NATIONAL NEWS

Nasa 90% na ng 2022 National Budget ang naibaba ng Department of Budget and Management (DBM) sa mga Departamento at ahensya ng pamahalaan.

Ito ang sinabi ni DBM undersecretary Tina Rose Canda, kung saan katumbas ng 4.3 trillion pesos mula sa 5.024 pesos na budget ng bansa ngayong taon.

Ani Canda, ang hawak na lamang ng DBM ay ang mga special purpose fund, tulad ng calamity fund.

Saka-sakaling mayroong mga bagong programa ang susunod na administrasyon na nais nilang isulong, maaari namang gumawa ng batas ang kongreso.

Dumating na ang nasa 61 manggagawang Pinoy na bahagi ng unang batch ng Filipino hotel workers sa Israel.

Sinalubong ni Philippine ambassador to Israel, H.E., Macairog Alberto, kinatawan mula sa embahada, at Population and Immigration Authority o PIBA.

Bukod sa buwanang sahod na nasa 74,000 pesos ay mayroon ding matatanggap ang mga Pinoy workers na medical insurance at foreign workers deposit fund.

Tina-target ng Isareli government na makapag-hire ng kabuuang 500 hotel workers sa bansa sa ilalim ng Philippines-Israel labor agreement.

Muling makikilahok ang Pilipinas sa Rim of the Pacific (RIMPAC) exercises na gaganapin sa June 29 hanggang August 4 sa Estados Unidos.

Itinuturing ang RIMPAC na pinakamalaking Maritime Warfare exercise sa buong mundo dahil sumasali rito and nasa mahigit 20 mga bansa kabilang ang Pilipinas, India, Japan, Australia, Singapore, Thailand at Brunei.

Pangungunahan mismo umano ito ng commander ng United States pacific fleet at gaganapin ito sa bahagi ng Hawaiian Islands at Southern California.

Layunin ng maritime exercise na mapalawak pa ang kakayahan ng mga puwersang pandagat ng mga kalahok na bansa, palakasin ang ugnayan ng 26 countries at i-promote ang free and open indo-pacific

Batay sa ulat ng US pacific fleet nasa 38 surface ships, apat na submarines at 170 aircrafts ang magiging bahagi sa Biennial Rimpac exercises.

Samantala, inihayag naman ng Philippine Navy, naghahanda na rin sila sa ipapadalang contigent sa Rimpac 2022.

Naghahanda na ang Department of Education (DepEd) para sa muling pagbabalik ng face-to-face classes ngayong School Year 2022-2023.

Sinabi ni DepEd assistant secretary Malcolm Garcia na nasa 70% ng mga pampublikong paaralan sa bansa ang handa na para sa in-person classes sa darating na pasukan.

Aniya, halos lahat ng public schools ay nakatugon sa mga inilatag na patakaran ng health department kung saan 90% ng mga guro ang bakunado na kontra COVID-19.

Samantala, nilinaw ni Garma na gagamitin pa rin ng ang blended learning sa susunod na school year na makatutulong upang matugunan ang problema sa kakulangan ng mga classroom.

Batay sa tala ng DepEd nasa 18% pa lang ng mga pribadong paaralan sa bansa ang nagpahayag ng kahandaan para sa face-to-face classes.

Nakatakdang ilunsad ngayong araw ng Department of Education (DepEd) ang kanilang strategic roadmap na tinawag na Basic Education Development Plan 2030 (BEDP) 2030.

Ito’y para mas mapaunlad ang paghahatid at kalidad ng pangunahing edukasyon.

Sinabi ni DepEd secretary Leonor Briones, layon nito na ipagpatuloy ang mga layunin ng kagawaran para sa lahat ng Pilipino na makita ang kanilang potensyal at magkaroon ng makabuluhang ambag sa national building sa pamamagitan ng pagsusulong ng karapatan sa edukasyon.

Ipinabatid pa ng kalihim na nakadisenyo ang BEDP 2030 upang matugunan ang pangunahing epekto ng pandemya sa pagkatuto, partisipasyon, at paghahatid ng edukasyon.

Nakatakda namang daluhan ang naturang paglulunsad ng mga opisyal ng DepEd, mga kinatawan ng education forum for quality education o EDUC. Forum, at mga partner, kasama na ang Philippine Business for Education (PBED),  Unicef, at Seameo Innotech.

Umaasa si Deputy Speaker at Senator-elect Loren Legarda na mapapaigting pa ang pagpapatupad ng environment at Climate Change Laws ng bansa.

Kasabay ito ng pagpapatibay ng Kamara sa House Resolution 2605 na naghahayag ng panawagan ng Mababang Kapulungan para sa climate justice at pagpapalakas sa implementasyon ng mga climate change and environmental sustainability laws sa Pilipinas.

Dagdag ni Legarda na patuloy dapat bigyan ng ngipin, ang nasa 10 landmark environmental laws ng bansa upang matiyak ang climate-resilient, sustainable, green, at regenerative economy lalo na para sa vulnerable sector ng Pilipinas.

Bahagi rin ng resolusyon ang pagbuo sa isang accountability mechanism for climate change at loss and damage fund.

Pinaiigting ngayon ng pamunuan ng Metro Rail Transit Line 3 (MRT-3) ang seguridad sa kanilang buong linya.

Ito ay alinsunod sa inilabas na anunsiyo ng office for transportation security na siguruhing istriktong naipatutupad ang security plan ng mga transport operators sa bansa matapos maiulat ang ilang insidente sa Mindanao.

Sa ngayon ay sumasailalim sa masusing baggage checking, inspection at control ng mga ipinagbabawal na kagamitan ang lahat ng mga pasahero at kawani bago makapasok sa loob ng mga istasyon.

Ilan sa mga ipinagbabawal ay ang pagpasok ng anumang uri ng armas, gayundin ang patalim o kahit anong matutulis at nakakahiwa na mga bagay; explosives and incendiary substances; flammable o madaling magliyab at nakalalason na mga gas at kemikal; at mga mapanganib na kagamitan at kemikal gaya ng mga pesticides, muriatic acid, liquid hydrogen, at iba pa.

Samantala, hiningi naman ng pamunuan ang kooperasyon ng mga pasahero na agad ipaalam sa mga security personnel at marshal sakaling may mamataan na anumang kahina-hinalang bagay sa loob ng mga istasyon.

Nasa mahigit 400K overseas Filipino workers (OFW) ang napauwi na ng Department of Foreign Affairs (DFA) sa Pilipinas.

Ang mga OFW na pinauwi ng DFA ay mula sa iba’t ibang  bansa kung saan nagsimula ang pag-repatriate sa mga distressed Filipino noong 2020.

Ayon kay Foreign Affairs Undersecretary for Migrant Workers Affairs Sarah Lou Arriola, umakyat na sa 460,383 overseas Filipino ang nakabalik na ng Pilipinas sa pamamagitan ng DFA-facilitated repatriation program.

Ang kabuuang Repatriated Nationals ay kinabibilangan ng 354,382 land-based overseas Filipinos at 106,001 na seafarers.

Sa kabilang banda, nagsasagawa naman ang DFA ng “separate round” ng repatriation para sa mga Filipino sa Sri Lanka na apektado ng krisis sa ekonomiya.

Abiso sa mga motorista!

Magsasagawa ng road reblocking ang Department of Public Works and Highways (DPWH) sa ilang lugar sa Metro Manila simula mamayang alas-11 ng gabi hanggang Hunyo 6.

Sakop ng road reblocking ang mga lugar ng:

• Edsa Santolan Southbound sa San Juan City mula sa V.V. Soliven driveway patungong Rochester Street;
• Edsa Quezon City northbound sa harap ng Cubao farmers at Aurora Blvd. Gayundin paglagpas ng Kamuning road.
• C5 road northbound paglagpas ng Mckinley road sa Makati City
• C5 road Southbound sa Makati City;
• Tandang Sora Ave. Quezon City: Visayas Avenue papunta ng San Miguel St.;
• Times street, Quezon City corner West Ave. sa harap ng Kowloon house;
• Commonwealth Ave. Quezon City: Zuzuareggui St.papunta sa harap ng Diliman preparatory school.
• Edsa southbound Quezon City sa service road 2nd block ng Timog Ave. Intersection service road, 2nd block ng Kamuning road at service road at 2nd block corner ng  Kamuning road;

• P. Garcia Avenue Quezon City sa tapat ng UP Ayala TBI

Pinapayuhan naman ng MMDA na dumaan sa mga alternatibong ruta ang mga motorista.

Nasa 16.2% o katumbas ng 2,018,289 na populasyon sa Central Luzon ang nakatanggap na ng booster shots laban sa COVID-19.

Batay sa datos ng Department of Health (DOH), mayroong 12,422,172 na populasyon ang pitong lalawigan sa naturang rehiyon noong 2020 census.

Sa inilabas na COVID-19 case bulletin noong May 29 ng Central Luzon Center for Health Development (CLCHD), nasa 8,308,681 o 66.9% ng kabuuang populasyon ng rehiyon ang fully vaccinated na laban sa sakit.

Nabatid na nakapagtala ng 139 new COVID-19 cases ang Region 3 noong May 24 hanggang 30.