NATIONAL NEWS

Umabot na sa mahigit apat na libong indibidwal ang apektado ng patuloy na aktibidad ng Bulkang Mayon sa lalawigan ng Albay.

Ayon sa National Disaster Risk Reduction and Management Council, nasa apat na libo isandaan apatnapu’t isang residente ang apektado ng pag-aalburoto ng bulkan, kung saan mahigit isanlibong pamilya ang kasalukuyang nananatili sa labing-apat na evacuation centers.

Umabot naman sa 8.6-milyong pisong halaga ng tulong ang naipamahagi sa mahigit isanlibong pamilyang apektado sa lalawigan.

Kabilang sa mga lugar na may pinakamaraming apektadong residente ang Tabaco City, Malilipot, Camalig, Ligao City, at Guinobatan.

Patuloy ang koordinasyon ng mga lokal na pamahalaan at mga ahensiya ng gobyerno upang matiyak ang kaligtasan at kapakanan ng mga residente habang mahigpit na binabantayan ang kalagayan ng Bulkang Mayon.

Pinabulaanan ni Ombudsman Jesus Crispin Remulla ang sinasabing babawiin ng mga dating engineer ng Department of Public Works and Highways na sina Henry Alcantara, Brice Hernandez, at Jaypee Mendoza ang kanilang mga testimonya kaugnay sa flood control scandal.

Ayon kay Assistant Ombudsman Atty. Mico Clavano, tila “ingay” lamang ang mga nasabing balita dahil walang natanggap ang Ombudsman na opisyal na impormasyon tungkol sa recantation ng tatlong dating opisyal ng DPWH.

Iginiit din ni Atty. Clavano na tanging mga sinumpaang salaysay lamang ang kinikilala ng Ombudsman at nilinaw na makakasama sa kanilang pagiging bahagi ng witness protection ang pagbawi ng kanilang testimonya.

Nauna namang nagbabala si Senate President Pro Tempore Panfilo Lacson na maaaring managot sa kasong perjury ang sinumang babawi ng sinumpaang pahayag at iginiit na hindi babagsak ang kaso kahit pa may maganap na recantation.

Kabilang ang Pilipinas sa “Most Exciting Foodie Destinations for 2026” list ng Michelin Guide.

Ayon sa prestihiyosong food guide, pinakatamang panahon lamang ngayon ang magkaroon ng gastronomic adventure sa Pilipinas, matapos ang global moment ng mga pagkaing Pinoy sa Maynila at Cebu noong 2025.

Maliban dito, kinilala rin ng Michelin Guide ang pag-usbong ng mga bagitong Pinoy chefs na may kanya-kanyang style, na bumabalanse sa traditional at international techniques.

Kabilang sa mga Filipino dishes na ini-rekomenda ng Michelin ang sisig, sinigang, inasal, at adobo.

Mas magiging mahal pa para sa mga dayuhang turista ang pagbisita sa Pilipinas.

Ito’y matapos ang planong pagpapatupad ng Bureau of Internal Revenue (BIR) ng isang bagong revenue order na sumasaklaw sa mga serbisyo mula sa mga foreign-service provider.

Nabatid na sa naganap na pagpupulong nina Tourism Secretary Christina Garcia Frasco at Finance Secretary-designate Frederick Go, tinalakay ang nasabing revenue memorandum na nagpapataw ng 25% na final withholding tax sa mga kita ng mga foreign-service providers,

Gayundin ang 12% na final withholding value-added tax sa mga serbisyong isinasagawa sa ibang bansa, pero nagmula pa rin sa Pilipinas ang resulting income.

Kabilang sa mga tinukoy na nonresident foreign corporations (NRFC) na kailangang patawan ng buwis ang mga online booking platforms, international tour operators, at foreign partners na nagbibigay ng outsourced services sa mga Pilipinong kumpanya gaya ng travel technology at reservations technology.

Bumaba ang optimism o positibong pananaw ng mga Pilipino na mapaparusahan ang mga opisyal ng pamahalaan na sinasabing sangkot sa flood control scandal.

Batay sa bagong survey ng Pulse Asia, nitong December 2025, 59% na lamang mula sa 71 percent nitong September ang naniniwalang mapapanagot ang mga sangkot.

Lumabas ang ulat mahigit limang buwan matapos ipag-utos ni Pangulong Ferdinand Marcos Jr. ang imbestigasyon sa maanomalyang flood control projects, na nagbunyag ng sabwatan ng mga politiko, opisyal ng pamahalaan, at kontratista sa bilyong pisong kickback scheme.

Bagaman may mga naarestong suspek, naisampang kaso, at nasamsam na ari-arian, iginiit ng publiko at mga kritiko na wala pa ring nahuhuling tinaguriang “big fish,” kabilang ang nagbitiw na Ako Bicol Party-list Rep. Zaldy Co na nasa ibang bansa.

Isinagawa ang nasabing survey nitong Disyembre 12 hanggang 15 sa 1,200 respondents.

Naitala ng Metro Manila Development Authority (MMDA) na ang upos ng sigarilyo o cigarette butts ang pinakamadalas na makolekta sa Metro Manila nito ng 2025.

Batay sa datos ng MMDA Health Sanitation Services Coordination and Assistance Division, pumangalawa ang candy wrapper, na kadalasang itinatapon sa mga kalsada, bangketa, at iba pang pampublikong lugar.

Nasa listahan din ang plastic, iba pang basurang tulad ng tissue, bus ticket, resibo, face mask, at mga obstruction sa kalsada.

Muling nagpaalala ang MMDA sa publiko na mahigpit na sundin ang mga umiiral na ordinansa hinggil sa tamang pagtatapon ng basura.

Iginiit ng ahensiya na mahalaga ang disiplina ng bawat mamamayan sa lansangan upang mapanatili ang kalinisan at kaayusan sa Kalakhang Maynila.

Nakapagtala ang Department of Health ng pagtaas ng mga kaso ng super flu sa bansa.

Batay sa pinakahuling datos ng DOH, hanggang December 2025, may 77 kaso ng influenza A subclade K, na kilala rin bilang super flu, ang naitala sa buong bansa.

Ang mga kasong ito ay kabilang sa 326 cumulative influenza A infections na matagumpay na naisailalim sa sequencing mula January hanggang November 2025.

Ang mga rehiyong may pinakamataas na kaso ng subclade K ay ang National Capital Region na may 23 cases, sinundan ng Calabarzon at Cordillera Administrative Region na may tig-labing-anim na kaso.

Nilinaw naman ng DOH na hindi ito dapat ikabahala, dahil karamihan sa mga pasyenteng nahawaan ng subclade K ay gumaling na at wala namang naiulat na namatay.

Palalakasin pa ng Department of Education ang mental health at anti-bullying services sa mga pampublikong paaralan sa pamamagitan ng Kaagapay Program.

Ayon kay Education Secretary Sonny Angara, mas napapangalagaan ang mga mag-aaral kapag magkatulong ang pamilya at paaralan.

Sa ilalim anya ng Dep-Ed memorandum, itinatampok ang papel ng mga magulang bilang co-educators na sumusuporta sa values formation, positibong disiplina, at learner wellbeing sa tahanan.

Nilinaw ni Sec. Angara na may isandaang milyong pisong pondo ang Kaagapay Program na ipinapatupad sa pamamagitan ng parent engagement sessions at advocacy activities upang matulungan ang mga magulang na maunawaan ang asal ng bata, socio-emotional needs, at mga senyales ng bullying o distress.

Binigyang-diin ng kalihim na layon ng Dep-Ed na tiyaking ligtas at suportado ang mga Pilipinong mag-aaral sa loob at labas ng paaralan.

Magkakaroon ng 16 sentavos kada kilowatt-hour ang bawas-singil ang Meralco para sa January billing, bunsod ng pagbaba ng transmission at generation charges gayundin ang presyo sa spot market at contracts.

Batay sa anunsyo ng Meralco, bababa ng 33 pesos ang kabuuang bill sa kuryente para sa mga tipikal na customer na kumo-konsumo ng 200 kilowatt-hour kada buwan; 49 pesos ang bawas sa kumo-konsumo ng 300 kilowatt-hour; 65 pesos sa 400 kilowatt-hour; at 82 pesos sa kada 500 kilowatt-hour.

Umaasa ang kumpanya na makatutulong ito sa mga konsyumer sa pagsisimula ng bagong taon.

Palalakasin pa ng Department of Transportation ang mga operasyon sa mga pangunahing transport hub, kabilang ang Parañaque Integrated Terminal Exchange (PITX).

Ito’y sa harap ng patuloy na pagtaas ng bilang ng mga pasahero, lalo na nitong nakalipas na holiday season.

Ayon sa DOTr, umabot sa 5.69-milyong pasahero ang dumagsa sa PITX nitong Disyembre 2025, kung saan naitala sa panahon ng Pasko at Bagong Taon ang 3.43-milyong mananakay.

Iginiit ni Transportation Secretary Giovanni Lopez na handa ang DOTr at PITX na tugunan ang patuloy na pagdami ng pasahero sa pamamagitan ng sapat na supply ng bus, maayos na terminal operations, at pinaigting na seguridad.

Binigyang-diin ni Sec. Lopez na konektado na ang PITX sa LRT-1 at kasalukuyan nang ginagawa ang bagong EDSA Busway station sa nasabing terminal, na inaasahang magpapabuti pa sa kaligtasan at kaginhawaan ng mga pasahero.