NATIONAL NEWS

Ibinunyag ni Interior Secretary Jonvic Remulla na posibleng tumakbo siya sa pagkapangulo sa 2028 national elections, depende sa magiging takbo ng labanan.

Ayon kay Sec. Remulla, ikokonsidera niya ang pagtakbo kung magiging “one-on-one” o dalawang kandidato lamang ang maglalaban para sa pinakamataas na posisyon sa bansa.

Mahalaga anya na malinaw ang pagpipilian ng mga botante at dapat makita ng taumbayan ang direksyon ng pamahalaan sa pananaw ng dalawang kandidatong maghaharap sa halalan.

Binanggit ng kalihim na maaari ding ibang personalidad ang tumakbo basta’t malinaw ang hangarin sa bansa, kabilang sa kanyang itinuturo sina Public Works Secretary Vince Dizon at Senador Chiz Escudero.

Binigyang-diin ni Sec. Remulla na posible ang kanyang pagtakbo ngunit wala pang pinal na desisyon at kailangan pa anya ang pagsang-ayon ng kanyang asawa.

Tinukoy ng Commission on Audit ang iba’t ibang pagkukulang sa implementasyon ng AKAP o Ayuda sa Kapos ang Kita Program ng Department of Social Welfare and Development.

Batay sa 2024 annual audit report ng COA, may mga benepisyaryong nakatanggap ng paulit-ulit at magkakatulad na ayuda mula sa iba’t ibang special disbursing officers sa loob ng tatlong buwan.

Ayon sa COA, halos dalawampung libong benepisyaryo na karamihan sa National Capital Region ang nakatanggap ng multiple assistance dahil sa kakulangan ng sistema at pagpapatupad ng tamang payout channels.

Kabilang din sa pinuna ng COA ang pagbibigay ng AKAP sa hindi kwalipikadong benepisyaryo tulad ng above-minimum-wage earners at mga estudyante.

Kabilang dito ang 11.9-million pesos na naipamahagi sa halos limang daang kumikita nang lampas sa minimum wage at 48.7-million pesos na educational assistance sa senior high at college students sa ilang rehiyon.

Target ng Office of the Ombudsman ang pagsasampa ng civil forfeiture case laban kay dating House Speaker Martin Romualdez.

Ayon kay DILG Secretary Jonvic Remulla, pursigido ang Ombudsman na kasuhan ng gross criminal neglect o gross neglect ang dating House Speaker para makuha ng estado ang mga assets nito.

Sinabi ni Secretary Jonvic na kung hindi man makuha “criminally” si Romualdez ay kukumpiskahin ng gobyerno ang mga assets nito.

Magugunitang December 18 nang irekomenda ng DPWH, Department of Public Works and Highways, ang pagsasampa ng criminal at administrative charges laban sa halos siyamnapung indibidwal, kabilang si Romualdez, may kaugnayan sa flood control corruption scandal.

Sinusuri na ng National Bureau of Investigation ang mga gamit na nakuha mula sa hotel room kung saan nanuluyan si dating Public Works Undersecretary Maria Catalina Cabral bago siya namatay.

Ayon kay NBI spokesman Atty. Palmer Mallari, may ilang dokumentong isinasailalim pa sa beripikasyon, at ang magiging disposisyon ng mga nakumpiskang gamit ay pagpapasyahan ng korte matapos maisauli ang search warrant.

Wala anyang nakuhang suicide note sa loob ng silid, ngunit may mga ebidensyang may kaugnayan sa kasong iniimbestigahan, partikular sa maanomalyang flood control projects.

Kabilang din sa sinusuri ng NBI ang selfie ng driver ni Cabral at ang viral dashcam video na sinasabing nahagip nito ang dating DPWH official na malapit sa bangin.

Naglabas na ng subpoena ang Office of the Ombudsman na nag-uutos sa Department of Public Works and Highways na isumite at i-turn over ang lahat ng computer at electronic devices na opisyal na ibinigay kay dating Undersecretary Maria Catalina Cabral.

Ayon kay Ombudsman spokesman Mico Clavano, isasailalim ang mga naturang gamit sa forensic examination upang matukoy kung may datos na binago, binura, o pinakialaman matapos mabunyag ang flood control scandal.

Layunin anya ng pagsusuri na matiyak ang integridad ng mga digital na ebidensya na maaaring may kaugnayan sa imbestigasyon sa nasabing anomalya.

Matatandaang si Cabral na iniuugnay sa mga kwestyonableng flood control project sa bansa, natagpuang patay sa Benguet nitong a-disi nwebe ng Disyembre.

Nagsampa ng kaso sa Ombudsman ang isang grupo laban kina Executive Secretary Ralph Recto at dating PhilHealth President Emmanuel Ledesma.

Ayon sa Save the Philippines Coalition, sinampahan nila ng kaso ang dalawang opisyal ng pamahalaan ng plunder, malversation of public funds, at iba pa kaugnay sa maanomalyang paglipat ng pondo ng PhilHealth sa National Treasury.

Umaasa ang grupo na magkakaroon ng makatarungang pagpapasya ang Office of the Ombudsman sa patuloy na pagpapanagot sa lahat ng mga sangkot sa katiwalian. —sa panulat ni Anjo Riñon

Nagpaalala ang Department of Health sa publiko na palaging maghugas ng kamay o gumamit ng alcohol sanitizer habang patuloy ang holiday rush ngayong Kapaskuhan.

Mas mataas kasi anila ang tsansa ng pagkalat ng germs at mikrobyo sa gitna ng dagsa ng mga mamimili at paghahanda para sa Pasko.

Hinikayat din ng kagawaran ang publiko na sundin ang tamang paghuhugas ng kamay upang makaiwas sa sakit at mapanatili ang kaligtasan ng pamilya ngayong December holiday season.

Tuloy-tuloy naman ang iba’t ibang paalala at payo ng kagawaran para magbigay-kaalaman sa publiko hinggil sa tamang pag-iingat ngayong panahon ng Kapaskuhan. —sa panulat ni Anjo Riñon

Pinahintulutan ng Department of Justice ang Bureau of Customs na gawing donasyon ang mga nasabat nitong pagkain upang hindi ito masayang.

Ngunit iginiit ni Acting Justice Secretary Fredderick Vida na dapat tiyakin ng BOC, at maging ang Anti-Agricultural Economic Sabotage Council at Department of Finance, na ang mga ido-donate nitong mga smuggled agricultural products ay ligtas kainin.

Ginawa ng DOJ ang pahayag bilang tugon sa hiling ng D-O-F sa pag-implementa sa Republic Act 10863, o ang Customs Modernization and Tariff Act, at ang Republic Act 12022, o ang Anti-Agricultural Economic Sabotage Act, matapos masabat ng BOC ang ilang kontrabandong isda. —sa panulat ni Anjo Riñon

Paiigtingin pa ng Department of Health ang mga hakbang laban sa tigdas at tigdas-hangin, kasunod ng 29 percent na pagtaas ng kaso ng nasabing sakit ngayong taon, kumpara sa nakalipas na taon.

Ayon kay Health Secretary Teodoro Herbosa, ipatutupad nila ang rubella supplemental immunization activity sa pamamagitan ng dalawang phase sa susunod na taon.

Isasagawa ang unang bahagi sa Mindanao, kabilang ang Bangsamoro Autonomous Region in Muslim Mindanao mula Enero disi-nuebe hanggang Pebrero a-trese ng susunod na taon; ang pangalawang bahagi naman ay isasagawa sa Luzon at Visayas sa Hunyo ng susunod na taon.

Target isagawa ang vaccination drive sa mga batang mula anim na buwang gulang hanggang limang taong gulang.

Nasa tatlong daan at tatlong drug war victims ang nag-apply para sa pre-trial proceedings laban kay dating Pangulong Rodrigo Duterte sa International Criminal Court, kaunti kumpara sa posibleng bilang ng mga biktima ng war on drugs campaign ni Duterte.

Sa isang ulat na isinumite sa Pre-Trial Chamber I, sinabi ng registry na ang mababang bilang ng mga application ay dulot ng kawalan ng impormasyong bukas sa publiko tungkol sa mga specific charges.

Dagdag pa ng registry, mas mababa sa limang porsyento ng 303 application ang direktang may kaugnayan sa pitumpu’t walong insidente ng pagpatay at tangkang pagpatay na tinukoy sa confidential charging document.

Karamihan sa mga application ay naglalarawan ng mga pagpatay o tangkang pagpatay na sinasabing isinagawa sa panahon ng kampanya laban sa droga ni Duterte habang siya ay alkalde ng Davao City mula 2011 hanggang 2016 at bilang pangulo mula 2016 hanggang 2019, ngunit hindi saklaw ng mga insidenteng tinukoy sa mga kaso.

Hiniling ng registry sa chamber na linawin ang ilang ‘procedural matters’, kabilang na kung anong mga ‘identity documents’ ang tatanggapin at kung ang saklaw ng kaso ay limitado lamang sa pitumpu’t walong pinangalanang biktima.

Isinuko si Duterte sa International Criminal Court nitong nakaraang Marso a-dose dahil sa sinasabing crimes against humanity.