EXPLAINERS

Award na sana, naging bato pa. Ganyang-ganyan ang sinapit ng isang high school graduate mula sa kansas city nang bigla na lang bawiin ng eskwelahan ang kaniyang award nang dahil lang sa kaniyang graduation speech.

Kung ano ang dahilan, eto.

Naudlot ang pagce-celebrate ng isa sa mga high school graduates ng Bishop Carroll Catholic High School sa Wichita, Kansas na si Austin Tran nang bigla na lang bawiin ng eskwelahan ang kaniyang award at medal.

Wala namang sinabi na hindi kaaya-aya ang bata sa kaniyang speech pero hindi raw ito aprubado ng eskwelahan.

Ang dahilan lang ng eskwelahan, masyado raw kasing mahaba ang speech ni austin at lumagpas sa required maximum time na four minutes.

Ayon sa social media post ng nanay ni Austin, inaprubahan na ang speech ng kaniyang anak ilang araw bago pa ang graduation.

Pero isang gabi bago ang kaniyang big day, bahagya raw itong ni-revise ni Austin dahil gusto nito na maging personal ang speech nang sa ganon ay masabi nito nang maayos ang kaniyang mensahe para sa kaniyang mga kaklase.

Marami rin sa mga nakapanood ng speech ni Austin ang nagandahan dito. Mayroon pa ngang nakapagsabi na halu-halong emosyon ang naramdaman nila nang marinig ito at nakapagpanumbalik ng mga alaala.

Samantala, dahil dito ay ilang online petitions ang sinimulan na umani na ng libo-libong participants. Bukod pa riyan, lumahok din ang mga alumnus ng nasabing eskwelahan at ibinalik ang mga natanggap nilang medal nang grumaduate sila noon bilang valedictorian ng kanilang batch.

Sa mga magulang diyan, anong masasabi niyo sa sinapit ng bata sa kwento? Sa tingin niyo ba ay reasonable ang pagbawi ng kaniyang award?

Kung madalas kang magreklamo sa tuwing tayuan sa mga nasasakyan mong bus, magrereklamo ka pa rin ba kapag nalaman mo na posible ka nang makasakay sa eroplano at makabyahe sa mas murang halaga? Pero ang plot twist, nakatayo ka sa flight mo.

Interesado ka na ba para sa mas affordable travel experience? Pakinggan mo muna ang kwento na ito.

Taong 2018 nang ipakilala ng Italian manufacturer na Aviointeriors sa Aircraft Expo 2018 sa Hamburg ang Skyrider 2.0.

Isa itong padded na upuan na mayroong pagkakahawig sa saddle o ‘yong inuupan ng mga kutsero ng kabayo. Bagama’t naka-anngulo ito nang 45 degrees at hindi nauupuan katulad ng tipikal na plane seats, naiulat na pumasa ito sa safety requirements at ligtas na gamitin sa flights.

Sa katunayan naiulat na mayroong mga european budget airlines na nagbabalak na tanggalin ang kanilang economy seats at palitan ito ng Skyrider 2.0.

Bukod sa inaasahang mas abot-kayang presyo ng plane tickets, inaasahan din na magagawa nitong pataasin ng 20% ang bilang ng mga pasahero na siya namang magreresulta sa mas malaking kita para sa mga airlines.

Pero hindi maaaring gamitin ang Skyrider 2.0 sa mahahabang flights dahil hindi katulad ng mga regular na upuan sa eroplano, hindi ito magiging komportable para sa mga pasahero dahil sa 45 degree angle nito.

Samantala, inaasahan na sa pagpasok ng 2026 ay maaari nang makita ang skyrider 2.0 sa mga eroplano pero wala pang airlines ang naiulat na nagkumpirma na sasabay sila sa nasabing innovation.

Sa mga traveler on a budget diyan, willing ba kayong tumayo sa eroplano para labg makapag-travel sa murang halaga?

Tunay nga naman na walang lihim ang hindi nabubunyag, lalo na kung ito ay isang krimen. At kahit gaano pa kaliit o kalaki ang ambag mo rito, mananagot ka pa rin sa batas pagdating ng oras. Gaya ng isang lalaki na tumulong sa mastermind ng isang million euros heist na nasintensyahan matapos ang limang taon.

Kung ano ang mga kaparusahan na natanggap ng mga ito, eto.

Arestado at napatawan ng 21 buwan ng suspended sentence at 240 na oras na unpaid work ang 37-anyos na si Frederick Doe nang mapatunayang guilty ito sa conspiracy to transfer criminal property.

Ayon sa Oxford Crown Court Judge na si Ian Pringle, nagsilbing middleman si Doe sa pagsasagawa ng krimen kung saan wala naman itong natanggap na kahit ano pabalik at nasangkot dito sa maigsing panahon lamang.

Taong 2019 nang isagawa ng isang grupo na kinabibilangan ng limang indibidwal ang pagnanakaw sa artwork ni Maurizio Cattelan na 18-carat gold toilet bowl sa isang exhibition na isinagawa sa blenheim palace kung saan ipinanganak ang dating Prime Minister ng United Kingdom na si Winston Churchill.

Mayroong bigat na 98 kilograms ang toilet bowl na mayroong 20 kilograms ng gold na nagkakahalaga 2.8 million euros.

Pagkatapos nito ay ang siya namang pagpasok ni Doe sa eksena dahil pumayag ito na tulungan ang mastermind na si James Sheen na ibenta ang mga gold dahil sa kaalaman nito sa mga mamahaling relos at kaugnayan sa jewelry district na Hatton Garden.

Samantala, nahatulan na ng burglary ang isa pang sangkot na si Michael Jones, habang si James Sheen naman ay guilty sa burglary at money laundering.

Sa mga may tinatagong baho diyan, maghintay lang kayo, at darating din ang oras para pagbayaran niyo ang mga kasalanan niyo.

Sa tindi init ng panahon ngayon, hindi mo dapat balewalain ang mga sakit na maaari mong ma-develop kahit gaano ka pa ka-healthy at active. Ganyan ang nangyari sa isang atleta at gymgoer mula sa Mexico matapos sumali sa isang competition na ginanap sa ilalim ng mataas na temperatura.

Ang buong kwento, eto.

Mayo a-dos, sa ilalim ng kainitan o temperatura na tinatayang aabot sa 35 degrees celcius nang lumahok ang 24-anyos na atleta mula sa Mexico na si Nayeli Clemente sa isang competition na tinatawag na Cholula Games, isang event na mayroong kaugnayan sa Crossfit o ang kilalang high-intensity workout program.

Binubuo ang cholula games ng iba’t ibang uri ng workouts na naka-sentro sa bilis at intensity ng mga kalahok katulad ng metabolic conditioning, squats, push-ups, gymnastics, running, weightlifting, at iba pang klase ng exercises.

Grupo-grupo nang isinagawa ang challenges ng nasabing competition.

Pero nang dumating ang oras para sa ‘team pyramid run’ o ang relay-style race kung saan salitan ang mga members ng bawat grupo sa pagtakbo, bigla na lang nahirapang huminga si Clemente at nawalan ng malay.

Mabuti na lang at kabilang sa mga nanonood sa nasabing event ang doktor na si Daniela Castruita kung kaya nabigyan ng CPR si Clemente habang hinihintay ang pagdating ng ambulansya.

Ngunit sa kasamaang palad, binawian din ng buhay si Clemente sa ospital dahil sa sudden cardiac arrest.

Naglabas naman ng statement ang Cholula Games at sinabing nakikipag-ugnayan sila sa pamilya ni Clemente para magbigay ng suporta sa mga ito.

Gayunpaman, pinutakte pa rin ng kritisismo ang Cholula Games dahil ipinagpatuloy pa rin umano nito ang event kahit na pumanaw ang isa sa mga kalahok nito.

Samantala, nagsagawa naman ng fundraising ang kuya ni Clemente na siyang nakalikom ng 270,000 dollars na ginamit para sa medical expenses dito.

Ikaw, sino sa tingin mo ang responsable sa insidente na ito?

Responsibilidad ng mga piloto na panatilihing ligtas ang kanilang mga pasahero. Pero hindi rin naman maiiwasan na magkaroon ng emergency ang mga ito, katulad na lang ng medical emergency at tawag ng kalikasan. Yan ang dahilan kung bakit ang isang eroplano mula sa germany ay panandaliang lumipad nang walang piloto!

Kung ano ang mga sumunod na pangyayari, eto.

Pebrero noong nakaraang taon nang lumipad ang isang flight ng Lufthansa Airline mula sa Frankfurt, Germany patungo sa Seville, Spain na mayroong sakay na 199 na pasahero at anim na flight crews nang bigla na lang himatayin ang isa sa mga piloto nito.

Bagama’t hinimatay ang co-pilot, nagawa pa rin umano nito na kontrolin ang eroplano at napanatili itong stable.

Bigo rin ang air traffic controller nang tatlong beses nitong kontakin ang nasabing piloto.

Sa kasamaang palad, habang nangyayari ang insidente ay nasa lavatory ang kapitan ng eroplano, at nang bumalik ito sa cockpit ay hindi nito nabuksan ang pinto kung kaya napilitan itong gamitin ang emergency code.

Mabuti na lamang at mayroong pasahero na flight crew at doctor na nagbigay ng first-aid sa co-pilot bago ito dalhin sa ospital matapos mag-reroute ang kapitan patungo sa Adolfo Suarez Madrid-Barajas Airport.

Ayon sa mga otoridad, wala umanong ideya ang co-pilot na mayroong itong neurological condition na hindi lumitaw sa kaniyang aeronautical medical examination.

Samantala, sinabi naman ng Lufthansa Airline na nagsagawa na ng imbestigasyon ang kanilang flight safety department.

Sa mga palagiang lumilipad diyan, naka-witness na rin ba kayo ng ganitong insidente habang nasa ere?

Sino ang mag-aakala na ang isang nakakapagsalitang ibon lang pala ang magiging daan para muling mabuksan ang kaso ng pagkamatay ng kaniyang amo at tuluyan itong matutuldukan makalipas ang isang taon?

Kung ano ang naging ambag ng parrot, eto.

Taong 2015 nang masawi sa kanilang tahanan sa Michigan, U.S.A si Marty Duram matapos itong barilin nang limang beses ng kaniyang asawa na si Glenna.

Matapos na ito ay binaril din ni Glenna ang kaniyang ulo. Pero nang dumating ang mga pulis para mag-imbestiga ay naisugod pa ang babae sa ospital at nakaligtas.

Base sa imbestigasyon, lubog na umano sa utang ang mag-asawa dahil nalulong sa sugal si Glenna. Binigyan na rin ng foreclosure ang mga ito at nakatakda sanang i-auction ng sheriff’s office ang kanilang bahay sa kaparehas na araw nang mamatay si Marty.

Sa patuloy na pag-iimbestiga, naghinala ang mga pulis na si Glenna ang nasa likod ng krimen ngunit sinabi nito na hindi niya kayang patayin ang kaniyang asawa at sa halip ay hihiwalayan na lang ito.

Isang taon ang nakalipas pero hindi pa rin nabibigyan ng hustisya ang pagkamatay ni marty. Pero sa tulong ng kaniyang ex-wife na si Christina Keller, nakarating sa media ang video ng alagang parrot ni Marty na si Bud na ginagaya at isinisiwalat ang pag-uusap ng dalawang tao na tila nag-aaway.

Hinala ni Christina na nasaksihan at natandaan ng parrot ang away sa pagitan ni Glenna at Marty.

Samantala, matapos lang ang tatlong linggo nang isapubliko ang video ng parrot, inaresto na ng mga pulisya si glenna at muling nagsimula ang mas malalim na imbestigasyon.
Sa pagkakataon na ‘yon ay napatunayan na si Glenna nga ang nasa likod ng krimen nang matagpuan ang ginamit nitong baril na ruger single-six na nakasiksik sa kanilang sofa.

Sinubukan pang umapela ni Glenna sa ipinataw sa kaniya na habambuhay na pagkakakulong pero ibinasura ito ng korte at nakakulong ngayon sa isang correction facility.

Sa mga mag-asawa diyan, sa paanong paraan niyo sinosoluyunan ang mga problema katulad ng pagkalubog sa utang?

Ang paggamit ng makeup ay isang form of self-expression na ginagamit din para mag-enhance ng facial features, kung kaya nga marami ang nahuhumaling dito. Pero ang babaeng ito sa China, hindi umano nakilala ng airport scanner dahil sa kaniyang excessive makeup at tila napahiya pa nang ipatanggal ito ng airport staff.

Ang buong kwento ng sinapit ng babae, eto.

Nag-viral kamakailan lang sa Chinese social media platform ang video ng isang babae na nagmamadali sa pagbura ng kaniyang makeup.

Kuha ito sa loob ng shanghai airport ng pinaniniwalaang isang airport official na maririnig na pinagsasabihan ang babae na burahin ang kaniyang makeup.

Ito ay dahil hindi umano makalagpas sa facial recognition scanner ang pasahero dahil hindi ito makilala dulot ng heavy makeup.

Maririnig pa na sinabihan ng tao sa likod ng camera ang pasahero na burahin nito ang kaniyang makeup hanggang sa maging kamukha na nito ang picture na nakalagay sa kaniyang I.D.

Bukod pa riyan, kinwestyon din nito ang pasahero kung bakit ito lumalabas ng bahay nang mayroong makapal na makeup.

Samantala, umani naman ng samu’t saring komento ang video at kabilang sa mga ito ay ang pagpapaabot ng simpatya sa pasahero dahil sa inabot nitong panenermon. Habang ang iba naman ay pinuna ang modern scanners na dapat daw ay nare-recognize na ang mga tao kahit pa mayroon silang makeup.

Sa mga mahilig mag-makeup diyan, ano ang rekasyon niyo sa sinapit ng babae? Makatarungan ba ang naging approach dito ng opisyal?

Tila isang teleserye ang naging buhay ng dalawang indibidwal mula sa china na magiging mag-byenan sana pero biglaang naging magkasintahan!

Kung paano ito nangyari? Eto.

Nanirahan ang 53-anyos na babae na si Wang sa iisang bubong kasama ang kaniyang boyfriend at ang 86-anyos na tatay nito na kinilalang si Uncle Biao.

Dahil sa kanilang set-up, nag-develop ng kakaibang closeness si Wang at Uncle Biao.

Pero sa kasamaang palad, kamakailan lang ay binawian ng buhay ang boyfriend ni wang dahil sa sakit sa atay.

Pero ang plot twist, kamakailan lang din ay nagpakasal si Uncle Biao at Wang.

Katulad ng kadalasan nating napapanood sa mga teleserye, laging mayroong kumokontra sa ganitong uri ng love story dahil sa iisang rason.

Sa kaso ng bagong kasal, ang anak na babae ni Uncle Biao na si Qin ang pumagitna sa kanilang relasyon.

Ayon umano kay qin, pinakasalan lang ni wang ang matanda dahil sa pera at mga ari-arian nito na siya namang itinanggi ni Uncle Biao.

Samantalang inakusahan naman si Wang na pinakasalan niya si Uncle Biao para pigilan ang plano ni Qin na ipadala sa nursing home ang matanda at parerentahan ang bahay nito.

Kaugnay nito, kinakailangan din ang consent ni Qin kung sakali man na ililipat sa ibang pangalan ang bahay ni Uncle Biao na sa kasalukuyan ay nakapangalan sa kaniyang yumaong asawa noong 2022.

Sa kabila ng issue na ito, nilinaw ni Uncle Biao na ni minsan ay hindi humingi ng pera sa kaniya si Wang, at inaalagaan siya nito dahil sa tunay na pagmamahal.

Dagdag pa niya, ipamamana niya ang kaniyang mga ari-arian sa taong tunay na mag-aalaga sa kaniya.

Sa mga fan ng ganitong uri ng kwento, anong masasabi niyo sa unexpected love story ng bagong kasal? Papasa na ba bilang telenovela?

Kung sa tingin niyo ay mga aso at mga matsing lang ang mga hayop na matatalino, nagkakamali kayo, dahil kung patalinuhan lang din naman ang pag-uusapan, may laban din pala ang mga baboy diyan. Katulad na lang ng mga biik sa kwento na ito na hindi nagpasindak sa pananakot ng kanilang amo.

Kung ano ang ginawa ng mga biik, eto.

Sa isang video mula sa teacher at negosyante na si Marx Barquilla, makikita ang halos sampung mga biik sa kanilang pigpen na nagkukumahog sa pagtakbo.

Paano ba naman kasi, niloloko sila ni Marx na kung sino ang gumalaw sa mga ito ay lulutuin.

Ang mga biik, bigla tuloy tumigil sa pagtakbo at talaga ngang hindi gumalaw na mistulang nanigas sa kinatatayuan nila.

Ayon kay Marx, naisipan niya raw videohan ang mga alaga niyang biik nang magtakbuhan ang mga ito pagkarating niya sa babuyan.

Paliwanag niya, nakikiramdam sa posibleng panganib ang mga baboy kapag tumitigil ang mga ito sa pagglaw.

Pinatunayan naman ito ng wildlife veterinarian na si Dr. Romulo Bernardo at sinabing tatlo ang nagiging reaksyon ng mga baboy sa tuwing may panganib, ‘yan ay ang paglaban, pagtakas, at pagpapatay-patayan o hindi paggalaw.

Dagdag pa niya, bago kumilos ay pinag-iisipan muna nang maigi ng mga baboy kung ano ang gagawin nilang hakbang.

Aniya, ang kadalasang response ng mga biik katulad ng mga alaga ni Marx ay ang mag-freeze. Natututo rin daw ang mga baboy sa pagre-react base sa mga salita at galaw na nakikita nila sa kanilang paligid.

Samantala, para sa mga concerned sa mga kakatwang biik, don’t worry dahil sinabi ni marx na hindi pa naman daw kakatayin ang mga ito dahil kailangan pa silang palakihin.

Sa mga may alagang baboy diyan, bukod sa pagpapanatili sa kalusugan ng mga ito, hinahasa niyo rin ba ang kanilang pag-iisip?

Sabi nga nila, kapag tumatanda ka na, dapat palagian mong dala ang mga i.d. mo kapag lalabas ng bahay. Pero ang lalaking ito sa France, hindi lang basta-bastang lumalabas ng bahay kundi nagmamaneho pa! Partida, wala itong dalang lisensya sa loob ng halos tatlong dekada.

Kung ano ang kinahinatnan ng lalaki, eto.

Isang araw habang nagsasagawa ng routine traffic stop ang mga pulis sa Rhone, France, isang sasakyan ang pinahinto ng mga ito para sa expired technical inspection.

Pero dahil sa offense na yan, sunud-sunod nang naungkat ang mas marami pang violations ng driver.

Ayon sa Tarare Police, nang busisihin nila ang mga papeles ng driver ay napag-alaman na walang insurance ang sasakyan nito.

Ang pinakamalala pa sa lahat, wala pala itong lisensya simula pa noong 1997.

28 taon na pala itong nagmamaneho nang walang lisensya matapos itong ma-revoke nang mahuli na nagmamaneho nang nakainom.

Gayunpaman, tila hindi man lang nabahala ang lalaki dahil ayon sa kaniya, walang saysay ang pagkuha ng mandatory insurance o pagsasailalim sa technical inspections ng kaniyang sasakyan kung wala naman siyang lisensya.

Sa mga nagmamaneho riyan, sigurado ka ba na dala mo ang lisensya mo bago ka maglakwatsa?