NATIONAL NEWS

Panibagong oil price hike ang aasahan ng mga motorista bukas, Hunyo a-siyete.

Sa ipinalabas na abiso ng Pilipinas Shell Petroleum Corp., ipatutupad nila ang P2.70 sentimong umento sa kada litro ng gasolina; P6.55 sentimo sa kada litro ng diesel; at P5.45 sentimo naman sa kada litro ng kerosene.

Sinabi naman ng kumpanyang Cleanfuel na ipatutupad nito ang kaparehong price adjustment, maliban sa kerosene.

Ang muling pagsirit ng presyo ng petrolyo ay bunsod ng pagtaas ng demand nito sa ilang mga bansa dahil sa summer season, pag-ban ng European Union (EU) sa Russian oil at pagluwag ng COVID-19 restrictions sa China.

Magpapatuloy ang mga programa ng gobyerno sa mga Insurgency-Free Barangays sa Western Visayas.

Ito ang muling tiniyak ng Poverty Reduction, Livelihood and Employment Cluster (PRLEC) ng regional task force to End Local Communist Armed Conflict-Western Visayas (RTF-ELCAC) 6 kahit pa matapos ang termino ni Pangulong Rodrigo Duterte.

Ayon kay TESDA-Region 6 Director Jerry Tizon, wala siyang nakikitang rason upang tuldukan na ng susunod na administrasyon ang ELCAC, lalo’t positibo ang naging resulta nito, partikular sa mga liblib na lugar.

Inaasahan na anya nila ito dahil mayroon ng commitment mula kay incoming President Bongbong Marcos Jr. na ipagpapatuloy ang mga sinimulan ng kasalukuyang administrasyon, lalo ang NTF-ELCAC.

Sakali namang itigil, tiniyak ni Tizon na ipagpapatuloy pa rin ng cluster members ang kanilang tungkulin na i-angat ang pamumuhay ng kanilang constituents, lalo sa mga liblib na lugar.

Umabot na sa 72 barangay sa Western Visayas ang idineklarang insurgency-free noong 2019, habang 93 pa ang cleared mula 2020 hanggang 2021.

Sinimulan na ng Department of human settlements and Urban Development (DHSUD) – Region 10, katuwang ang 4th Infantry Division (ID) ng army, ang preparasyon sa pinalawak na housing community para sa Indigenous Peoples (IP) Sa Northern Mindanao.

Nakipagpulong na si DHSUD – 10 Director Ariel Abragan kay 4th ID Commander, Maj. Gen. Wilbur Mamawag upang talakayin kung paano magiging pangunahing proyekto sa ilalim ng peace building sa mga liblib na lugar ang pagtatayo ng mas maraming komunidad sa rehiyon.

Ayon kay Abragan, pupunan ng nasabing proyekto ang puwang sa matagal nang kampanya kontra insurgency.

Sa pamamagitan anya ng pagbibigay ng basic shelter sa indigenous communities, isang hakbang na lamang ang pamahalaan upang tuldukan ang mga matagal ng problema sa Mindanao.

Bilang bahagi ng community service programs, nagsagawa ang 4th ID ng non-combat outreach sa grassroots level katuwang ang iba pang government agencies, bilang parte ng whole-of-government approach.

Alinsunod ito sa Executive Order 70 at nilikhang Task Force to End Local Communist Armed Conflict.

Pinalalantad na ng LTO-NCR ang driver ng SUV na sangkot sa pag hit and run sa isang guwardya sa Mandaluyong City.

 Kasunod na rin ito nang inisyung show cause order ng LTO-NCR para sa itinakdang hearing sa kaso bukas, June 7.

Ayon kay LTO-NCR Director Atty. Clarence Guinto, umaasa silang lalantad ang driver at may-ari ng nasabing SUV sa pagdinig para malaman ang buong istorya sa insidente.

Ang biktimang si Christian Joseph Floralde ay naka-confine pa sa ospital matapos ma-hit and run ng naturang SUV habang nagmamando ng trapiko.

Tinukoy ng Mandaluyong Police ang isang puting Toyota RAV 4 na may plakang NCO 3781 na sangkot sa naturang hit and run incident.

Umaasa ang Department of Energy (DOE) na tutuparin ng Organization of the Petroleum Exporting Countries (OPEC) ang pangankong dagdagan ang produksyon ng langis.

Ito’y ayon kay Energy Assistant Secretary Gerardo Erguiza ay bilang tugon ng OPEC sa pangangailangan ng mundo sa supply ng langis sa gitna na rin ng bakbakan ng Russia at Ukraine.

Sinabi sa DWIZ ni Erguiza na hindi natuloy nuong Oktubre ang unang plinanong dagdag na produksyon ng langis ng OPEC.

Gayunman, nilinaw ni Erguiza na hindi lamang suppy ang problema sa isyu ng langis kundi nagkaruon din ng problema sa mismong refineries.

Walang pinagsisisihan si Health Secretary Francisco Duque III sa kanyang naging trabaho sa gobyerno na aniya’y pinakamahirap niyang posisyon sa pamahalaan.

Sinabi ni Duque na ibinigay at ginawa niya ang lahat bilang pinuno ng Deparrtment of Health (DOH) na kanyang unang pinangunahan nang maharap ang bansa sa AH1N1 pandemic.

Humingi pa ng pasensya si Duque kung hindi sapat ang naging performance nya bilang DOH Secretary na maaring ibigay na lamang sa iba lalo pa’t marami namang magaling na pwedeng maging kalihim ng ahensya.

Una nang inihayag ni Duque na babalik siya sa kanyang home province kapag natapos na ang termino bilang DOH Secretary.

Si Duque ay itinalaga ng Pangulong Rodrigo Duterte sa DOH nuong 2017 matapos na ibasura ng Commission on Appointments (CA) si Paulyn Ubial at naging DOH Secretary rin sa ilalim ng Arroyo administration at naging Chairman ng Civil Service Commission (CSC) nuong Aquino administration.