NATIONAL NEWS

Lumarga na ang national flag week sa ilang makasaysayang lugar sa Pilipinas simula Mayo 28 hanggang Hunyo a-12 o sa mismong araw ng kalayaan.

Ayon sa National Historical Commission of the Philippines (NHCP), binihisan ng kulay watawat at kinabitan ng bandila ang historical places tulad ng Aguinaldo Shrine sa Cavite, Barasoain Church sa Bulacan at Rizal Shrine sa Laguna.

Bahagi ang programa ng “Salute to a clean flag” na layong imulat ang mga kabataan sa kahalagahan ng pag-iingat sa bandila.

Alinsunod sa National Flag and Heraldic Code of the Philippines, bawal gawing damit, mantel o iba pang hindi angkop na paggamit ang mga lumang watawat ng Pilipinas dahil may tamang paraan ng disposal dito.

Hinimok naman ng NHCP ang lahat na bisitahin ang historical sites sa bansa na libre kung daraan sa online booking at magpapakita ng vaccination card.

Nagsimula na umanong mag-impake ng personal na gamit si Pangulong Rodrigo Duterte sa Malakanyang bilang preparasyon sa pagbabalik sa Davao City.

Ito’y sa gitna nang napapalapit na pagtatapos ng termino ng pangulo sa Hunyo 30.

Ayon kay Senador Christopher “Bong” Go, nagsisimula nangmagligpit ng mga gamit si Pangulong Duterte upang dalhin pauwi sa kanilang bahay sa naturang lungsod.

Doon na anya mananatili ang punong ehekutibo sa kanyang retirement bilang private citizen kapiling ang kanyang pamilya sa oras na matapos ang termino sa Hunyo 30.

Bagaman aminado ang senador na nakalulungkot na patapos na ang termino ng pangulo, masaya na rin ang siya dahil makapagpapahinga na rin ito matapos ang halos anim na taon sa panunungkulan.

Nito lamang Sabado ay namataan sina Pangulong Duterte at Senator Go na nagmo-motorsiklo at nag-ikot sa Davao.

Pansamantalang mawawalan ng tubig simula ngayong araw hanggang Hunyo a-4 ang ilang lugar sa Metro Manila, Cavite at Bulacan.

Ayon sa Maynilad, apektado ng water interruption ang Barangay Mambog 5, Palico 4, Perpetual Village 7 sa Bacoor, Cavite at maraming Barangay sa Caloocan; Potrero, Malabon; Navotas; Quezon at Valenzuela City maging sa Meycauayan, Bulacan.

Ipatutupad ang water interruption tuwing alas-12 ng hatinggabi gabi hanggang alas-4 ng madaling araw.

Inabisuhan naman ng Maynilad ang mga maaapektuhang customer na mag-imbak ng tubig para may magamit sa araw na walang suplay.

Ang maintenance activity ng Maynilad ay naglalayong pahusayin pa ang water services sa West Zone.

Arestado ng mga otoridad ang tatlong indibidwal sa ikinasang buy-bust operation ng mga tauhan ng District Drug Enforcement Unit-Southern Police District (DDEU-SPD) sa Pasay City.

Kinilala ang mga inaresto na sina Maichang Dela Cruz Yamane alyas ‘’Tomboy’’, 29-anyos; Maureen Flores Lacson, 35-anyos; at Gertrics Barias Demanarig, 31-anyos na mga residente ng nasabing lungsod.

Ayon kay SPD Director Brig. Gen. Jimili Macaraeg, nakatanggap sila ng report mula sa isang concerned citizen hinggil sa iligal na gawain ng mga suspek dahilan para isailalim sila sa surveilance operation.

Narekober sa mga suspek ang 28 gramo ng shabu na may street value na P190,400, isang kalibre .22 pistola na kargado ng 7 bala, coin purse, sling bag at ang P500 buy-bust money na ginamit sa operasyon.

Sa ngayon itinurn-over na sa SPD Forensic Unit ang mga iligal na droga para sa chemical analysis habang ang mga narekober na baril naman ay isasailalim sa ballistics examination.

Kasong paglabag sa Sections 5 at 11 sa ilalim ng Art II ng RA 9165 at RA 10591 ang isasampang kaso laban sa mga suspek na kasalukuyang nakapiit sa SPD Custodial Facility.

Nagpatupad ang Department of Health (DOH) central office ng Environmental Sanitation Program sa Dipolog, Zamboanga del Norte.

Kasunod ito ng ikinasang “Ocular visit” kamakailan ng ilang tauhan mula sa DOH upang hikayatin ang mga residente sa tamang sanitation sa loob at labas ng kanilang bahay sa pamamagitan ng pagkakaroon ng malinis na palikuran.

Layunin ng DOH na magkaroon ng malinis at maayos na pamamaraan ang mga residente upang maiwasan ang iba’t ibang uri ng sakit na maaaring makuha mula sa dumi na gawa ng mga tao.

Sa ngayon, patuloy na nagsasagawa ng monitoring sa bawat kabahayan ang Lokal na Pamahalaan ng Dipolog upang masigurong nasusunod ang ipinapatupad na Ordinansang 123 kung saan isinusulong nito ang kalinisan sa lungsod.