NATIONAL NEWS

Nakipagkita na si outgoing Vice-President Leni Robredo sa transition team ni Vice President – elect Sara Duterte Carpio kahapon.

Naganap ito sa Quezon City Reception House at Ben-Lor Building kung saan sinamahan ni Robredo si Duterte sa paglilibot sa opisina ng Office of the Vice President (OVP).

Ang QCRH ang naging tanggapan ni Robredo habang ang Ben-Lor Building ang nagsisilbing opisina ng mga administrative unit niya.

Muli namang tiniyak ni VP Leni na sa pagkikita ay handa na siya at ang buong OVP Team sa anumang kakailanganing tulong ng susunod na administrasyon.

Opisyal na mauupo bilang bagong Bise presidente ng Pilipinas si Duterte sa Hunyo a-30 dakong alas-12 ng tanghali.

Umabot na sa mahigit 1M magsasaka ang nakinabang sa libreng irigasyon ng pamahalaan.

Ito ay matapos maging isang ganap na batas noong 2018 ang Free Irrigation Service Act.

Ayon kay Department of Agriculture Assistant Secretary Noel Reyes, katumbas ang nakinabang ng 1.1M ektarya ng lupang agrikultural.

Mula 2016 hanggang 2021, nasa mahigit 300,000 ektarya o 7.95% ang nadagdag na lupain na napapatubigan ng pamahalaan.

Sa kabuuan, aabot na sa mahigit 2M ektarya ng lupain ang napatubigan ng pamahalaan na katumbas ng 64.28% na Irrigation Development.

Isa sa legasiyang iiwanan ni Pangulong Rodrigo Duterte sa Pilipinas ay ang patubig sa mga sakahan.

Sinuportahan ng Estados Unidos ang paghahain ng diplomatic protest ng Pilipinas laban sa fishing ban na ipinatupad ng China sa bahagi ng West Philippine Sea.

Ayon kay US State Department Spokesperson Ned Price, salungat sa 2016 arbitral tribunal ruling at international law na nakasaad sa United Nations Convention on the Law of the Sea ang Unilateral Fishing Moratorium ng China sa disputed territorial water.

Dahil dito, nanawagan ang opisyal sa China na sumunod sa obligasyon sa ilalim ng international law.

Matatandaang noong Martes ipinatawag ng bansa ang chinese diplomat kasunod ng anunsiyong unilateral fishing ban at umano’y harrassment ng isang Chinese Coast Guard Ship sa mga Pilipinong mangingisda.

Tiwala si Incoming Finance Secretary Benjamin Diokno na 1 sa 10 Pilipino na lamang sa Pilipinas ang naghihirap sa 2028.

Ito ay ang taon kung saan magtatapos ang pamumuno ni President-elect Ferdinand ‘Bongbong’ Marcos Jr.

Ayon kay Diokno, magiging posible ito kung lalago ng 7% ang ekonomiya ng bansa ngayong taon at 6% pa sa mga susunod na taon.

Kapag nangyari ito, bababa na lang sa 3% ang Gross Domestic Product ratio ng bansa.

Samantala, bilang susunod na Chief ng Department of Finance at hindi rin pabor si Diokno na taasan ang buwis para makabayad sa utang ang bansa.

Nakapagtala ang Makati City ng pinakamaraming kaso ng COVID-19 sa buong Metro Manila.

Batay sa inilabas na datos ng DOH, nasa 24 ang bagong kaso ng Makati na sinundan ng Quezon City na mayroong 18 panibagong kaso.

Habang sa lungsod ng Maynila ay mayroong 12 at 9 naman na bagong kaso ang naitala sa Las Piñas

Nakapagtala naman ng isang kaso ang Lungsod ng Mandaluyong, Parañaque, Pasig at Pasay.

Pumalo na sa mahigit 3M ang nationwide tally ng COVID-19.

Ito’y matapos makapagtala ng 225 kung saan bahagyang tumaas ang aktibong kaso ng virus sa 2, 441 mula sa 2,334 noong Huwebes.

Nasa 117 naman ang naitalang bagong COVID-19 recoveries kung saan umakyat na sa 3, 628, 217 ang kabuuang bilang ng gumaling sa sakit.

Samantala, umakyat na sa 60,456 ang nasawi sa COVID-19 matapos madagdagan ng isa kahapon.

Nagsagawa ang ilang  personnel ng Department of Public Works and Highways (DPWH) at ilang ahenisya ng pamahalaan ng ocular inspection sa National Museum.

Ito’y kasunod ng nalalapit na panunumpa ni President-elect Ferdinand “Bongbong” Marcos Jr., sa a -30 ng Hunyo bilang ika-17 Pangulo ng Pilipinas.

Inikot ng mga tauhan ng DPWH na pawang miyembro ng Inauguration Committee ang labas at loob ng National Museum partikular sa Old Legislative Building.

Siniguro rin ng Inauguration Committee na maayos  ang mga itinayong platform, at mga lugar na pagpu-pwestuhan ng mga dadalo sa panunumpa President-elect Marcos Jr.

Samantala, una nang nag-abiso ang pamunuan ng National Museum na pansamantalang isasara ang National Museum of Fine Arts  na magsisimula sa Lunes, June 6 hanggang July 4 bilang paghahanda at pagsasaayos ng Inauguration Committee.

Nadetect ang unang dalawang kaso ng Omicron subvariant  na BA.5 sa dalawang taong mula sa Central Luzon.

Ayon kay DOH Undersecretary Maria Rosario Vergeire, walang naitalang travel history ang mga naturang pasyente maliban sa pagpunta sa kanilang polling precinct sa Metro Manila.

Ani Vergeire, agad na naghiwalay ang mag-asawa matapos makaranas ng ubo at sipon at ngayon ay asymptomatic at nakarecover na rin.

Dagdag pa ni Vergeire, mayroong dalawangg close contacts ang naturang mga pasyente kung saan patuloy na nag-a-isolate matapos magpositibo ang isa sa mga ito sa virus.

Matatandaang, nuong nakaraang buwan ay nakapag-ulat ang DOH ng unang omiCron BA.4 subvariant sa isang Returning Filipino mula sa Middle East.