NATIONAL NEWS

Pumalo na sa 2,000 ang naiturok na COVID-19 vaccine ng pamahalaan kada araw.

Mas mataas ito kumpara sa 100,000 daily jabs na nagagawa ng gobyerno noong kasagsagan ng election period.

Sinabi ni health undersecretary Myrna Cabotaje, umakyat na rin sa higit 171, 000 ang bilang ng mga indibidwal na nakatanggap na ng second booster dose mula nang binuksan ito sa healthcare workers at senior citizen.

Sa ngayon aniya nasa mahigit 69 million na ang mga Pilipino na fully vaccinated na laban sa COVID-19.

Ipapaubaya na sa susunod na administrasyon kung lilikha ng panibagong ahensiya kapalit ng Inter Agency Task Force o itutuloy lang nito ang kasalukyang structure task force.

Ayon kay DOH undersecretary Myrna Cabotaje, naghihintay lamang sila ng direktiba mula sa Marcos administration sa pamamagitan ng itatalaga nitong bagong kalihim.

Ani Cabotaje, handa umano silang i-turn over ang lahat ng mga dokumento na may kinalaman sa COVID response ng Duterte administration.

Maliban dito, preparado na din sila na magbigay ng detalyadong impormasyon sa kung sinoman ang susunod na health secretary na magsisilbing overall in charge sa pagtugon ng pamahalaan sa COVID-19 pandemic.

Inaasahan ng Population Commission na posibleng tumaas ang maitatalang bilang ng mga isisilang na sanggol bunsod ng muling pagdami ng mga ikinakasal sa bansa.

Ayon kay Population and Development Undersecretary Juan Antonio Perez III na bumagsak ito sa 50% noong kasagsagan ng pandemya.

Pero sa kabila ng inaasahang pagtaas sa bilang ng mga ipinapanganak ngayong taon ay siyang pagtaas din ng bilang ng mga ikinakasal.

Sinabi pa ni Perez na hindi nila nakikitang kasing taas noong pre-pandemic dahil marami na ang nagpa-family planning dahil sa economic crisis sa bansa.

Isang hamon sa susunod na administrasyon ang malawakang gutom at ang pagtaas ng presyo ng mga bilihin sa merkado.

Ito ay ayon kay senator Francis “Kiko” Pangilinan dahil hindi lang aniya presyo ng gasolina ang apektado ng kasalukuyang giyera sa pagitan ng Russia at Ukraine dahil malaking problema ito sa food security sa ating bansa.

Binanggit din ni Pangilinan ang inilabas na ulat ng UN Food and Agriculture Organization kung saan itinigil na muna ng dalawang bansa ang pag-e-export ng wheat at corn.

Dahil dito, iminungkahi ni Pangilinan sa susunod na administrasyon na tutukan ang problema ng gutom sa pamamagitan ng pagpapatibay sa sektor ng agrikultura sa bansa.

Mananatili ang National Capital Region (NCR) at ilang lugar sa bansa sa Alert level 1 mula 1 hanggang 15 ng Hunyo.

Ayon kay deputy presidential spokesperson Kris Ablan, nakasailalim ito sa Inter Agency Task Force (IATF) resolution 168-A.

Maliban sa Metro Manila, nakasailalim rin sa Alert level 1 ang Abra,  Ilocos Norte, Batanes, Aurora, Bataan, Bulacan, Nueva Ecija, Pampanga, Tarlac, Angeles City, Olongapo City, Batangas, Cavite, Laguna, Rizal, Lucena City, Marinduque, Albay, Aklan, Siquijor, Biliran, Zamboanga City, Bukidnon, Iligan City, Surigao Del Sur, At Butuan City.

Sa ilalim ng Alert level 1, pinapayagan na rin ang intrazonal at interzonal travel sa mga may comorbidities man o wala.

Maaari na rin mag-operate ng full on-site capacity ang mga establisimyento sa ilalim ng minimum public health standards.

Inihirit na ng Department of Agriculture (DA) ang pagpapalabas ng dagdag na 6 bilyong piso para sa fertilizer subsidy sa mga magsasaka.

Ayon kay DA secretary William Dar, ang nasabing pondo ay para magamit at maidagdag sa wet season farming mula sa kasalukuyang tatlong bilyong piso hanggang siyam na bilyong piso.

Sa kabuaan aniya naglaan ang ahensya ng 20 bilyong piso ngayong taon para ma subsidize ang gastos ng mga pataba.

Samantala, tutukuyin naman ng DA ang mga benepisyaryo sa pamamagitan ng mga pangalang nakalista sa farmer’s registry ng DA.

Aprubado na sa ikatlo at huling pagbasa ng senado ang panukalang batas na magdedeklara sa August 12 ng kada taon bilang National Youth Day.

Nakasaad sa naturang panukala na aatasan ang  National Youth Commission (NYC), sa pakikipagtulungan sa Department of the Education (DepEd), Commission on Higher Education (CHED), Technical Education and Skills Development Authority (TESDA), Sangguniang Kabataan (SK), National Union of Students of the Philippines (NUSP), at iba pang youth organizations na magpatupad ng aktibidad para sa mga kabataan.

Hinihikayat rin ang mga paaralan at mga unibersidad na magsagawa ng iba’t ibang programa gaya ng leadership training, youth empowerment, workshops at community activities bilang paggunita ng National Youth Day.

Samantala, inaprubahan na rin ang  panukalang mag-iinstitutionalize ng pagsasagawa ng summer youth camp sa bawat barangay sa bansa.

Inihayag ng Philippine Statistics Authority (PSA) na bahagyang tumaas ang stock ng bigas at mais sa bansa noong Abril.

Ipinabatid ng PSA na noong Abril 1 ay naitala nila ang 2.5% o hanggang 2.5 milyon metric tons kumpara sa 2.4 milyon metric tons noong 2021.

Habang dumami naman ang mga suplay ng bigas sa mga commercial warehouses habang bumagsak naman ang bilang ng mga kabahayan na bumibili ng bigas mula sa National Food Authority (NFA).

Sumipa naman sa 8.9% o katumbas ng 777,370 metric tons ang suplay ng mais kumpara sa 713,680 metric tons noong Abril 2021.