INTERNATIONAL NEWS

Itinigil na ng mga otoridad ang search and rescue operations sa mga natabunan ng landslide sa isang campsite sa Malaysia.

Ayon kay Senior Rescue Official Hafisham Mohamad Noor, ito’y matapos na matagpuan ang nalalabing katawan ng isang batang lalaki.

Kabilang sa mga biktima ang labing isang mga bata, habang 61 indibidwal naman ang nailigtas.

Nabatid na 92 indibidwal, kabilang ang ilang mga bata, ang natutulog noon sa nasabing campsite sa Batang Kali, Selangor State noong Disyembre 16, nang maganap ang trahedya.

Aabot naman sa halos 700 personnel mula sa iba’t ibang ahensya ng gobyerno ng Malaysia at emergency services, katuwang ang police tracker dogs at earthmoving machines, ang idineploy para sa search operations.

Inihayag ni Russian President Vladimir Putin, na handa ang kanilang bansa na makipag-negosasyon sa Ukraine.

Iginiit ni Putin, na handa silang makipag-ayos sa mga partidong nasangkot sa bakbakan pero tinanggihan umano sila ng Kyiv maging ang mga taga-suporta nito sa kanlurang bahagi ng naturang bansa.

Nabatid na ang pagsalakay ng Russia sa Ukraine ay nagdulot ng takot sa mga residente kung saan, libu-libong katao ang nasawi at naapektuhan ng pananakop nito.

Una nang nanindigan ang Ukraine, na hindi sila susuko at magpapahinga hangga’t hindi napapaalis ang mga Russian military forces sa lahat ng teritoryo ng kanilang bansa.

Sa ngayon, wala pang pahayag si Ukraine President Zelensky, matapos ang naging pahayag ni Putin.

Pumalo na sa 15 indibidwal ang nasawi habang 40 ang sugatan sa pagsabog ng fuel tanker, malapit sa ospital sa siyudad ng Johannesburg, South Africa.

Ayon sa mga otoridad, naipit sa ilalim ng mababang tulay ang tanker sa lungsod ng Boksburg, na 100 metro mula sa Tambo Memorial Hospital.

Sinubukan ng mga bumbero na apulahin ang apoy kung saan nagkaroon na isa pang malaking pagsabog na sumira sa isang makina at dalawang sasakyang de motor.

Inilikas naman ang mga pasyente mula sa ospital matapos gumuho ang bahagi ng bubong kasunod ng pagsabog. –sa panulat ni Jenn Patrolla

Nasawi ang tatlong indibidwal at tatlo ang sugatan sa naganap na pamamaril sa Central Paris.

Naaresto naman ang 66- taong gulang suspek na target umano ang Kurdish Community Center at Restaurant.

Ang mga Kurd o Kurdish ay tumutukoy sa Iranian Ethnic Group na katutubo sa bulubunduking rehiyon ng Kurdistan sa kanlurang Asya, na sumasaklaw sa timog-silangang Turkey, hilagang-kanluran ng Iran, hilagang Iraq, at hilagang Syria.

Ayon kay Paris Mayor Anne Hidalgo, ay isang far right activist ang naturang suspek.

Samantala, sinasabing nag-ugat ang naturang insidente dahil sa Hate Crime o Racism. —sa panulat ni Hannah Oledan

Bumilis sa 3.7%  ang inflation rate sa Japan nitong Nobyembre, pinakamataas simula noong December 1981.

Dahil ito sa pagtaas ng presyo ng enerhiya, presyo ng bilihin at pabagu-bagong mga gastos sa sariwang pagkain.

Sinabi naman ng Bank of Japan na hindi magtatagal ang naturang cost-push inflation, kaya makakamit ang 2% target nito sa isang matatag at napapanatiling paraan.

Isang bumbero ang nasawi matapos sumabog ang isang fuel tank sa siyudad ng Barranquilla sa Colombia.

Kinilala ang biktima na si Javier Solano, 53-anyos, na nahulog habang nagaganap ang naturang pagsabog.

Ayon kay Barranquilla City Mayor Jaime Pumarejo, pinalikas na ang mga residente malapit sa lugar.

Sinabi ng mga otoridad na posibleng tumagal ng tatlo hanggang apat na araw bago tuluyang maapula ang apoy.

Mananatili namang suspendido ang operasyon ng pantalan sa Barranquilla hanggang sa maging fully controlled na ang sunog.

Samantala, tiniyak naman ni Colombian President Gustavo Petro ang suporta sa alkalde ng siyudad.

Bubuksan na para sa publiko ang isang kuweba sa Israel bilang pilgrimage site na pinaniniwalaang libingan ng midwife na nagpaanak umano sa Birheng Maria.

Nadiskubre ng mga eksperto ang kuweba taong 1982 at nakahanap ng mga artifacts na nagpapatunay sa mga nakasaad sa Book of James.

Samantala, may nahukay pang karagdang artifacts ang mga eksperto sa gitna ng kanilang paghahanda na siyang nagpapatunay sa existence ni Salome.

Mababatid na lumitaw si Salome sa Gospel of James bilang isang kasama ng hindi pinangalang midwife sa Nativity of Jesus. —sa panulat ni Hannah Oledan