HOT STORIES OF THE WEEK

Tuluyan nang kinasuhan ng kriminal ng Philippine National Police (PNP) si Daraga, Albay Mayor Carlwyn Baldo.

Kasunod ito nang pagkaka kumpiska ng ibat ibang uri ng barul at pampasabog sa bahay ni Baldo sa Albay.

Ang kasong paglabag sa Republic Act 10591 o Comprehensive Firearms and Ammunitions Act sa Albay Provincial Prosecution Office.

Magugunitang Martes nang isilbi ng mga otoridad ang search warrant sa bahay ni Baldo kung saan nakumpiska ang dalawang kalibre kuwarentay singkong baril, isang magazinr ng uzi na maypitong bala, bala ng grenade launcher, walong bala ng kalibre kuwarentay singo at bala ng M16 rifle.

Pinayuhan ng Malakanyang ang mga kontra sa pagbaba sa siyam na taong gulang ng criminal liability ng mga nagkakasala sa batas.

Ayon kay Presidential Spokesman Salvador Panelo, dapat munang basahin ang nilalaman ng probisyon ng nasabing panukala sa halip na kumontra base sa maling impormasyon at kamangmangan.

Sinabi ni Panelo na maaring sadyang hindi alam o nagtatanga tanghan lang ang mga kontra sa nasabing panukala sa realidad na napakatalino na ng mga kriminal para gamitin ang umiiral na juvenile act para pagsamantalahan ang mga bata at makatakas ang mga sindikato sa kanilang pananagutan.

Nakasaad aniya sa panukala na walang parusang pagkakulong ang ipapataw sa mga batang offenders na siyam na taong gulang pababa.

Ang mga youth offender na may edad siyam pataas at hindi lalampas sa labing walong taong gulang ay hindi ikukulong kundi ilalagay lamang sa youth care facilities at may gagabay na mga doktor, psychologist at social workers.

Binigyang diin ni Panelo na applicable lamang ang maximum penalty na reclusion perpetua sa mga kriminal na gumagamit sa mga bata para maisakatuparan ang kanilang criminal activities.

Hindi umano dapat i-asa lang sa law enforcement ang solusyon sa problema ukol sa juvenile delinquency.

Ito ang pahayag ng Philippine National Police (PNP) sa gitna ng usapin ukol sa pagbaba ng age of criminal liability.

Ayon kay PNP Chief Dir. Gen. Oscar Albayalde, dapat pag-aralan ang nasabing panukala ng academe, mga institusyon at mga ahensya ng gobyerno.

Sinabi ni Albayalde na maaari rin aniyang ang mga batang nagkasala ay biktima rin ng mga matatanda o kahit pa ang kanilang mga magulang na ginagamit sila sa iligal na gawain kaya dapat din maparusahan ang mga ito.

Natagpuan sa isang palaisdaan sa Ligao City, Albay ang isa sa mga baril na ginamit sa pagpatay kay Ako Bicol Party list Rep. Rodel Batocabe.

Ayon kay Chief Supt. Amador Corpus, Criminal Investigation Detection Group (CIDG) director, posibleng ang nakitang baril sa palaisdaan sa Purok 3 Barangay Busay ay ang armas na ginamit ng isa sa mga gunmen na si Henry Yuson.

Una rito, naaresto na si Daraga Mayor Carlwyn Baldo na siyang itinuturong utak sa pagpatay sa kongresista.

Dinakip si Baldo dahil sa kasong illegal possession of firearms ngunit itinakbo ito sa ospital matapos sumpungin ng hika.

(with report from Jaymark Dagala)

Hindi pa isinasara ng Philippine National Police (PNP) ang kaso ng pagpatay kay Ako Bicol Party-list Representative Rodel Batocabe.

Ito ay kahit pa naaresto na kahapon ang itinuturong utak ng krimen na si Daraga, Albay Mayor Carlwyn Baldo.

Sa panayam ng DWIZ, sinabi ni PNP Spokesman Senior Superintendent Bernard Banac na patuloy ang pangangalap nila ng ebidensya at impormasyon sa pagpatay sa mambabatas.

“Ang sinasabi natin dito ay resolved but not yet closed, patuloy pa rin ang pangangalap natin ng ibang impormasyon na puwedeng maihabol na related sa kaso, patuloy pa rin ang pagmamanman ng ating task force.” Ani Banac

Sa usapin naman ng reward, sinabi ni Banac na pinag-aaralan na ng mga awtoridad ang mga indibiduwal na dapat pagkalooban nito.

“Kailangan maging sigurado tayo sa pagbibigay ng reward, dapat may pag-aaral kung sino ang dapat na bibigyan at kugn anong halaga ang ibibigay. Ito’y isang collective decision, meron ‘yang binuo na technical working group na siyang magde-determina kung magkano at kung sinmo ang bibigyan njg halaga.” Pahayag ni Batocabe

—-

Nagbunyi ang malaking porsyento ng mga residente sa tatlong lugar na nais mapasama sa Bangsamoro Autonomous Region in Muslim Mindanao (BARMM).

Ito ay matapos bumoto ng “yes” ang mayorya ng mga botante mula sa Cotabato City, Lanao del Sur at Maguindanao para mapasama ang mga nasabing lugar sa BARMM.

Ayon sa Commission on Elections (Comelec), sa Cotabato City naitala ang 36, 682 yes votes at 24, 994 no votes, yes votes sa Lanao del Sur – 503, 420 at no votes – 9, 735 at sa Maguindanao, ang yes votes ay nasa 599, 581 at no votes – 9, 096.

Ang mga nasabing resulta ay magiging opisyal kapag na canvass ito ng Comelec dito sa Maynila.

Ibabasura ng Senado ang panukalang batas mula sa Kamara na nagpapababa sa minimum age of criminal responsibility.

Ayon kay Senador Richard Gordon, chairman ng Senate committee on justice, sa halip na siyam na taong gulang ay isusulong ng Senado ang labindalawang taong gulang.

Paliwanag ni Gordon masyadong musmos ang siyam na taong kumpara sa dose anyos na nakakaintindi na umano ng tama at mali.

Samantala, nakatakda namang magpatawag muli si Gordon ng pagdinig sa Biyernes upang magawan na ng committee report na ihaharap niya sa Lunes.

Naaresto na si Daraga, Albay Mayor Carlwyn Baldo ang itinuturong mastermind sa pagpatay kay Ako Bicol Partylist Rep. Rodel Batocabe at bodyguard nitong si SPO2 Orlando Diaz.

Dakong alas dos y medya ng hapon nang arestuhin ng Philippine National Police – Criminal Investigation and Detection Group (PNP – CIDG) si Baldo sa kanyang bahay sa Barangay Tagas sa kasong illegal firearms.

#TINGNAN: Pagsisilbi ng search warrant kay Daraga Mayor Carlwyn Baldo para sa illegal possession of firearms | via @jaymarkdagala pic.twitter.com/Vnmvezqzjc

— DWIZ Newscenter (@dwiz882) January 22, 2019

Sa bisa ng search warrant ni Executive Judge Elmer Lanuzo ng Legazpi Regional Trial Court (RTC), sinuyod ng CIDG ang bahay ng alkalde at kabilang sa nakumpiska ang dalawang caliber 45 pistols, kabilang ang isang kargado ng mga bala; isang magazine ng uzi machine pistol at mga bala ng M16 rifle.

Narekober din ang isang puting sports utility vehicle na Isuzu Alterra na may plakang BCW – 941.

Magugunitang naghain ang pulisya ng mga kasong murder at frustrated murder laban kay Baldo kaugnay sa krimen.

(with report from Jaymark Dagala)

Inalmahan ng United Nations International Children’s Emergency Fund o UNICEF ang paglusot sa house committee level ng panukalang batas na nagpapababa sa edad ng criminal liability na siyam mula sa 15.

Iginiit ng UNICEF na walang sapat na ebidensya at datos na nagpapakitang mga kabataan ang responsable sa tumataas na crime rate sa bansa.

Kung ang tunay anilang layunin ng panukala ay protektahan ang mga kabataan, sino naman ang pipigil sa mga sindikatong gumagamit ng mga mas bata sa iligal na aktibidad.

Ipinunto pa ng UNICEF na kung ibababa pa ang edad ng criminal responsibility, tila naniniwala na rin ang gobyerno na ang mga edad siyam ay katulad ng 18 anyos na kayang magdesisyon kung sino ang iboboto, papakasalan o pipirma sa kontrata.

Ipinaliwanag din ng naturang humanitarian organization na ang pagpapababa sa criminal age liability ay hindi naman sagot sa ugat ng mga problema sa lipunan gaya ng kahirapan, kakulangan ng parenting support programs, access sa edukasyon at iba pang social services.

Pabor si Senator Panfilo Lacson sa panukalang batas na ibaba sa siyam mula sa labinlima ang edad ng criminal liability sa ilang kondisyon.

Ayon kay Lacson, kanya lamang susuportahan ang panukala ay kung mapapatunayan na alam at nauunawaan ng isang siyam na taong gulang ang ginawa lalo’t kung mabigat o seryoso itong krimen.

Ikalawa ay kung sususpindehin ang sentensya hanggang umabot ang bata sa age of majority at kung may sapat at mahusay na pasilidad para magbigay ng counselling at rehabilitation sa mga batang masasangkot sa krimen.

Kung mayroon lamang anyang mga ganitong nakapaloob sa bill ay maaari niya itong suportahan subalit nakabatay pa rin ang panukala sa science-based testimonies ng mga eksperto.

Samantala, inihayag naman ni Senate President Vicente “Tito” Sotto na noon pang panahon ni dating Manuel Quezon na siyam na taong gulang ang age of criminal responsibility.

Mayroon na anya siyang inihaing bill na ibaba sa edad na dose ang age of criminal liability gaya sa ibang bansa.