NATIONAL NEWS

Ibinunyag ni Interior Secretary Jonvic Remulla na nagbalik ang Philippine National Police ng 500 million pesos mula sa 1.3-billion pesos intelligence fund nito matapos mapag-alamang insertion ito ng isang kongresista.

Ayon kay Sec. Remulla, iturn-over nila sa Office of the President ang natuklasang kalahating bilyong pisong insertion.

Bagamat hindi direktang pinangalanan ng kalihim ang kongresistang nag-insert ng pondo, sinabi nito na ito rin ang taong humirit ng 3,000 containers ng isda.

Nabatid na ibinunyag ni Agriculture Secretary Francisco Tiu Laurel Jr. sa budget hearing ng kanilang ahensya sa Kamara na pinipilit siya ni dating Cong. Zaldy Co na aprubahan ang fish importation permit ng tatlong kumpanya, na nasa 3,000 containers ang dami.

Maglalabas ang Department of Interior and Local Government ng kautusan para inspeksyunin ng mga local government units ang structural integrity ng mga bahay ng mga informal settler families (ISF).

Sa pagdinig ng panukalang 2026 budget ng DILG, sinabi ni Secretary Jonvic Remulla na bahagi ito ng kanilang hakbang para sa paghahanda sa ‘The Big One’.

Ipinaliwanag ni Secretary Remulla na walang permit at sinusunod na building permit ang mga ISF sa pagpapatayo ng mga bahay, lalo’t ang ilan sa mga bahay ng mga ito ay umaabot ng lima hanggang anim na palapag.

Ayon sa kalihim, malaki ang posibilidad na kapag tumama ang ‘The Big One’ ay magmula sa mga ISF ang karamihan sa maitatala ng casualties.

Samantala, sinabi naman ni DILG Undersecretary for Local Government Marlo Iringan na magpapatupad sila ng infrastructure audit na target nilang simulan sa NCR, Calabarzon, at sa Region 3.

Binigyang-diin ng Malacañang na kailangang pag-aralan nang mabuti at timbangin ang mga posibleng epekto ng mungkahing demonetization sa ₱1,000 at ₱500 peso-bill na layong labanan ang korapsyon.

Ayon kay Palace Press Officer Atty. Claire Castro, hindi basta-basta maaaring ipatupad ang naturang hakbang dahil maaari itong magkaroon ng malawakang epekto sa ekonomiya at sa pang-araw-araw na transaksyon ng publiko.

Nabatid na nagmula ang mungkahi kay dating Finance Secretary Cesar Purisima, na naniniwalang makatutulong sa kampanya laban sa katiwalian ang pagbawas ng mataas na denominasyon ng perang papel.

Aniya, kung ₱200 lamang ang pinakamataas na halaga ng pera, magiging mas mahirap para sa mga tiwaling opisyal na magtago o maglipat ng malalaking halagang hindi malinaw ang pinagmulan.

Gayunman, ayon sa Palasyo, kailangan ding isaalang-alang ang magiging abala at gastos sa panig ng publiko, mga bangko, at mga negosyo sakaling ipatupad ang ganitong polisiya.

Kinumpirma ni Pangulong Ferdinand Marcos Jr. na ila-livestream na ang bicam hearing ng 2026 national budget para malaman ng publiko kung sinu-sinong mambabatas ang magtatangkang magsingit ng pondo o budget insertions.

Ayon kay Pangulong Marcos, nagkasundo na sila ng lider ng Kamara at Senado na i-livestream ang nasabing pagdinig para maging transparent sa mga Pilipino.

Dagdag pa ng Pangulo, wala nang small committee kagaya ng ginagawa sa mga nakaraang proseso ng pambansang budget.

Aniya, hindi na siguro kailangan mag-veto, dahil sa huling version ng budget na nabasa niya ay wala siyang nakitang mga pagbabago.

Gayunman, dahil hindi pa tapos ang proseso, titignan na lamang sa mga susunod na araw kung ano pa ang mangyayari kapag nakarating na sa mataas na kapulungan at bicameral conference ang 2026 proposed national budget.

Maraming jeepney cooperatives ang nagpapatong ng dagdag na halaga sa presyo sa mga electric jeep units.

Ito ang ibinunyag ni Pasang Masda president Ka Obet Martin sa panayam ng DWIZ. Aniya, sa halip na ₱2.250 lamang ang halaga ng kada unit ng e-jeep, ginagawa itong ₱2.550 ng ilang kooperatiba.

Binigyang-diin din ng lider ng Pasang Masda na hindi mismanage ang dahilan kung bakit maraming kooperatiba ang hindi nakakapagbayad sa mga utang nitong pinambili ng e-jeep units, kundi ayaw lamang talaga magbayad ng ilan sa mga ito.

Samantala, tiniyak ni Ka Obet na tuloy pa rin ang ipinasa nilang petisyon hinggil sa pisong taas pasahe, kahit na matagal na itong nabinbin.

Ipinakakansela na ng Mandaluyong Regional Trial Court sa Department of Foreign Affairs ang passports nina retired police colonel Royina Garma at dating National Police Commission commissioner Edilberto Leonardo.

Ito’y kaugnay sa pagkakasangkot ng dalawang dating opisyal sa kaso ng pagpatay kay Philippine Charity Sweepstakes Office board secretary Wesley Barayuga noong 2020.

Maliban dito, naglabas na rin ang Mandaluyong RTC ng hold departure order laban kay Garma, Leonardo at tatlong iba pa na responsable sa pagkamatay ni Barayuga.

Ipinagkibit-balikat ni accredited International Criminal Court Assistant to Counsel Atty. Kristina Conti ang napaulat na pag-disqualify ng I.C.C. kay Chief Prosecutor Karim Khan.

Nabatid na iniutos ng I.C.C. na i-disqualify si Prosecutor Khan dahil sa sinasabing sexual misconduct nito, dahilan kung bakit siya naka-leave sa pakikilahok sa kaso ni Duterte sa nasabing korte.

Sa panayam ng DWIZ, sinabi ni Atty. Conti na walang bigat sa kasong kinakaharap ng dating Pangulong Duterte ang pag-disqualify mismo ng I.C.C. kay Prosecutor Khan, kahit pa inamin anya nito noon na tumulong siya sa pag-interview sa ilang sinasabing biktima ng war on drugs campaign ng dating administrasyon.

Dagdag pa ni Atty. Conti na sakali mang hindi na makabalik si Prosecutor Khan, tuloy ang trabaho ng prosecution team dahil may katuwang naman ito na magsisilbing in charge sa kaso.