INTERNATIONAL NEWS

Umabot na sa siyam ang naitalang nasawi matapos makaranas ng pag-ulan ng makakapal na mga niyebe o heavy snow sa Hokkaido, Japan.

Ayon sa Japanese self-defense force troops, kabilang sa mga biktima ang isang lalaki na natagpuang nakabalot ang katawan nito sa kaniyang anak para mapanatili ang mainit na temperature ng kaniyang anak at masiguro ang kaligtasan nito sa malamig na panahon.

Sa pahayag ng mga otoridad, mapanganib ang malamig na temperatura na nararanasan ngayon sa kanilang bansa.

Dahil dito, daan-daang mga sasakyan ang nastranded sa gitna ng kalsada bunsod ng makapal na yelo at naantala din ang biyahe ng mga tren habang nawalan naman ng suplay ng kuryente ang maraming residente dahil sa mga nagbagsakang niyebe.

Sa ngayon, patuloy na nagsasagawa ng operasyon ang mga volunteer para mamahagi ng mga pagkain at iba pang pangangailangan ng mga pamilya lalo na sa mga nastranded sa loob ng kanilang mga sasakyan.

Umabot sa 57.5% ang boto sa isinagawang poll ni twitter CEO Elon Musk.

Ipinapakita sa resulta na ito na marami ang pabor na bumaba siya sa pwesto.

Nabatid na nagpost sa twitter ang CEO noong December 19, 2022 at inilagay nito ang na tanong sa poll na kung dapat ba siyang magbitiw sa pwesto at marahan niya aniyang susundin ang kalalabasan nito.

Samantala, nasa 42.5 % naman ang bumoto ng “No’ sa naturang poll.

Dalawang indibidwal ang nasawi matapos ang tumamang magnitude 6.4 na lindol sa siyudad ng Eureka sa Northern California.

 Naitala rin ang ilang serye ng aftershocks matapos ang lindol sa lugar, kung saan inaasahan ng US geological survey ang mas maraming aftershocks sa mga susunod na araw.

 Sa lakas ng pagyanig, ilang kabahayan, kalsada at water systems ang napinsala.

 Ayon sa mga otoridad, 11 katao ang napaulat na nasugatan habang aabot naman sa 70 libong residente ang nawalan ng kuryente.

 Nagpapatuloy naman ang damage assessments sa lugar kung saan, nakapagtala ng malaking pinsala sa Rio Dell habang moderate damages naman ang naitala sa Eel River Valley.

Magsasagawa ang Russia at China ng joint naval exercise sa East China Sea.

Ayon sa defense ministry ng Russia na magsisimula ang nasabing drills sa Disyembre 21 -27.

Layunin nito na mapalakas ang kooperasyon sa pagitan ng dalawang navies sa pagpapanatili ng kapayapaan sa katahimikan sa Asian Pacific Region.

Samantala, magpapadala ang China ng 2 nilang destroyers at ilang mga barkong pandigma.

Kasama sa naval exercise ang joint anti-submarine warfare at training para sa missile launches.

Karagdagang $304M na military aid ang ibinigay ng United Kingdom sa Ukraine.

Ayon kay British Prime Minister Rishi Sunak, kinabibilangan ito ng mga bala upang matiyak na hindi maubusan ang Ukraine.

Nabatid na isinagawa ang anunsiyo sa naganap na Joint Expeditionary Force (JEF) Summit sa Latvia.

Ang JEF Summit ay dinaluhan ng mga bansang Denmark, Estonia, Finland, Iceland, Latvia, Lithuania, The Netherlands, Norway, Sweden at the United Kingdom.

Labing limang militante ang nasawi matapos ang dalawang beses na US airstrike sa Hirshabelle State Somalia.

Sa pahayag ng US Military sa Africa, nagkasa sila ng two “collective self-defense” strikes laban sa naturang grupo bunsod na rin ng kahilingan ng Federal Government ng Somalia at bilang pagpapakita ng suporta sa Somali National Army Forces.

Layunin nitong matigil na ang pagsasagawa ng ibat-ibang kaguluhan na kinasasangkutan ng mga militanteng grupo.

Nabatid na sa unang airstrike, pitong militante ang naitalang nasawi at walo naman sa pangalawang airstrike habang sugatan naman ang iba pa.

Sa ngayon, patuloy pang nagsasagawa ng operasyon ang mga military forces sa nabanggit na lugar.