HEADLINES

Nagbigay ng babala si Philippine National Police Chief Police General Guillermo Eleazar nitong sabado tungkol sa pakikipagsabwatan ng mga kandidato sa mga sindikato para masiguro ang kanilang pagkapanalo sa susunod na taon ng eleksyon.

Ani Eleazar, itoy dahil sa posibilidad na maaaring pondohan ng mga sindikato ng iligal na droga ang kampanya ng ilang kandidato kapalit ng proteksyon sakaling palarin na manalo.

Inihalimbawa rin niya ang kaso ng alkalde sa Quezon Province na naaresto noong 2001 sa pagbabyahe ng shabu gamit ang ambulansya at ang insidente nitong Hunyo na naresto ang alkalde ng Maguindanao dahil sa iligal na droga na nagkakahalaga ng dalawang daang libong piso.

Babala pa ni Eleazar na siya mismo ang mag-eexpose at mangunguna sa pagsasampa ng disqualification at mga kaukulang kaso kung makakalap ito ng sapat na ebidensya.

Pansamantalang itinigil ng Department of Health ang pagtanggap ng mga deliveries ng face shields mula sa kontrobersiyal na Pharmally Pharmaceuticals Corporations.

Ayon kay Health Undersecretary Atty. Charade Mercado-Grande, habang hindi pa natatapos ang imbestigasyon hinggil sa tampering ng manufacturing dates ng mga face shields na binili ng kompanya.

Napagpasyahan ng kagawaran na hintayin muna ang resulta ng naturang imbestigasyon.

Aniya, base sa inilabas na utos ni Health Secretary Francisco Duque III, magsasagawa muna ang kanilang hanay ng comprehensive review sa mga naturang face shields.

Sa kasalukuyan, nasa limang daang libong piraso ng face shield ang naideliver na ng Pharmally sa DOH.

Umakyat na sa 2,580,173 ang kabuuang kaso ng Covid-19 sa bansa.

Sa datos ng Department of Health o DOH ito’y  makaraang madagdagan ng 14,786 na bagong kaso ng virus.

Sa nasabing bilang, nasa 144,061 na ang  aktibong kaso ng virus sa bansa.

2,397,456 naman ang bilang ng mga gumaling sa Covid-19 dahil sa karagdagang 894 na  bagong gumaling.

Samantala, 164 naman ang bagong nasawi sa  Covid-19 sa bansa dahilan para sumirit sa 38, 656 ang kabuuang bilang ng mga nasawi bunsod ng Covid-19.

” wag mapanatag sa pagbaba ng kaso ng Covid-19 sa bansa “.

Ito ang paalala ng Department of Health o DOH sa publiko dahil maraming pilipino ang hindi sumusunod sa ipinapatupad na mga minimum health protocols.

Ayon kay DOH Undersecretary Maria Rosario Vergeire, mahigit siyamnapung lugar na nasa alert level 4 ang nasa high risk level ang utilization ng kanilang mga ospital.

Dagdag ni Vergeire, pinag-aaralan at sinusuri nila ng mabuti ang trend ng covid kung patuloy na bababa ito.

Aniya, kailangan pa nilang makumpleto ang mga datos hinggil sa mga factors na nakakaapekto sa outputs ng mga laboratoryo.

Dumating na sa bansa ang mahigit walong daang libong Pfizer Biontech Covid-19 vaccines.

Lumapag sa Ninoy Aquino International Airport o NAIA Terminal 3 via Emirates Flight EK332 ang 889,200 doses na bakuna na donasyon ng bansang Amerika.

Umabot na sa 75.59 milyong doses ng ang kabuuang Covid-19 vaccine na natanggap ng bansa kung saan kalahati nito ay bakunang mula sa China.

Una nang inanunsiyo ng US government na nasa lima punto limang milyon Pfizer vaccine ang ipapadala sa pamamagitan ng Covax facility sa susunod na linggo.

Sa ngayon, nasa 17, 840, 230 doses ng Covid-19 vaccine ang kabuuang suplay ng bakuna na natanggap ng Pilipinas mula sa Covax.

Posibleng umabot ng dalawang piso ang taas presyo sa produktong petrolyo ngayong linggo.

Magkakaroon ng taas presyo sa kada litro ng gasolina mula P1.45 hanggang P1.55.

Habang  P1.95 hanggang  P2.05 ang dagdag sa kada litro ng diesel.

Samantala, P1.90 hanggang P2 naman ang taas presyo sa kada litro ng kerosene.