INTERNATIONAL NEWS

Ipinakalat ng South Korea ang nasa 80 fighter jets nito matapos mamataan ang 180 North Korean military aircraft sa loob ng apat na oras.

Kasamang ipinakalat ng South Korea ang mga F-35A stealth fighter jets at nasa 240 fighter jets na nakilahok sa patuloy na vigilant storm drills kasama ang Amerika.

Napag-alamanan naman na lalong tumaas ang tensyon sa rehiyon mula nang magsimula ang joint drills noong Lunes, na nag-udyok ng galit mula sa Pyongyang.

Inakusahan naman ng SoKor ang karibal nitong bansa hinggil sa naturang aksyon. —sa panulat ni Hannah Oledan

Inihayag ng Russia na dapat gawing pangunahing prayoridad ng mundo ang pag-iwas sa nuclear power clash dahil maaari umano itong magresulta sa ‘catastrophic consequences.’

Nanawagan naman ang Moscow sa iba pang nuclear powers na abandunahin ang mapapanganib na pagtatangka na lumabag sa mahahalagang interes ng isa’t-isa.

Inihayag ito ng foreign ministry sa gitna ng tumataas na pangamba sa paggamit ng nuclear bombs sa salungatan sa Ukraine na umabot na sa ika-9 na buwan nito.

Nakasaad din sa pahayag na ang nuclear doctrine ng Moscow ay pinapayagan lamang ang Kremlin na gumamit ng mga armas sa oras na magkaroon ng nuclear aggression o sakaling lumala ang panganib sa kanilang estado.

Mababatid na ilang ulit nang iminungkahi ng Russia na ang Ukrainian territories na inaangkin ay protektado ng nuclear doctrine nito.

Nanawagan naman sa iba pang nuclear power sa mundo – ang Amerika, Britanya, France at China – na magtulungan para malutas ang naturang ‘priority task. —sa panulat ni Hannah Oledan

Nais ng America na alisin ang Iran bilang ika-45 miyembro ng UN Commission on Status of Women ayon kay US Vice President Kamala Harris.

Sa isang tweet, inanunsyo ni Harris ang intensyon nitong alisin ang Iran sa kanilang hanay ayon na rin sa kagustuhan ng mga nagpoprotesta dahil sa kabiguan nitong maproteksyunan ang welfare ng kababaihan.

Ang protesta ay nagsimula sa pagkamatay ni Mahsa Amini noong Setyembre.

Si Amini ay isang Iranian na inaresto dahil sa hindi pagsusuuot ng Hijab.

Naniniwala ang America na walang bayan ang dapat mang-abuso sa karapatang pantao ng kababaihan. —sa panulat ni Hannah Oledan

Pumalo na sa 20 ang bilang ng mga migranteng nasawi matapos ang pagtaob ng isang bigboat sa baybayin ng Athens, Greece.

Batay sa imbestigasyon ng International Coast Guard, sakay ng nasabing bangka ang 68 migrante mula sa Izmir, Turkey nang hampasin ng malalaking alon ang kanilang sinasakyan.

Kabilang sa mga pasaherong sakay, ang mga Egyptian, Afghans, at Iranians kung saan, 36 na indibidwal pa ang nawawala at patuloy pang pinaghahanap.

Sa ngayon, nagpapatuloy pa ang isinasagawang operasyon ng mga otoridad, matapos ang insidente.

Iniiwasan muna ng mga Pilipino sa Hong Kong na dumalo sa mga selebrasyon o pagtitipon sa nasabing bansa.

Ito’y kasunod ng nangyaring stampede sa Halloween Party sa Itaewon District, Seoul South Korea.

Sinabi ng Filipino community na susundin ang naging kautusan ng gobyerno ng Hong Kong na iwasan dumalo sa halloween festivities.

Ilang kalsada naman ang pansamantalang isinara sa Hong Kong.