nila mabatid kung election-related ang insidente lalo’t mayroong “Rido” sa pagitan ng dalawang pamilya.

Samantala, isinailalim ng Commission on Elections sa control nito ang Malabang at Bayan ng Tubaran na kabilang sa red code areas o areas of immediate concern ng poll body.

Isang aide ng kandidato sa pagka-provincial board member ang sugatan sa pagsabog ng improvised explosive device habang dumaraan ang convoy ni Maguindanao Governor Bai Mariam Sangki-Mangudadatu sa Barangay Upper Nangi sa bayan ng Upi.

Kinilala ni Maguindanao Provincial Police Director, Col. Jibin Bongcayao ang nasugatang si Abdulraof Usman, 32- anyos, residente ng bayan ng Datu Hoffer.

Si Usman ay miyembro ng staff ni Board Member Candidate Datu Nathaniel Midtimbang, na noo’y naka-buntot sa convoy ni Governor Mangudadatu.

Pauwi na sina Mangudadatu at kanyang mga ka-partido mula sa isang campaign sortie sa South Upi nang maganap ang insidente dakong hapon.

Hindi naman nasugatan ang gobernador dahil nakalampas na ang kanyang sasakyan mula sa blast site.

Nagpapatuloy ang imbestigasyon ng pulisya sa nabanggit na insidente.

Viral sa social media ang isang batang lalaki na nakaligtas sa landslide sa Baybay City, Leyte dulot ng bagyong Agaton matapos magtago sa loob ng isang refrigerator.

Kinilala ang survivor na si CJ Hasme, 11- anyos na narekober ng Baybay City Fire Station – Northern Leyte.

Ayon kay Juanito Orellano Jr., tiyuhin ni CJ, una itong nakita na sugatan ng isang pulis at napag-alamang inilagay ng mga responder sa loob ng refrigerator.

Kasalukuyang nagpapagaling ang bata sa ospital matapos magtamo ng mga bali sa katawan.

Nasawi naman sa landslide ang mga magulang at isang kapatid ni CJ habang nakaligtas ang isa pa niyang kapatid makaraang makahawak sa isang container nang anurin sa ilog.

Isang konsehal sa Maguindanao at escort nito ang patay sa karambola ng mga sasakyan sa Bayan ng M’lang, Cotabato.

Kinilala ni Lt. Colonel Realan Mamon, Hepe ng M’lang police, ang mga nasawi na sina Musa Bago, Municipal Councilor at residente ng Datu Piang, Maguindanao at kanyang escort na si Dong Bago.

Lulan anya sina Bago ng Toyota Hilux Pickup nang makabangga ang isa pang sasakyan sa National Highway sa Purok 5, Barangay Langkong, ala-6:30 kahapon ng umaga.

Limang iba pa na lulan ng pick up ang sugatan at isinugod sa M’lang District Hospital sa Barangay Poblacion.

Bukod sa Hilux, sangkot din sa karambola ang isang Honda Brio na minamaneho ni Nataniel Niar Narciso, empleyado ng DOTr-Region 12;

Ford Ranger, na minamaneho ng isang empleyado ng DENR at isa pang Toyota Hilux na minamaneho naman ni Resurreccion Pueyo, Director ng Civil Service Commission-Region 12.

Inabot ng halos limang oras bago na-retrieve ng Municipal Disaster Risk Reduction and Management Office ang katawan nina Bago na agad inilibing sa Datu Piang alinsunod sa tradisyong Islam.

Tatlong bata ang nasawi sa sunog sa Cabanatuan City, Nueva Ecija sa gitna ng pagdiriwang ng linggo ng pagkabuhay.

Kinilala ang mga biktimang magkakapatid na sina Julius Cesar Gonzales, 12 taong gulang; Christine Joy, 11 at Celina, 3 taong gulang.

Dakong alas-8:30 ng umaga nang sumiklab ang sunog sa isang bungalow na pag-aari ni August Caezar Gonzales sa Barangay Dionisio Garcia.

Ayon sa Bureau of Fire Protection, nadamay ang dalawang katabing bahay ng kaanak ni Gonzales.

Mag-a-9 na nang tuluyang maapula ang sunog.

Tinaya sa P100k ang halaga ng napinsala o natupok na mga ari-arian habang inaalam pa ang sanhi ng pagkalat ng apoy.

Patay ang magkasintahang menor-de-edad matapos malunod sa barangay Basi East sa Bayan ng Solana sa Cagayan nitong Biyernes.

Ayon kay Police Captain Jose Pagulayan, Deputy Chief ng Solana, edad 16 ang babae ang 19 ang lalaking nalunod.

Nagtungo sa ilog ang pamilya ng babae para sana mag-picnic kasama ang nobyo nito, pero tinangay na sila ng rumaragasang tubig sa pagligo.

Sinubukan pang sagipin ng mga residente ang dalawa, pero nahirapan na dahil sa lakas ng agos ng tubig.

Nakita naman ang labi ng dalawa sa magkahiwalay na lugar ng Amulung sa Cagayan at Barangay Natappian East sa Bayan ng Solana. —sa panulat ni Abby Malanday

Patay ang isang habal-habal rider matapos matabunan ng mga tinibag na limestone o batong apog sa Munisipalidad ng Oslob, Cebu.

Kinilala ang biktima na si Joshua Gumapon Salgareno, 22-anyos na isa ring laborer sa lugar.

Sa imbestigasyon ng mga otoridad, ang mga tinibag na limestone ay gagamitin sana ni Salgareno sa paggawa ng kaniyang bahay pero malakas umano ang ulan bunsod ng bagyong Agaton.

Dito na naganap ang aksidente kung saan, makalipas ang dalawang oras, saka lamang nakuha ang katawan ng biktima mula sa bumagsak na mga bato dahil nahirapan ang mga otoridad sa search and retrieval operation. —sa panulat ni Angelica Doctolero

Sa kauna-unahang pagkakataon simula nang tamaan ng COVID-19 pandemic ang bansa, pinayagan na rin ng Mabalacat City Government sa Pampanga ang pagsasagawa ng Lenten Rites at Liturgical Activities ngayong Semana Santa.

Ayon kay Mabalacat Mayor Cris Garbo, ikinunsidera na nila ang pagluluwag ng COVID restrictions dahil sa kawalan ng mga bagong infections sa nakalipas na mahigit isang linggo kaya’t pinayagan na ang mga tradisyunal na aktibidad.

Kilala ang nasabing lungsod sa kaliwa’t kanang Holy Week Activities, gaya ng pag-pe-penitensya, pabasa, via crucis o way of the cross at visita iglesia.

Inabisuhan naman ni Garbo ang mga residente na panatilihin ang pagtalima sa minimum health protocols dahil hindi pa tuluyang nawawala ang banda ng COVID-19.