NATIONAL NEWS

Malamig si Senate Minority Leader Aquilino ‘Koko’ Pimentel III na mananatiling patas ang mga senador sa pagboto at desisyon sakaling maiakyat na sa Senado ang impeachment complaint laban kay Vice President Sara Duterte.

Ayon kay Senador Pimentel, dapat tutukan ng publiko ang paglilitis nang sa gayon ay maging husgado rin ang mga ito at makita kung sino ang talagang nagsasabi ng totoo.

Kaugnay nito, sakali aniyang maiakyat sa Senado ang reklamo sa susunod na linggo ay bibigyan nila ng pagkakataon si VP Sara na maipaliwanag ang kanyang panig. - Sa panulat ni Laica Cuevas

Pinaghahandaan na ng Metropolitan Manila Development Authority ang ikakasang kilos-protesta ng Iglesia ni Cristo bilang pagtutol sa impeachment complaint laban kay Vice President Sara Duterte.

Ayon kay MMDA Chairman Romando Artes, nakikipagtulungan na sila sa pulisya at sa local government units, para matiyak na mananatiling passable ang mga kalsada para sa mga motorista.

Makikipag-ugnayan din aniya sila sa organizer ng rally ng religious group upang hindi makaabala ang mga raliyista sa pagmamando sa trapiko.

Samantala, wala pang impormasyon ang MMDA kaugnay sa lokasyon at rutang dadaanan ng kilos-protesta ng INC.  - sa panulat ni Laica Cuevas

Aabot na sa halos apat na libong kandidato para sa 2025 midterm elections ang nagpa-rehistro ng kanilang social media accounts sa Commission on Elections.

Sa datos ng COMELEC, sa nasabing bilang ay dalawampu’t apat ang senatorial bets, halos tatlong libo at walong daan ang local aspirants, habang mahigit isandaan ang kinatawan para sa party-list organizations.

Kaugnay nito, mahigit dalawang libong aspirant din ang nagpasa ng hard copies.

Una nang itinakda ng COMELEC ang deadline para sa registration ng online campaign platforms sa susunod na linggo, a-trese ng disyembre at hindi na ito palalawigin pa.

Batay sa COMELEC Resolution No. 11064, lahat ng official social media accounts na gagamitin ng mga kandidato ay dapat ipa-rehistro sa comelec education and information division sa loob ng isang buwan matapos ang paghahain ng certificate of candidacy. - sa panulat ni Laica Cuevas

Iginiit ni Pangulong Ferdinand Marcos Jr. na sisikapin ng administrasyon na maipamahagi ang lahat ng Certificate of Land Ownership Award o CLOA bago matapos ang kaniyang termino.

Ayon kay Pangulong Marcos, ilang dekada na ang programang pamamahagi ng lupa sa mga magsasaka subalit hanggang ngayon ay nananatili pa ring hindi nasasagot ang suliranin ng mga ito.

Nakakahiya aniya kung hindi nila matatapos ang programa na sinimulan ng kaniyang ama na si dating Pangulong Ferdinand Marcos Sr.

Sinabi ng Pangulo na nais ng kanyang ama na pagmamay-ari na ng mga magsasaka ang kanilang lupang tina-trabaho. - sa panulat ni Laica Cuevas

Mariing iginiit ng Kamara, na walang halong pamumuliitika ang naganap na salu-salo sa Palasyo kung saan, nagsama si Pangulong Ferdinand Marcos Jr. at ang mahigit dalawandaang kongresista.

Ayon kay House Deputy Majority Leader Paolo Ortega V, walang katotohanan ang mga lumalabas na espekulasyon sa mga lider ng bansa.

Simpleng salu-salo lang anya ang naganap sa Malacañang at hindi napag-usapan ang mga inihaing impeachment complaint ng iba’t ibang grupo laban kay Vice President Sara Duterte dahil sa isyu ng hindi tamang paggastos sa confidential funds ng Office of the Vice President at Department of Education.

Iginiit pa ng mambabatas, dalawang taon nang pinaplano ang naturang pagtitipon noong anim na buwan pa lamang nakaupo sa puwesto si PBBM at ngayon lamang ito natuloy na layong palakasin ang pagkakaisa at pagpapakita ng suporta para sa administrasyong Marcos.

Nabatid na nagkaroon ng pambungad na mensahe si House Speaker Martin Romualdez bago iprinisenta ang resolusyon na nagpapakita ng suporta mula sa mababang kapulungan ng kongreso, bilang simbolo ng kanilang pakikiisa sa gitna ng mga banta at hamon ng bansa.

Aminado si Pangulong Ferdinand Marcos Jr. na matagal nang problema ang paggamit ng mga paaralan bilang evacuation centers, na nakahahadlang sa pangunahing layunin ng mga ito na magtaguyod ng pagkatuto at creativity.

Ginawa ni Pangulong Marcos ang pahayag matapos lagdaan ang ligtas Pinoy Centers Act at Student Loan Payment Moratorium During Disasters and Emergencies Act sa Malakanyang.

Tiniyak naman ng Presidente sa Department of Education na ang mga paaralan ay magiging sentro na lamang ng pagpapabuti sa kapakanan ng mga mag-aaral.

Kasabay nito, ipinag-utos ni PBBM sa Department of Public Works and Highways (DPWH) ang agarang pagtatayo ng mga evacuation center sa mga prayoridad na Local Government Units (lgus), alinsunod sa minimum standards, national building code, at iba pang lokal na pangangailangan.

Inatasan din ang Commission on Higher Education (CHED) at Technical Education and Skills Development Authority (TESDA) na magbigay ng lahat ng uri ng tulong sa mga estudyante upang matiyak na ang kanilang mga suliraning pinansyal ay hindi magiging hadlang sa pagtatapos ng kanilang edukasyon.

Samantala, pinasalamatan din ni Pangulong Marcos ang mga mambabatas na aniya’y nasa likod ng dalawang bagong batas, at sinabing ito ay patunay ng kanilang pangakong unahin ang kapakanan ng taumbayan.

Bumaba ang unemployment rate o bilang ng mga walang trabaho sa bansa sa ikatlong quarter ng 2024.

Naitala sa pinakahuling Labor Force Participation survey ng Philippine Statistics Authority ang 3.9% na unemployment rate nuong Oktubre, mas mababa sa 4.7% na naitala nuong Hulyo.

Gayunman, kung ikukumpara ang nasabing datos nuong setyembre, mas mataas ito ng 3.7% unemployment rate o katumbas ng 1.97 million na mga Pilipinong walang trabaho.

Paliwanag naman ni PSA Chief at National Statistician Dennis Mapa, isa sa nakikita nilang dahilan ng pagtaas ng bilang ng mga jobless ay ang pagtama ng magkakasunod na bagyo.

Samantala, umabot naman sa  96.1% ang employment rate o katumbas ng 48.16 milyong Pilipino ang may trabaho o negosyo nuong Oktubre.

Naitala rin sa kaparehong buwan ang 12.6% underemployed o mga manggagawang hindi napapasweldong sapat at nasa trabahong hindi angkop sa kanilang kakayahan.

Aminado si veteran Election Lawyer Romulo Macalintal na nasa kongresista na kung maisusulong ang impeachment complaints laban kay Vice President Sara Duterte.

Sinabi ni Atty. Macalintal sa DWIZ, mas mapapabilis ang pagproseso sa impeachment kung ang mga mambabatas mismo ang maghahain ng isang verified complaint laban sa Bise Presidente.

Naniniwala rin si Atty. Macalintal, na political strategy ni Pangulong Ferdinand Marcos Junior ang paghikayat sa kamara na huwag nang ituloy ang impeachment laban kay Vice President Sara Duterte.