NATIONAL NEWS

Tiniyak ni ARTA Director General Ernesto Perez na kaya nilang aksyunan sa loob ng bente kwatro oras ang anumang reklamong ihahain sa kanilang tanggapan.

Sa palace briefing, sinabi ni Director General Perez na kaya nilang panindigan ang mabilis na aksyon at patunay dito ang datos ng kanilang resolution rate.

Mula aniya noong 2018 hanggang nitong March 2025, nakapagtala sila ng 99.7% na resolution rate mula sa halos 26,000 reklamo.

Kaugnay nito, mas paiigtingin aniya nila ang pagdinig sa mga reklamo ng taumbayan, sa pamamagitan ng ilulunsad na Electronic Complaints Management System na gagamitan ng artificial intelligence.

Sa ilalim nito, magiging 24/7 na ang pagtanggap ng mga reklamo, na maaaring iparating sa numerong 8888 o hotline 12782.—ulat mula kay Gilbert Perdez (Patrol 13)

Kumpyansa ang Philippine Statistics Authority na posible pa ring mapanatili ang mababang inflation rate sa mga susunod na buwan kung magpapatuloy ang pagbaba ng presyo ng bigas, na isa sa mga pangunahing salik sa pagbagal ng inflation sa bansa.

Ayon kay Assistant National Statistician Rachel Lacsa ng PSA Economic Sector Statistics Service, simula noong Enero, naitala na ang tinatawag na ‘negative inflation’ sa bigas, na nangangahulugan na mas mababa na ang presyo nito, kumpara sa kaparehong panahon noong 2024.

Isa sa mga itinuturong dahilan nito ang pagpapatupad ng pamahalaan ng maximum suggested retail price na nasa 45 pesos kada kilo.

Naniniwala naman ang psa na may malaking epekto ang ginawang hakbang ng pamahalaan upang mapabagal ang inflation sa bigas.

Lumobo sa P16.68 trillion pesos ang kabuuang utang ng Pilipinas sa pagtatapos ng buwan ng Marso.

Ayon sa Bureau of the Treasury, mas mataas ito ng 0.31 percent mula sa P16.63 trillion pesos na utang ng bansa noong Pebrero.

Sa kabuuang utang, 68.2% o P11.38 trillion pesos ang domestic debt, habang 31.8% o P5.30 trillion pesos ang external debt.

Sa kabila nito, tiniyak ng ahensya na nananatiling manageable ang utang ng Pilipinas.

Inirekomenda ni Senate President Chiz Escudero na bawian ng lisensya ang mga “Kamote” Driver na masasangkot sa road rage at iba pang vehicular accidents.

Giit ng Senate President, hindi sapat ang ipinapataw na suspensyon ng Land Transportation Office sa mga lumalabag sa batas sa lansangan, kaya dapat lamang na bawian ng lisensya ang mga ito at hindi lamang basta suspendihin.

Nananatili aniyang pangunahing sanhi ng mga aksidente sa kalsada ang kawalan ng disiplina.

Dagdag pa ni SP Escudero, nauuso na rin ang content sa social media ng mga kamote driver, ngunit hindi aniya ito nakakatawa o nakakaaliw, dahil perwisyo lamang ang dulot nito, na minsan ay nauuwi pa sa karahasan.

Kaugnay nito, binigyang diin ng Lider ng Senado na kailangang magpatupad na ng drastic measures o mahigpit na hakbang para maibalik ang kaayusan sa kalsada.—ulat mula kay Cely Ortega-Bueno (Patrol 19)

Umabot na sa nasa tatlong milyong piso ang halaga ng naitalang pinsala ng Department of Agriculture kasunod ng pagputok ng bulkang Bulusan.

Batay sa inilabas na assessment report ng D.A.-DRRM Operations Center, katumbas ito ng halos 26 na ektaryang high value crops o production loss na mahigit 100 metriko tonelada.

Kaugnay nito, tiniyak ng D.A. na tuloy-tuloy pa rin ang kanilang pag-alalay sa mga apektadong residente sa nasabing lugar. —sa panulat ni Mark Terrence Molave

Inatasan ng Ombudsman ang limang matataas na opisyal ng pamahalaan na magsumite ng kanilang counter-affidavit kaugnay ng pag-aresto kay dating Pangulong Rodrigo Duterte.

Kabilang na rito sina Justice Sec. Boying Remulla, Interior Sec. Jonvic Remulla, CIDG Chief Gen. Nicolas Torre III, PNP Chief Gen. Rommel Marbil, at Special Envoy on Transnational Crime Amb. Markus Lacanilao.

Nag-ugat ito sa isinumiteng Senate Committee on Foreign Relations report ni Sen. Imee Marcos na nagrerekomendang hainan ng administrative at criminal charges ang ilang opisyal dahil sa pagkakasangkot sa pag-aresto sa dating pangulo.

Binigyan naman ng sampung araw ang mga nabanggit na opisyal para magsumite ng kanilang counter-affidavit at iba pang dokumento.

Iimbestigahan at i-aaudit ng new NAIA Infra Corp. Ang lahat ng security bollard sa Ninoy Aquino International Airport.

Ayon NNIC, aalamin sa nasabing imbestigasyon kung dapat bang i-upgrade ang mga nakalagay na bollards na ikinabit nuong 2019.

Kaugnay nito, pinag-aaralan na ng kumpanya na baguhin ang diagonal passenger drop-off layout sa terminals 1 at 2 departure areas para maging mas ligtas at parallel unloading configuration.

Tiniyak ng NNIC na nakatuon sila sa pagbibigay ng karagdagang safety measures para maging ligtas ang mga pasahero; well-wishers at  airport staff.

Matatandaang inararo ng isang SUV ang departure area ng terminal 1 at dalawa katao ang namatay sa insidente.—sa panulat ni Kat Gonzales

Sisimulan na ng Philippine National Police bukas, Mayo 8 ang full deployment ng mga tauhan nito bilang bahagi ng pagpapanatili ng seguridad sa hahalan.

Ayon kay PNP Chief General Rommel Francisco Marbil, nasa crucial part na sila ng preparasyon para sa eleksyon.

Kasabay anya ng deployment, mag-iinspeksyon na rin ang mga regional director sa kani-kanilang mga unit bilang bahagi naman ng kapanyang ‘kontra-bigay’ ng pamahalaan.

Kasabay nito, hinikayat ng Hepe ng pambansang pulisya ang lahat ng pulis na manatiling apolitical at maging patas sa kanilang pagpatupad ng tungkulin.—sa panulat ni Kat Gonzales

All systems go na ang Commission on Elections para sa 2025 midterm elections sa susunod na linggo.

Ayon kay COMELEC Chairman George Erwin Garcia, halos nasa 100% na ang delivery ng mga automated counting machines.

Kaugnay nito, sinimulan na rin ang pagdedeliver sa huling batch ng mga official ballots sa Metro Manila.

Paliwanag ng Poll Body Chief, una nang naipamahagi ang mga balota para sa ibang rehiyon sa bansa.

Nabatid na Linggo, Mayo 11, hanggang Lunes ng umaga, Mayo 2, ipamamahagi ang balota sa mga voting precints at pangangasiwaan ito ng mga electoral board member.—sa panulat ni Kat Gonzales