NATIONAL NEWS

“Ang pagiging mapayapa at maunlad ng Pilipinas ang iisang adhikain ng mga “manok” ng PDP-Laban at nina Senador Imee Marcos at Rep. Camille Villar.”

Ito sinabi ni Vice President Sara Duterte matapos i-endorso ang kandidatura nina Senador Marcos at Rep. Villar, bukod pa sa Duter-Ten slate ng PDP-Laban ng kanyang amang si dating Pangulong Rodrigo Duterte.

Nanindigan ang Pangalawang Pangulo na matatag ang kanilang “vission” at sapat upang basagin ang mga pader ng pagkakawatak-watak sa pulitika ng Pilipinas.

Matatandaang kumalas si Senador Marcos sa Alyansa para sa Bagong Pilipinas ng kanyang kapatid na si Pangulong Ferdinan Marcos Jr, ilang araw lang matapos arestuhin si dating Pangulong Duterte.

Idiniin ng Presidential Sister na hindi niya masikmura ang mga naging paglabag sa batas nang tangayin ang former president sa The Hague, Netherlands na naihahalintulad niya rin sa sinapit ng kanyang amang si dating Pangulong Ferdinand Marcos Sr.

Naniniwala si House Deputy Majority Leader at La Union Rep. Paolo Ortega V, na may kaugnayan sa impeachment trial ang pag-endorso ni Vice President Sara Duterte sa mga senatorial candidates.

Kasunod ito ng endorsement ng bise presidente kina Presidential Sister at re-electionist Senator Imee Marcos at House Deputy Speaker Camille Villar bilang mga senatorial candidate na susuportahan.

Iginiit ng kongresista na walang paninindigan si VP Sara batay sa nauna niyang pahayag na hindi niya i-eendorso ang mga kandidatong tumatakbo sa senado at hahayaan niya ang taumbayan na mamili ng kanilang iboboto.

Binigyang diin ng mambabatas na isang political strategy ang ginagawa ni VP Sara para makakuha ng suporta sa senado sa sandaling isalang na sa paglilitis ang impeachment case na kaniyang kinakaharap.

Nangangamba naman ang congressman ortega na maimpluwensyahan ang gagawing paghatol ng mga senatorial judges sa impeachment case sakaling manalo ang mga inendorso ng bise presidente. —sa panulat ni Kat Gonzales mula kay Geli Mendez (Patrol 30)

Iginiit ng Malacañang na ang pagkalat ng fake news ang isa sa posibleng dahilan ng pagbaba ng approval at trust ratings ni Pangulong Ferdinand Marcos Jr.

Ayon kay Presidential Communications Undersecretary Claire Castro, ang 2,400 respondents sa survey ng Pulse Asia ay hindi sumasalamin sa sentimyento ng mahigit 100 milyong Pilipino.

Hindi naman aniya nababahala rito ang pangulo at tuloy lang ito sa pagtatarabaho.

Dagdag pa ni Usec. Castro, nais ng pangulo na matigil na ang pagkalat ng fake news.

Batay sa nasabing survey, bumaba sa 25% ang approval rating ng Pangulo noong Marso, mula sa 42% noong Pebrero.

Pag-aaralan ni Senate Committee on Foreign Relations Chairperson Imee Marcos kung magkakasa pa ng panibagong pagdinig ukol sa naganap na pag-aresto at pagsuko kay dating Pangulong Rodrigo Duterte sa International Criminal Court.

Ayon kay Sen. Marcos, humihirit ng isa pang public hearing ang kanyang mga kasamahan na sina Senators Bato Dela Rosa, Robin Padilla at Alan Peter Cayetano, dahil marami pang dapat na masilip at mapiga sa mga lumabas na impormasyon na hindi pa nabibigyang-linaw.

Kabilang na rito ang impormasyon na noong nakaraang taon pa nakapasok sa pilipinas ang mga tauhan, imbestigador, abogado at security experts ng ICC.

Gayunman, sinabi ng senador na gustuhin man niya na magkasa ng isa pang hearing, hindi niya ito magagawa sa ngayon dahil wala siyang maimbitahang testigo na magbibigay-linaw sa mga lumabas na impormasyon.

Dagdag pa ng Presidential Sister, tatantyahin pa niya kung may maiimbitahang resource person at kung wala, maglalatag muna siya ng findings mula sa nakalipas na pagdinig.—ulat mula kay Cely Ortega-Bueno (Patrol 19)

Kinumpirma ng Philippine National Police-National Capital Region Police Office na bumaba ng 60.18% ang crime rate sa Metro Manila nitong Semana Santa.

Batay sa datos ng NCRPO, sumadsad sa 45 cases ang bilang ng krimen na naganap, mas mababa kumpara nuong 2024 na mayroon 113 insidente.

Kabilang sa mga bumaba ang mga kaso ng murder; rape; theft; at physical injuries.

Mula sa nasabing datos, nabawasan ng 87.5% ang kaso ng murder sa Metro Manila habang bumaba ng 77.78% ang rape cases at 66.67% naman ang ibinaba ng kaso ng physical injuries.

Maliban dito, bumaba rin ang kaso ng pagnanakaw sa 56.36%, gayundin ang carnapping na bumaba ng 75%.—sa panulat ni Alyssa Quevedo

Magiging normal na ang sitwasyon ng mga estudyante at mga guro ngayong ibabalik na sa Hunyo ang pagbubukas ng mga klase sa mga paaralan.

Ito ang inaasahan ni Senate Committee on Basic Education Chairman Sherwin Gatchalian sa harap ng Pagsisimula ng school-year 2025-2026 sa mga pampublikong paaralan sa June 16, 2025.

Ayon kay Gatchalian, inaasahang makakabalik sa normal ang mga estudyante matapos na maapektuhan ang kanilang pagaaral ng COVID-19 pandemic at matinding init ng panahon.

Nanawagan ang Senador sa mga LGUs, tourism establishments at mga healthcare providers na magtulungan para maibigay ang nararapat na medical services sa mga kabataan lalo’t ngayon na nahaharap pa rin tayo sa banta ng init ng panahon kahit tapos na ang klase ng mga estudyante.

Tinukoy ng mambabatas na marami pa rin ang nakabakasyon ngayon at ang mga outdoor activities ay maglalantad sa mga bata sa napakatinding init kaya mahalagang tiyakin ang kanilang kaligtasan.—ulat mula kay Cely Ortega-Bueno (Patrol 19)

Umarangkada na ang taunang Balikatan exercises sa pagitan ng Pilipinas at Amerika.

Sinimulan ang pagbubukas ng pagsasanay sa isang seremonya sa Camp Aguinaldo sa Quezon City.

Pinangunahan ito nina AFP Chief of Staff gen. Romeo Brawner Jr., kasama si DFA Sec. Enrique Manalo at US Ambassador to the Philippines Marykay Carlson.

Nakasentro ang Balikatan exercise o “Shoulder to shoulder” Drills, sa pagpapaigting ng kakayahan ng mga sundalong Pilipino at Amerikano, kung saan tampok sa kauna-unahang pagkakataon ang isang full-battle test.

Nasa 14,000 mga sundalo ang sasabak sa nasabing pagsasanay.—sa panulat ni Jasper Barleta

Hindi na ikinagulat ni House Deputy Majority Leader Paolo Ortega V ng La Union ang pag-endorso ng na-impeach na si Vice President Sara Duterte ng mga kandidato sa pagka-senador, na kung mananalo ay siyang boboto sa kanyang impeachment trial.

Kasunod ito ng pag-endorso ni Vice President Duterte sa dalawang kandidatong tumatakbo sa pagka-senador.

Ayon sa Kongresista, batid naman nilang malapit na ang impeachment trial, kaya natural lang na naghahanap ang pangalawang pangulo ng mga kakampi.

Ang pagbabago anyang ito sa istratehiya ay sumasalamin sa pagiging praktikal sa pulitika ng Bise Presidente.

Tinukoy ng mambabatas na kung noong una ay sinabi ni Duterte na hindi ito mag-eendorso ng kahit sinong tumatakbo sa Senado pero ngayon nagbago na ang ihip ng hangin.

Ipinunto ng House Leader na ang ganitong pagbabago ay mistulang pinagplanuhan, lalo’t nalalapit na ang impeachment trial sa mataas na kapulungan ng kongreso kung saan nakasalalay ang karera sa pulitika ng bise presidente.—ulat mula kay Geli Mendez (Patrol 30)