EXPLAINERS

Ika nga nila, iba pa rin ang aruga ng isang ina, lalo na sa mga anak na babae. Pero ang batang ito mula sa Utah na maagang naulila sa kaniyang nanay, nakahanap ng mother figure sa kanilang school bus driver na tinulungan siyang maging extra confident sa tuwing papasok sa eskwelahan.

Kung paano ito nagawa ng school bus driver, eto.

Siyam na taong gulang pa lang noon ang batang si Isabella Pieri mula sa Alpine, Utah nang bawian ng buhay ang kaniyang nanay dahil sa isang sakit.

Naiwan si Isabella sa kaniyang tatay na si Philip na maaga namang umaalis sa kanilang bahay para pumasok sa trabaho.

Ngayong nag-iisa na lang ito sa pagtataguyod sa kanilang anak, bukod sa pagsisikap na maibigay ang mga pangangailangan ni Isabella, nakaranas si Philip ng iilang challenges, lalo na at babae ang kaniyang anak.

Ayon kay Philip, pinagupitan niya ng crew cut si Isabella dahil wala siyang ideya kung paano aayusin ang buhok nito. Kung kaya nang muling humaba ang buhok ng bata ay sariling sikap nitong inayusan ang kaniyang buhok ng isang simpleng ponytail.

Pero habang papasok sa eskwelahan, napansin ni Isabella ang kanilang school bus driver na si Tracy Dean na inaayusan ang buhok ng isa sa mga estudyanteng pasahero.

Si Isabella, nag-request sa driver na ayusan din ang kaniyang buhok. Simula noon, araw-araw nang inaayos ni Tracy ang buhok ng bata na sabik na sabik na makita kung ano ang kaniyang magiging hairstyle sa bawat araw.

Samantalang si Tracy naman ay mayroong malalim na koneksyon sa pinagdaanan ni Isabella dahil pinangangambahan niya rin kung sino ang mag-aalaga sa kaniyang mga anak matapos niyang madiskubre na mayroon siyang breast cancer.

Kung kaya ang generous na bus driver, walang pag-aalinlangan sa pagbibigay ng assistance sa kaniyang mga pasahero dahil alam niya na iba pa rin ang kalinga ng isang ina.

Ang kaligayahan na ibinibigay ng mga simpleng hairstyles kay Isabella, kitang-kita ng kaniyang mga teacher dahil kapansin-pansin umano na mas confident na itong pumapasok sa school na siya namang ipinagpapasalamat ng kaniyang tatay.

Sa mga girl-dad diyan, anu-ano ang efforts na ginagawa niyo para masiguro na princess treatment ang ibinibigay niyo sa inyong mga anak na babae?

Hindi na ata lilipas ang araw natin nang hindi nakakarinig ng bad words, lalo na at nagiging expression na ito ng mga tao. Pero narinig mo na ba na mayroon ding mga ibon na nagmumura? Ito ang tila magkakabakarda na mga parrot sa isang zoo sa England na pati ang kanilang mga cutomer ay namura na rin nila.

Kung ano ang reaksyon ng mga customer sa mga palamurang mga ibon na ito, eto.

Agosto noong 2020 nang i-donate sa Lincolnshire Wildlife Park na matatagpuan sa Eastern England ang limang African Grey Parrots na sina Billy, Elsie, Eric, Jade, at Tyson.

Magkakasamang i-dinisplay sa iisang kulungan ang mga parrots.

Pero ilang araw lang ang nakalipas nang dumating ang mga ito sa zoo, agad na naging kapansin-pansin ang pagmumura ng mga ito sa mga bisita.

Ayon sa isang report, ginagawa umanong katuwaan ng mga parrot ang pagmumura para makakuha ng reaksyon mula sa mga bisita.

Sa sobrang bilis matuto ng mga ibon na ito, ibinahagi rin ng CEO ng zoo na si Steve Nichols na sa tuwing dumadaan siya ay tinatawag siyang mataba ng mga nasabing parrot.

Dagdag pa niya, napapabilib umano ang mga bisita sa tuwing nagmumura ang mga parrot at ni minsan ay wala silang natanggap an reklamo dahil dito.

Gayunpaman, pinaghiwa-hiwalay pa rin ng kulungan ang limang parrots at inalis na sa public areas ng zoo ng dahil concerned sila sa mga bumibisita sa kanila na mga bata.

Ikaw, gusto mo na rin bang makita ang mga parrot na ito para mapabilib sa kanilang swearing skills o para maaliw?

Kung mahilig kang tumaya sa lotto, pakinggan mo ang kwento na ito at baka mabuhayan pa ang loob mo. Ang isang mister kasi sa New Jersey, yumaman nang ganun-ganon lang matapos itaya sa lotto ang pera na nakuha niya nang utusan siya ng kaniyang misis na magpa-refund.

Kung magkano ang naiuwing pera ng lalaki, eto.

Nautusan ang noo’y 56-anyos na lalaki mula sa New Jersey na si Tayeb Souami ng kaniyang misis na ibalik sa grocery ang binili nitong isang bote ng orange juice na nagkakahalaga ng $5 dollars o mahigit 200 pesos dahil masyado umano itong mahal.

Sinabihan siya ng kaniyang misis na manghingi ng refund at nakita umano nito na naka-sale ang nasabing orange juice sa ibang tindahan.

Habang nasa grocery store, nakita ni Souami sa isang signage ang jackpot price sa lotto na $306 million o mahigit 17 billion pesos.

Gamit ang refund money, tumaya si Souami at bumili ng dalawang lotto tickets bago umuwi sa kanilang bahay.

Kinabukasan habang nasa isang convenience store, nabigo si Souami nang tingnan sa lottery machine nito na hindi pumasok ang mga itinaya niyang numbers sa una niyang ticket.

Pero nang tingnan ni Souami ang mga itinaya niyang numero sa pangalawa niyang lotto ticket, pati ang staff ng convenience store ay napasigaw nang madiskubre na tumama sa lotto ang lalaki at nasungkit pa ang jackpot prize.

Samantala, napabalita pa ang pagkapanalo ni Souami at sinabi sa isang press conference na gagamitin niya ang napanalunan niyang pera para sa pag-aaral ng kaniyang mga anak na nasa kolehiyo noon at bagama’t nagtatrabaho ito bilang isang accountant ay sinabi rin niya hihingi siya ng tulong sa isang financial advisor.

Sa mga regular na tumataya sa lotto diyan, mas ginanahan ba kayong tumaya matapos marinig ang kwentong ito?

Hindi inaasahan ang naging pagkamatay ng isang nanay matapos maganap ang isang aksidente na nangyari mismo sa loob ng kanilang bahay kung saan kasama niya ang kaniyang anak na naglilinis ng baril na hindi sinasadyang naikasa.

Kung ano ang kinahinatnan ng anak, eto.

Naglilinis ng baril sa kanilang bahay sa Sitio Kilala, Barangay Quipot, Janiuay, Iloilo ang isang hindi pinangalanang lalaki isang umaga.

Habang nililinisan, aksidenteng pumutok ang baril at naglabas ng bala na sa kasamaang palad ay tumama sa kaliwang balikat ng nanay ng lalaki.

Dahil sa tinamong sugat, marami ang dugong nawala sa nanay, idagdag pa na may kalayuan ang kanilang bahay kung kaya hindi ito agarang nakatanggap ng paunang lunas.

Matapos mangyari ang insidente ay agad na sumuko ang anak sa pulisya para magpaimbestiga.

Pero agad din namang pinakawalan ang lalaki dahil pinili ng pamilya na hindi na magsampa ng kaso laban dito.

Samantala, bagama’t nakikita na isang aksidente ang nangyari, muling nagpaalala ang mga otoridad sa mga licensed gun owners na maging maingat sa paghahawak ng kanilang mga baril at siguraduhin na hindi ito kargado ng bala kapag nililinisan.

Sa mga nagmamay-ari ng mga armas diyan, maging mas maingat. Dahil baka sa halip na magamit niyo ito para sa inyong kaligtasan ay ito pa ang magdulot ng kapahamakan sa inyong pamilya.

Tila hango sa isang fantasy film ang ginanap kamakailan na seremonya sa Mexico matapos ikasal ang isang lalaki sa isang hayop, hindi dahil na-in love siya rito, kundi dahil isa itong matagal nang tradisyon.

Ang kwento sa likod ng kakaibang tradisyon na ito, eto.

Ipinagdiwang ang pag-iisang dibdib ng mayor ng San Pedro Huamelula sa Mexico na si Daniel Gutierrez at ng isang babaeng buwaya sa isang magarbong seremonyas.

Sa isang video na ipinost sa social media, makikita ang groom na nakasuot ng puting long sleeved polo na mayroon pang embroidery ng isang buwaya sa kaliwang bahagi ng dibdib nito.

Katulad ng ibang brides, nakasuot din ang maliit na buwaya ng puting wedding gown at kapansin-pansin ang tali na nakapalibot sa bibig nito.

Syempre, hindi matatapos ang kasal kung hindi ito seselyuhan ng isang halik na pagsasaluhan ng bride at groom.

Kakaiba man sa paningin ng karamihan, isa itong tradisyon sa Oaxaca, Mexico na isinasagawa ng indigenous groups na Chontal at Huave sa loob ng 230 years bilang tanda ng kanilang pagbubuklod.

Bukod pa riyan, isa rin sa mga dahilan kung bakit isinasagawa ang tradisyon na ito ay dahil sa paniniwala ng inidigenous communities na magdadala ito ng biyaya mula sa kalikasan kabilang na ang masaganang ani.

Alinsunod sa tradisyon, ipinaparada at dinadala sa mga bahay-bahay ang buwaya habbang suot ang kaniyang wedding gown bago simulan ang seremonyas.

Samantala, kinikilala ngayon si Mayor Daniel bilang hari ng mga Chontal at ang kaniya namang asawa ang prinsesa ng mga Huave.

Ikaw, napapaisip ka rin ba kung ano ang magiging buhay ng bagong mag-asawa matapos silang ikasal?

Madalas ay nagpapamasahe ang mga tao para makaramdam ng ginhawa o di naman kaya ay para mag-relax. Pero ang lalaking ito sa Batangas, sa halip na ma-relax, napraning pa at nagtago dahil napatay nito ang kaniyang masahista na hiningan niya ng extra service.

Kung ano ang kianhinatnan ng lalaki, eto.

Nagtungo sa isang farm sa Norzagaray, Bulacan ang isang babaeng masahista matapos nitong makatanggap ng tawag mula sa isang lalaking trabahador sa nasabing farm para magpamasahe.

Ang isa sanang nakaka-relax na massage session, nauwi sa pagtatalo sa pagitan ng masahista at kliyente.

Inamin mismo ng lalaki na hindi niya ibinigay nang buo ang 2,500 pesos na sinisingil ng masahista dahil nagre-request umano siya ng extra service na hindi naman din niya nakuha. Dahil dito, sinampal at sinabunutan ng masahista ang lalaki.

Ang pagtatalo ng dalawa, nauwi sa biglaang pagtulak ng lalaki sa babae bago niya ito hinampas ng bato sa ulo, sinaksak ng kutsilyo, at pinukpok pa ng bareta sa noo na ikinasawi ng biktima.

Natagpuan na lang ng mga katrabaho ng suspek ang bangkay ng masahista na nakabaon sa lupa malapit sa kubo kasama ang pala na ginamit para hukayin ang lupang pinaglibingan nito.

Sinubukan pang magtago ng lalaki ngunit naaresto rin ito ng mga otoridad sa Lemery, Batangas bitbit ang cellphone ng biktima.

Samantala, hawak na ng mga otoridad ang lalaki at mahaharap sa kasong pagpatay.

Sa mga mahilig mag-book ng massage services diyan, makuntento na lang kasi sa masahe at huwag nang humingi pa ng kung anu-ano. Kung hindi, baka sa halip na ma-relax ay mai-stress ka pa sa kakaharapin mong kaso.

Paniguradong ang iba sa atin ay nasungitan na rin ng mga staff sa mga establisyimentong napuntahan natin na madalas ay dala ng pagod nila sa trabaho. Pero alam niyo ba na ipinagbabawal na ito ngayon sa laguna? Partikular na sa mga hospital workers, lalo na pagdating sa mga pasyente.

Ang detalye ng bagong patakaran na ito, eto.

Pagkaupo pa lang sa pwesto ng bagong gobernador ng Laguna na si Sol Aragones, agad na nitong tinupad ang kaniyang pangako noong panahon ng pangangampanya na ipagbawal sa mga hospital workers ang pagsusungit.

Ang bagong gobernador kasi, naglabas ng executive order kung saan pormal nang ipinagbabawal sa mga hospital workers sa Laguna, lalo na sa mga nasa public hospitals, ang pagsusungit sa mga pasyente.

Ayon sa gobernadora, nais niyang siguraduhin na natutugunan ang pangangailangang pangkalusugan ng mga residente sa Laguna habang tinitiyak na may puso ang serbisyong matatanggap ng mga ito.

Pero batid din niya na maaaring dala ng pagod at kakulangan ng tauhan sa kanilang trabaho ang dahilan kung bakit nagiging iritable ang mga hospital workers.

Samantala, inilagay naman sa siyam na district hospitals sa laguna ang mga posters na nagpapaalala sa publiko at sa mga trabahador na “bawal ang empleyadong mataray.”

Para sa mga laging nasasabihan na masungit diyan, pwede niyo bang i-share ang dahilan kung bakit lagi kayong bugnutin sa trabaho?

Kapag ikakasal ang isang babae, asahan mo nang magbe-beauty rest ito para makasigurado na fresh na fresh ito sa kaniyang wedding day. Pero ibahin niyo ang dedicated na TV reporter na ito sa China, walang kaabog-abog kasi itong sumabak sa coverage na suot ang kaniyang wedding gown dahil sa biglaang pagyanig ng lindol.

Kung natuloy ba ang kasal ng bride, eto.

Kung dedication lang din naman sa trabaho ang pag-uusapan, malakas ang laban ng Chinese TV reporter na si Chen Ying diyan. Bagama’t hindi malinaw kung nagsisimula na ba ang kaniyang kasal o naghahanda pa lang ang bride, wala itong pag-aalinlangan na tumugon sa tawag ng tungkulin.

Agad na dinampot ni Chen ang mikropono at readyng-ready na umere habang suot ang kaniyang wedding gown.

Sa video ng kaniyang news coverage noong taong 2013, makikita si Chen na nag-iinterview ng mga residente sa Yaan City, Sichuan Province na niyanig ng 7.0 magnitude na lindol kung saan mahigit isandaang katao ang binawian ng buhay.

Sa ibang anggulo ng video ay makikita na kasama pa ni Chen ang kaniyang bridesmaids nang lumabas ito para magtrabaho.

Dahil sa nag-viral na video ni Chen habang in action ito suot ang kaniyang gown, nakatanggap ito ng papuri mula sa mga netizen dahil sa kaniyang professionalism at tinawag pa ito na ‘most beautiful bride in the world.’

Samantala, ayon sa reports ay natuloy pa rin naman ang kasal ni Chen at bumalik din sa trabaho matapos nito.

Sa mga dedicated sa trabaho diyan, willing din ba kayo na maantala ang kasal niyo sa ngalan ng trabaho?

Buhay na buhay ang pagbabayanihan sa mga estudyante mula sa Brazil na pinatunayang ang bawat barya ay may halaga lalo na kapag pinagsama-sama. Ang mga estudyante kasi na ito, nag-ambagan, hindi para bilhan ng regalo ang kanilang teacher para sa teacher’s day kundi para ibigay mismo ang nalikom nilang pera sa kanilang guro matapos mapag-alamang hindi pala ito sumusweldo.

Kung magkano ang nalikom ng mga bata, eto.

Ang isang schoolday na inakala ng professor na si Bruno Paiva mula sa Brazil na isang tipikal na araw lamang, punung-puno pala ng surpresa na ihahatid sa kaniya ng mga estudyante.

Pagkapasok kasi ni Bruno sa classroom, agad niyang naramdaman na mayroong kakaiba sa ikinikilos ng kaniyang mga estudyante.

Sa halip na magsimula ang kanilang klase, niyaya muna ng mga students si Bruno na maglaro sa loob ng classroom.

Bagama’t dalawang buwan pa lang noon na nagtatrabaho si Bruno sa kanilang eskwelahan, agad na naging close ang music teacher sa kaniyang mga estudyante.

Sa sobrang closeness ng mga ito, nag-ambagan pa ang mga estudyante para sa kanilang teacher nang madiskubre ng mga ito na nang magsimulang magtrabaho si Bruno sa kanilang paaralan ay hindi pa ito sumasahod. Napag-alaman din nila na natutulog lang ito sa isa sa mga classrooms dahil hindi nito afford na mag-renta ng matutuluyan.

Dahil sa kakapusan, nangamba si Bruno tungkol sa pag-iwan sa minamahal niyang trabaho, lalo na at wala umano siyang ibang pinangarap kundi ang maging isang teacher. Kinakailangan umano kasing magtrabaho ni Bruno sa eskwelahan sa loob ng tatlong buwan bago makatanggap ng kaniyang unang paycheck.

Ang mga mabubuting estudyante, nakalikom ng 400 Brazilian reals na nagpaluha kay Bruno dahil pakiramdam daw niya ay pinoprotektahan siya ng kaniyang mga estudyante.

Samantala, ayon sa social media post ni Bruno noong 2023, sinabi niya na 2018 pa nang baguhin ng mga estudyante ang kaniyang buhay at malayung-malayo na ang sitwasyon niya mula rito.

Sa mga estudyante riyan, willing din ba kayong gumawa ng maliit na sakripisyo para sa ikalawa niyong mga magulang?

Sino ba naman ang hindi gugustuhin na magkaroon ng peaceful at hindi crowded na learning environment? Ganyan ang experience ng dalawang bata na ito sa kanilang eskwelahan sa scotland. Paano nga ba naman ito hindi magiging peaceful kung dadalawa lang silang estudyante rito.

Kung paano ito nangyari? Eto.

Taong 1877 nang itayo ang Duror Primary School sa West Highlands, Scotland na ngayon ay nasa 148 taong gulang na.

Kadalasan ay tinatangkilik ng maraming estudyante ang mga lumang eskwelahan dahil sa legasiya nito at subok na ang serbisyo at turo. Pero kabaliktaran nito ang sitwasyon ng Duror Primary School.

Maliit lang kasi ang paaralan na ito at dalawa lang ang mga naka-enroll na estudyante.

Gayunpaman, mayroon pa rin naman daw itong advantages, dahil ayon sa isa sa mga guro na si Holly Graves, nakakabuo sila ng magandang relasyon sa mga bata dahil labis nilang nakikilala ang mga ito.

Para naman sa dalawa nilang mga estudyante na sina Shannon at Molly, maluwag ang policy sa kanilang eskwelahan dahil hindi katulad ng typical school setup, pinapayagan daw sila na magpunta sa beach para doon gawin ang kanilang school work at pagkatapos nito ay pinapayagan silang magtampisaw sa tubig.

Pero ang eskwelahan, muntik nang ipasara ng lokal na pamahalaan dahil pakonti na nang pakonti ang mga estudyante. Ipinaglaban lang ng mga residente na panatilihin ang operation nito.

Sa katunayan, involved ang buong komunidad sa Duror Primary School dahil mayroon ding mga toddler na nagtitipon doon kasama ang kanilang guardians.

Umaasa naman ang lokal na pamahalaan na mapalaki ang populasyon sa eskwelahan, lalo na at nakikita rin ng mga residente na malaki ang magiging ambag nito sa kinabukasan ng kanilang lugar.

Para sa mga estudyante riyan, gugustuhin niyo rin ba ang ganitong setup? Konti man ang mga kasama, healthy naman ang learning environment.