NATIONAL NEWS

Tiniyak ni Lanao Del Sur rep. Zia Alonto Adiong na hindi pipilitin ng kamara si Vice President Sara Duterte na humarap sa budget hearing ng Office of the Vice President para sa 2026.

Kasunod ito ng pahayag ni VP Sara na nagsabing hindi siya magrerekomenda ng malaking budget ng OVP para sa taong 2026.

Ayon kay Rep. Adiong, igagalang ng Kamara, sakaling magpasya ang bise presidente na kanyang mga opisyal na lamang ang humarap sa budget deliberation ng kanyang tanggapan.

Naniniwala ang mambabatas na lalo lamang makikita ng publiko ang pagiging immature ni VP Sara sa oras na mangyari ito.

Binigyang diin ng mambabatas, na ayaw niya ring napapahiya ang kanyang tanggapan bilang siya ang tumatayong sponsor ng 2025 OVP budget.

Nabatid na lumikha ng kontrobersiya ang pag-isnab ng bise presidente sa mga budget hearing ng kamara na nagdulot ng 1.3 billion pesos na pagkaltas sa pondo ng OVP at inilipat bilang pandagdag sa budget ng Department of Social Welfare and Development at Department of Health.

—ulat mula kay Geli Mendez (Patrol 30)

Sang-ayon si House Impeachment Prosecutor Spokeman Atty. Antonio Audie Bucoy sa  pahayag ni dating Supreme Court Chief Justice Reynato Puno na posibleng nagkaroon ng pag-abuso ang senado sa ilalim ng pamumuno ni Senate President Francis “Chiz” Escudero kaugnay sa paghawak sa impeachment case ni Vice President Sara Duterte.

Ayon kay Atty. Bucoy, ang kaniyang pagpabor sa pahayag ni dating Chief Justice Puno ay nakabase sa konstitusyon dahil aniya ang mga naging aksyon at desisyon ni SP Escudero, bilang presiding officer ng Impeachment Court ay wala sa Saligang Batas.

Partikular na ang pag-remand o pagpapabalik sa kamara ng articles of impeachment ng Senado.

Paliwanag ni Atty. Bucoy, ang pag-remand ay maaari lang gawin sa mababang korte at hindi angkop sa Impeachment Court.

Sa kasalukuyan, isinasailalim na aniya ng mga law experts sa pagsusuri ang mga kilos ng Senado, kabilang na ang Philippine Constitution Association (PHILCONSA) kung siya ang chairman.

—ulat mula kay Geli Mendez (Patrol 30)

Karamihan sa mga Pilipino ang hindi sang-ayon sa ginawang hakbang ng Senado na ibalik sa kamara ang articles of impeachment laban kay Vice President Sara Duterte.

Batay ito sa  mobile-based survey na isinagawa ng Tangere, kung saan 57% ng mga respondent ang tutol sa nasabing hakbang ng senado, 20% naman ang pabor dito, habang 23% ang undecided.

Naitala ang pinakamataas na disapproval sa Luzon, partikular na sa Metro Manila, Southern Luzon, Central Luzon, at Northern Luzon.

Habang karamihan naman sa mga suportado ang aksyon ng senado ay mula sa balwarte ng mga Duterte na Davao at Northern Mindanao.

Sa mga bumotong tutol sa ginawa ng Senado, 23% ang naniniwalang paglabag ito sa konstitusyon, 22% naman ang nagsasabing paraan ito para maantala ang impeachment proceedings;

25% naman ang naniniwala na inosente si VP Sara ngunit nais nilang mabigyan ng pagkakataon ang pangalawang pangulo na depensahan ang kanyang sarili sa pamamagitan ng full impeachment trial.

Isinagawa ang survey sa 1,200 respondents sa buong bansa nitong June 16 hanggang 17.

—sa panulat ni John Riz Calata

Nanawagan sa publiko at sa senado ang bagong Tagapagsalita ng House Prosecution Panel na si Atty. Antonio “Audie” Bucoy, na ituring bilang  legal na proseso at pambansang pagsubok ng moral na pananagutan ang impeachment trial ni Vice President Sara Duterte.

Binigyang diin ni Atty. Bucoy ang bigat at makasaysayang impeachment case na nakabinbin ngayon sa senado.

Aniya, ito ang kauna-unahang pagkakataon sa kasaysayan ng Pilipinas na isa sa may pinakamataas na posisyon sa gobyerno ay sinampahan ng kaso kaugnay ng sinasabing pagkontrata ng isang suspect para ipapatay sina Pangulong Ferdinand Marcos Jr.; First Lady Liza Araneta Marcos; at House Speaker Martin Romualdez.

Nilinaw ni Atty. Bucoy na sa gaganaping impeachment trial ay hindi lang ang pangalawang pangulo ang nasasakdal kundi ang institusyon ng senado bilang isang impeachment court.

Inaasahan magsisimula ang impeachment trial laban sa bise presidente sa mga susunod na linggo.

—ulat mula kay Geli Mendez (Patrol 30)

Tutol si outgoing Senate Minority Leader  Aquilino ‘Koko’ Pimentel III sa mga panawagan na mag-inhibit ang ilang senador sa impeachment trial ni Vice President Sara Duterte dahil sa sinasabing political biases.

Ayon kay Sen. Pimentel, maaaring si VP Sara ang magbenepisyo sakaling may mga senator-judges  na mag-inhibit dahil 2/3 votes o 16 na boto aniya ang kailangan para ma-convict o mahatulang guilty ang bise presidente.

Kaya sinabi ng Senador na mas mainam na manatili ang senator-judges hanggang sa dulo o hanggang sa pagbobotohan nila kung  guilty o not guilty ang pangalawang pangulo  at pagkatapos hayaan ang taumbayan na  humusga sa magiging desisyon ng bawat senador

—ulat mula kay Cely Ortega-Bueno (Patrol 19)

Iginiit ni outgoing Senate Minority Leader Aquilino ‘Koko’ Pimentel III na dapat ay ‘hands off’ o hindi dapat makialam si Pangulong Ferdinand Marcos Jr. sa impeachment  case  ni Vice President Sara Duterte.

Ayon kay Senador Pimentel, alinsunod sa ilalim ng  Article 11 ng konstitusyon, patungkol sa impeachment at accountability ng public officials, walang nakasaad na may gagampanang papel ang pangulo sa impeachment process dahil siya mismo ay impeachable official.

Kaya naman hirit ng senador, huwag nang mamagitan ang pangulo sa banggaan ng senado at kamara kaugnay ng impeachment process.

Tama anya na hindi nagbibigay ng anumang  pahayag si Pangulong Marcos at kung meron man, wala dapat aniya itong mabigat na impluwensya sa mga senator-judges.

—ulat mula kay Cely Ortega-Bueno (Patrol 19)

Muling ibinabala ni Philippine National Police Chief General Nicolas Torre III na kanyang sisibakin ang mga pulis na bigong magbawas ng timbang sa loob ng isang taon.

Ayon kay Gen. Torre, ang hakbang na ito ay alinsunod sa section 30 ng Republic Act no. 6975 na nagsasabing ang mga miyembro at opisyal ng PNP ay hindi dapat kumulang o lumagpas ng limang kilo mula sa itinakdang standard weight para sa mga pulis, base sa kanilang tangkad, edad, at kasarian nito.

Sinabi ng Hepe ng pambansang pulisya na ang sinumang pulis na hindi makakasunod sa standard weight ay bibigyan ng anim hanggang isang taon para ma-normalize ang timbang nito.

Habang ang mga pulis naman na may medical conditions ay posibleng maharap sa “complete disability discharge” o ilipat sa administrative work.

Nauna nang ipinag-utos ni Gen. Marbil sa mga pulis na panatilihin ang malusog na pangangatawan dahil posible itong makaapekto sa kanilang promosyon.

—sa panulat ni John Riz Calata

Binanatan ni Vice President Sara Duterte ang mga business groups na kumakalampag sa Senado upang agad nang simulan ang impeachment trial laban sa kanya upang maipakita anila ang accountability at rule of law sa bansa.

Ayon kay VP Sara, mayroon man o walang impeachment ay wala na talagang investor confidence kaya huwag aniya siyang gawing rason sa pangit na takbo ng ekonomiya ng Pilipinas.

Hinamon din ng Bise Presidente ang mga business group na kung nais ng mga ito ng accountability, magsampa ang mga ito ng kaso sa mga korte.

Nabatid na kamakailan lamang ay naglabas ng magkakahiwalay na pahayag ang Makati Business Club, Financial Executives of the Philippines, at iba pang business groups na nagsasabing ang pagtanggi ng senado na ipagpatuloy ang impeachment trial ni VP Sara ay makaaapekto sa ekonomiya ng bansa.