NATIONAL NEWS

Inaalala at ipinagdiwang ng lokal na pamahalaan ng lungsod ng Maynila ang ika-161 kaarawan ng pambansang bayani ng bansa na si Dr. Jose Rizal sa kaniyang bantayog sa Rizal Park.

Pinangunahan ni Vice Mayor Honey Lacuna ang seremonya na dinaluhan ng iba’t ibang personalidad, organisasyon at ilang kaanak ni Rizal.

Dito, nagsagawa sila ng  wreath-laying ceremony at nag-alay ng mga bulaklak sa kaniyang monumento.

Ayon kay Crusaders for the Upliftment of our Faith Expedito Laurente Gonzales,  karapatan ng bawat Pilipino na alalahanin at pahalagahan ang pagbuwis ng dugo at buhay ng ating mga bayani sa pangunguna ni Dr. Jose Rizal.

Isinilang si Rizal sa June 19, 1861 sa Calamba, Laguna at nasawi noong December 30, 1896 matapos barilin ng firing squad noong panahon ng Espanyol.

Aabot pa sa higit 120,000 na mga healthcare workers at iba pang frontliners  ang hindi pa nakatatanggap ng kanilang One COVID-19 Allowance (OCA).

Ayon kay Department of Health Undersecretary at treatment czar Leopoldo Vega, mula sa 526,727 healthcare workers, nasa 400,000 pa lamang dito ang nakatanggap ng OCA.

Dahil dito, nakikipag-ugnayan na raw ang DOH sa Private Hospitals Association Philippines (PHAPI) para sa listahan ng mga ospital para sa koordinasyon at matugunan na ito agad.

Matatandaang naglaan ng P7.92 billion budget ang Department of Budget and Management sa mga pribado at pampublikong ospital para sa kanilang healthcare workers at non-healthcare workers.

Sa nasabing halaga, tutukuyin sa mga ito ang high risk sa viral disease na bibigyan ng P9,000; P6,000 sa medium risk at P3,000 para sa low risk.

Naabot na ng bansa ang target na 7 milyong Pinoy na fully vaccinated na kontra COVID-19.

Batay sa pinakahuling ulat National Vaccination Operations Center, pumalo na sa 70,005,247 indibidwal o katumbas ng 77.78% target population ang nakatanggap na ng dalawang dose ng bakuna kontra COVID-19.

14,704,514 naman sa nasabing bilang ang nakapagpaturok na ng unang booster shot at 648,555 ang mayroon nang ikalawang booster dose.

Nabatid na ang mga senior citizen, medical frontliners, at immunocompromised adults o may cancer, human immunodeficiency virus/acquired immune deficiency syndrome, umiinom ng immunosuppressants, o organ transplant recipients ang maaari pa lamang tumanggap ng ikalawang booster shot.

Ikinagalak naman ng pamahalaan ang pag-abot sa target vaccinated population  bago ang pagbaba ni Pangulong Rodrigp Duterte sa Hunyo 30.

Sa kabila nito, nanawagan pa rin  ang gobyerno sa publiko na magpaturok na ng booster shot kung sila’y eligible bilang dagdag proteksyon.

Suportado ni Outgoing Taguig Mayor Lino Cayetano ang desisyon ng Inter-Agency Task Force (IATF) na panatilihin sa Alert Level 1 ang National Capital Region (NCR).

Ito ay sa kabila ng unti-unting pagtaas sa naitatalang kaso ng COVID-19 sa bansa.

Ayon kay Cayetano, hindi na dapat taasan pa ang umiiral na restriksyon dahil sa panahon ngayon ay dapat marunong na ang publiko sa pagprotekta sa kanilang sarili, mga kaanak at komunidad.

Dagdag pa ni Cayetano, maraming residente sa kanilang lungsod ang nawalan ng trabaho noong nagpatupad ng lockdown.

Dahil dito, nakatuon na raw ang Taguig City LGU sa pagtitiyak na mayroong trabaho at hanapbuhay ang kanilang mga residente.

Nagpaabot na ng pagbati ang Department of Education (DepEd)  sa susunod na kalihim ng kagawaran na si Sara Duterte-Carpio sa kaniyang inagurasyon ngayong araw, Hunyo 19.

Ayon kay incumbent Education Secretary Leonor Briones, patunay lamang na nagtitiwala ang sambayanang Pilipino sa kakayanan ni Sara Duterte na pamunuan ang bansa base na rin sa higit 30 milyong boto na kaniyang nakuha kasama si President-elect Ferdinand ‘Bongbong’ Marcos Jr.

Aniya, nagagalak siya na ang Pangalawang Pangulo ng bansa ang susunod na mamumuno sa DepEd at bibigyang prayoridad ang edukasyon ng susunod na administrasyon.

Nakikita rin daw niya na magbubunga ng maganda ang pamumuno ni Sara Duterte sa kagawaran ng edukasyon patungong sa kalidad na edukasyon.