NATIONAL NEWS

Nabawasan ang bilang ng populasyon ng mga bata sa bansa sa nakalipas na dalawang dekada sa gitna ng mababang “fertility level”.

Ayon sa Commission on Population and Development (POPCOM), patuloy na nakapagtatala ang populasyon ng bansa ng mababang percentage ng mga nakababata batay sa datos ng Philippine Statistics Authority.

Inihayag ni Popcom executive director Juan Antonio Perez III na ang populasyon ng mga batang pilipinong edad lima ay bumaba sa 10.2% noong 2020 kumpara sa 10.8% noong 2015 at 12.6% noong taong 2000.

Bumaba rin anya sa 30.7% ang bahagi ng populasyon ng mga Pinoy na nasa edad kinse noong 2020 kumpara sa 37% noong taong 2000.

Ipinunto ni Perez na ang datos hinggil sa bumababang bilang ng mga bata simula noong 2015 ay indikasyon na epektibo ang Family Planning Program ng bansa.

Karagdagang 4, 182 COVID-19 cases ang naitala ng Department of Health kahapon.

Ito na ang ika-apat na sunod na araw na umabot sa mahigit 4K ang arawang kaso ng COVID-19 sa bansa.

Dahil dito, bahagyang bumaba sa 40, 016 ang active cases habang lumobo sa 3, 831, 941 ang total case load.

Karagdagang 44 new deaths naman ang naitala ng DOH kaya’t sumampa sa 61, 036 ang death toll habang umakyat na sa 3, 730, 889 ang recoveries.

Sa mga additional infection na naitala, pinakamarami ay mula sa Metro Manila na 1, 290.

Samantala, bahagyang bumaba sa 18.1% ang positivity rate mula August 7 hanggang 13 kumpara sa 18.7% noong July 31 hanggang August 6.

Nabawasan ang bilang ng traffic violations sa mga lugar na sakop ng No-Contact Apprehension Policy (NCAP) sa Quezon City.

Ayon kay Assistant City Atty. Carlo Austria, na nangangasiwa ng NCAP sa lungsod, natapyasan ng 80% ang traffic violations sa mga lugar na sakop ng nasabing polisiya.

Mas naging ligtas anya ang mga kalsada sa Q.C. dahil batid ng mga tao na mahuhuhli sila kung lalabag sa batas trapiko.

Batay anya sa kanilang datos, wala pang isang buwan ay mahigit 11K traffic violations na ang naitala simula nang ipatupad ang NCAP sa Quezon City noong July 1.

Karamihan sa paglabag ay Disobedience to Traffic Control Signals.

Posibleng 150k metrikong toneladang asukal na lamang ang angkatin ng Pilipinas sa Oktubre sa sandaling numipis ang lokal na supply.

Ito ang inihayag ni Pangulong Bongbong Marcos ilang araw matapos niyang ibasura ang kontrobersyal na planong importasyon ng 300, 000 metric tons ng asukal.

Partikular na tinukoy ni PBBM ang Sugar Order Number 4, na resolusyong na nilagdaan nang wala niyang basbas sa kabila nang pagsisimula ng harvest season ng sugarcane sa bansa.

Sa kanyang official YouTube vlog, nilinaw ni Pangulong Marcos na may sapat pa namang supply sa bansa kaya’t hindi pa kailangang mag-angkat ng napakalaking supply ng asukal.

Bukod sa asukal, nakikipag-ugnayan na anya ang gobyerno sa ibang bansa para sa pag-import ng pataba upang mapahupa ang tumataas na presyo ng urea sa Pilipinas.

Nagpaabot ng pakikiramay si Vice President Sara Duterte-Carpio sa pamilya ng yumaong Pinay Olympic Athlete at Asia’s Fastest Woman na si Lydia de Vega.

Ayon sa Tagapagasalita ng Pangalawang Pangulo na si Atty. Reynold Munsayac, nakikiisa at nakikisimpatiya si VP Sara na makahanap ng kaunting ginhawa ang pamilya ng sports icon.

Sinabi ni Munsayac, na naging isang inspirasyon si de Vega sa mga Pilipino lalo na sa mga kabataan na nais ding makapag-uwi ng karangalan sa bansa.

Ipinaabot ni VP Sara na si hindi matatawaran ang pagiging isang huwaran ni de Vega sa kaniyang pagmamahal sa bayan at pagluklok sa Pilipinas sa pedestal ng tagumpay.

Ikinatuwa ng mga tsuper at motorista ang tuloy-tuloy na pagbaba sa presyo ng produktong petrolyo.

Ayon sa mga Jeepney Driver, malaking tulong ang patuloy na pagbaba sa presyo ng langis dahil unti-unti silang nakakabawi sa pagkalugmok lalo pa’t nalalapit narin ang pagbabalik ng face-to-face classes ng mga estudyante.

Sa pag-iikot ng DWIZ, inihayag ng mga tsuper na hindi sila makapagtaas ng pamasahe dahil marami din silang kalaban sa kanilang pamamasada.

Umaasa naman ang mga operator at drivers na madadagdagan na ang kanilang kinikita dahil sa patuloy na pagbaba ng presyo ng langis sa susunod na buwan.

Good news para sa mga motorista dahil asahan na bukas ang tapyas presyo sa produkto ng langis.

Ayon sa ilang kumpaniya ng langis, posibleng magkaroon ng umento na P.10 centavos o P.20 centavos na tapyas-presyo  sa kada litro ng gasolina.

Maglalaro naman sa P.90 centavos hanggang P1.00 at P.20 centavos ang magiging bawas-singil sa presyo ng kada litro ng diesel; habang P.20 centavos hanggang P.50 centavos naman ang posibleng maging bawas sa kada litro ng kerosene.

Sa pahayag ng Department of Energy (DOE), posibleng magtuloy-tuloy ang pagbaba ng presyo ng petrolyo hanggang sa mga susunod na buwan.

Hindi muna pagmumultahin ng Metro Manila Development Authority (MMDA) ang mga lalabag sa “Modified Number Coding Scheme” mula ngayong araw hanggang sa Agosto a-17.

Ayon kay MMDA Head for Special Operations Edison Nebrija, magpapatupad ang ahensya ng test run ng bagong window hour simula alas-7:00 ng umaga hanggang alas-10:00 ng umaga sa loob ng tatlong araw.

Sinabi ni Nebrija na ang mga mahuhuling violator sa nasabing dry run ay hindi muna bibigyan ng ticket o hindi pagmumultahin.

Gayunman, tiniyak ni Nebrija na sisimulan ang pagpapatupad ng naturang sistema sa Agosto a-18 upang mahigpitan ang paglabas sa lansangan ng mga pribadong sasakyan kada linggo.

Bukod pa diyan, ipaiiral din ang Number Coding simula alas-5:00 ng hapon hanggang alas-8:00 ng gabi tuwing weekdays.

Sinabi ng opisyal na exempted sa nasabing sistema ang mga Public Utility Vehicle, Transport Network Vehicle Services, motorsiklo, garbage truck, fuel truck, marked government vehicle, fire truck, ambulansya, marked media vehicles, at mga sasakyang nagdadala ng essential or perishable goods.

Magsasagawa ng briefing ngayong araw, ang House Committee on Good Government and Public Accountability, para pag-usapan ang mga isyung nakapaloob sa importasyon ng asukal sa bansa.

Ayon kay Committee chairperson at San Jose Del Monte Representative Florida Robes, nais nilang maliwanagan hinggil sa totoong nangyari sa pag-isyu ng resolusyon para sa pag-angkat ng bansa ng 300, 000 metriko toneladang asukal na siyang tinutulan ni Pangulong Ferdinand ‘Bongbong’ Marcos Jr.

Sinabi ni Robes na mahalaga ang transparency at accountability sa magandang pamamahala kaya pursigido ang Komite na suriin itong mabuti.

Matatandaang nagbitiw sa puwesto si Agriculture Undersecretary Leocadio Sebastian matapos niyang ipag-utos na bigyan na ng green light ang panukalang mag-import ang bansa ng asukal.