NATIONAL NEWS

Tinanggap narin ni legal counsel na si Sen. Kiko pangilinan ang naging resulta ng canvassing sa boto ng presidente at bise presidente.

Matatandaang nangunguna sa proseso ng bilangan ng mga boto si presumptive vice president Sara Duterte na kalaban ni Pangilinan sa nasabing posisyon.

Sa ngayon, patuloy pa ring nangunguna sa canvassing ang UniTeam tandem na sina presumptive president Ferdinand “Bongbong” Marcos Jr. at presumptive vice president at Davao City Mayor Sara Duterte-Carpio.

Wala namang naiulat na aberya ang National Board of Canvassers (NBOC)-Congress hinggil sa ginagawang bilangan at pagtutugma ng mga boto.

Pumalo na sa 100K ang kabuuang bilang ng mga turistang bumisita sa Palawan.

Ayon sa Palawan Provincial Tourism officer Maribel Buñi, unti-unti nang bumabalik ang sigla ng turismo ng Palawan matapos luwagan ang travel restrictions sa mga turista.

Sinabi ni Buñi na nasa labing limang flights na ang naitala papuntang Palawan at inaasahang mas dadami pa ito para mabawi ang nalugi sa kanilang turismo.

Sa ngayon, nananatili sa Alert level 2 ang Palawan bilang tulong sa muling pagbangon ng ekonomiya ng bansa.

Para sa mga nais magbakasyon sa Palawan, kinakailangan lamang iprisinta ang vaccination card ng isang indibidwal o turista.

Nilinaw ng Department of Health (DOH) na walang kinalaman ang bahagyang pagtaas ng kaso ng COVID-19 sa Pilipinas mula noong buwan ng Abril.

Ayon kay Dr. Alethea De Guzman, Officer-in-Charge ng DOH Epidemiology Bureau, karaniwang dahilan kung bakit tumataas ang kaso ng infection ay ang paggalaw ng mga tao dahil sa mas maluwag na restriksiyon sa bansa.

Sinabi ni De Guzman na hindi man ito magdudulot ng severe symptoms, madali parin itong makahawa dahilan ng mataas na admission sa mga ospital.

Samantala, nananatili man sa low risk category ng COVID-19 ang bansa, hindi parin dapat maging kampante ang publiko at dapat ay nasusunod parin ang COVID-19 health protocols.

Nanawagan sa publiko ang Malacañang na sundin ang minimum public health standards kasunod ng banta ng monkeypox virus.

Ayon kay Acting Presidential Spokesperson at Presidential Communications Operations Office (PCOO0) Secretary Martin Andanar, hindi dapat magpakampante ang publiko dahil mayroon nang mga kaso ng naturang virus sa ibang bansa.

Sinabi ni Andanar na pinaigting na ng Department of Health (DOH) ang 4-door strategy gayundin ang screening process sa mga border ng Pilipinas upang maiwasan ang pagpasok ng monkeypox.

Una nang nilinaw ng mga eksperto na ang monkeypox virus ay hindi gaanong delikado kung ikukumpara sa ibang virus dahil nasa 1% lamang ang fatality rate nito.

Iginiit ni Andanar na mahalaga parin ang pagtalima sa minimum public health standards dahil nananatili pa rin ang banta ng COVID-19.

Nasabat ng mga tauhan ng Philippine Drug Enforcement Agency (PDEA) Regional office 4-A sa isang drug suspect ang aabot sa mahigit P3.4-M halaga ng iligal na droga sa Pasay City.

Kinilala ang na si Norhidin Medted Gadi, 28-anyos na nakuhanan ng 500 grms ng hinihinalang shabu na nagkakahalaga ng P3, 450, 000.

Nakuha sa suspek ang isang Toyota Coaster na ginamit sa pagdala o pagdeliver ng mga shabu.

Nahaharap ngayon sa kasong paglabag sa Republic Act 9165 o Comprehensive Dangerous Drugs Act of 2002 ang inarestong suspek.

Patay ang isang rider habang sugatan naman ang 12 pa sa karambola ng tatlong sasakyan sa Antipolo, Rizal.

Kinilala ang nasawing rider na si Erwin Dela Cruz na agad isinugod sa Quirino Medical Center pero agad ding binawian ng buhay dahil sa natamong mga sugat sa ibat-ibang bahagi ng kaniyang katawan.

Base sa imbestigasyon ng mga otoridad, sakay ng isang Yamaha Mio Aerox si Dela Cruz at binabaybay ang Marcos Highway, malapit sa Unirock, Brgy. Sta. Cruz nang mag overtake ang isang Kawasaki Barako II na may sidecar nang mag-overshoot ito sa linya kung nasaan ang nasawing biktima.

Nabangga din ang isang Airport Taxi na Toyota Vios na may plakang ACG-5533 na may mga sakay na pasahero.

Sa ngayon, nagpapagaling na sa ospital ang iba pang mga biktima habang inaalam pa ng mga otoridad kung sino ang responsable matapos ang aksidente.

Nakatanggap ng ayuda ang mga pamilyang nawalan ng tirahan matapos maitala ang sunog sa isang residential area sa Pandacan, Maynila.

Ayon sa mga tauhan ng Manila Bureau of Fire of Protection (BFP), umabot sa 10 bahay ang nilamon ng apoy dakong alas- 5:24 ng madaling araw sa ikalawang palapag na tahanan na matatagpuan sa 1230 Maaliwalas Kahilum 2 St., sa nabanggit na lungsod.

Umabot pa sa ikalawang alarma ang sunog bago tuluyang naapula dakong alas- 6:26 ng umaga.

Wala namang naiulat na nasawi o nasugatan pero tinatayang aabot sa P100, 000 ang halaga ng danyos na naabo sa sunog.

Patuloy pang iniimbestigahan ng mga otoridad ang pinagmulan ng sunog.

Pumalo na sa 90% ang kabuuang bilang ng mga gurong nakatanggap ng honoraria na naging miyembro ng Electoral Boards noong May 9, elections.

Ayon kay Teopisto Elnas, COMELEC Deputy Director for Operations, alinsunod sa batas, mayroon lamang 15 araw ang kanilang ahensya para magawa ang kanilang obligasyon.

Sinabi ni Elnas na maari pang makatanggap ang mga guro na hindi pa nakakakuha ng kanilang honorarium kahit lampas sa deadline hanggang sa hindi pa umaabot sa 100% ang status sa kanilang honoraria.

Sa ngayon, wala pang desisyon ang COMELEC kung kailan ibibigay ang karagdagang honoraria na nagkakahalaga ng P2K para sa mga gurong nagsilbi nang lampas sa karaniwang oras ng trabaho.

Inihayag ng National Water Resources Board (NWRB) na posibleng tumaas ang antas ng tubig sa mga dam partikular na sa Angat Dam na nagsusuplay ng tubig sa buong Metro Manila.

Ito ay dahil sa La Niña phenomenon o ang patuloy na pagbuhos ng ulan sa Metro Manila at ibang lugar sa bansa.

Ayon kay NWRB Executive Director Sevillo David, mas mataas pa sa normal water level ang inaasahan ngayong taon batay na rin sa abiso ng PAGASA.

Ayon kay David, kailangang naka-alerto ang lahat ng mga nangangasiwa ng mga dam at mga lokal na pamahalaan upang maging ligtas ang mga residenteng maaapektuhan ng pagbaha.