FEATURES

Karamihan sa atin, nagkaroon ng childhood crush. Ang iba, naranasan pang magbigay o makatanggap ng candies at flowers noong kabataan.

Pero next level ang isang 4-year-old na batang lalaki mula sa Sichuan, China dahil imbes na simpleng gamit o pagkain, ginto na nagkakahalaga ng halos P850,000 ang ibinigay niya sa kanyang crush!

Tuwang-tuwa at excited ang batang babae sa kanyang natanggap na “engagement gift”, kaya ipinakita niya ito sa kanyang mga magulang.

Ngunit gulat at pagtataka ang naramdaman nila nang tumambad sa kanilang harapan ang ginto. Agad nilang kinontak ang pamilya ng batang lalaki upang isauli ang mamahaling regalo.

Dito na napag-alamang bago mangyari ang insidente, sinabihan ng mga magulang ang batang lalaki na mapupunta sa kanyang magiging asawa ang itinagong gold bar.

Hindi naman nila inasahang palihim itong kukunin ng bata upang ibigay sa kaklase niyang nakikita niya bilang kanyang future bride.

Kung ang apat na taong gulang na bata nga, kayang magbigay ng ginto sa kanyang crush, paano pa ang mga nasa tamang edad na?

Hindi ibig sabihin nitong dapat kang magbigay ng literal na ginto sa iyong kasintahan. Sa tamang pagtrato, respeto, at tunay na pag-ibig, higit pa sa ginto ang matatanggap ng iyong minamahal.

Trending ngayon sa South Korea ang pagprito at pagkain ng toothpick!

Sa isang viral video mula sa TikTok, makikita kung paano ibinabad sa tubig at iprinito ang toothpick na nagmistulang curly fries matapos maluto.

Ayon sa ilang nakakain, kalasa nito ang fried rice cakes na maaari ring lagyan ng seasoning katulad ng cheese at spicy powder.

Hindi gawa sa kahoy, gaya ng nakasanayan natin, ang mga toothpick mula sa South Korea. Mula ito sa sweet potato at corn starch, kaya naman environmentally friendly at biodegradable ito.

Gayunman, nagbabala ang Ministry of Food and Drug Safety (MFDS) ng South Korea laban sa pagkain ng toothpick.

Ayon sa kagawaran, hygiene product at hindi dapat gawing pagkain ang toothpick. Hindi rin verified kung ligtas itong kainin.

Maging paalala sana ito na huwag basta-basta sumubok sa anumang trending na challenge sa social media. Mag-research muna at tiyaking safe ito dahil mas mahalaga pa rin ang iyong kaligtasan kaysa likes at shares.

Simula pagkabata, close at hindi mapaghiwalay ang magkapatid na sina Abby at Brittany Hensel. Hindi na ito nakapagtataka dahil literal na magkadikit sila bilang conjoined twins.

Unang nakilala ang kambal matapos mag-guest sa isang sikat na talk show. Nagkaroon din sila ng sariling reality series.

Ngayon, isang major life milestone ang kanilang nakamit dahil kasal na ang isa sa kanila!

Kinasal si Abby sa nurse at US Army veteran na si Josh Bowling; samantalang single si Brittany.

Kahit mayroon silang sariling puso, utak, lungs, stomach, at kidney, iisa lang ang ari at katawan ng kambal. Gayunman, magkaibang tao sina Abby at Brittany—legally speaking.

Dahil dito, maaari pa ring magpakasal si Brittany sa ibang tao kung mapagdesisyunan niya ito.

Sa isang documentary na pinamagatang Joined for Life, ibinahagi ng kanilang inang si Patty Hensel na interesadong magkaroon ang kambal ng mga anak sa darating na panahon.

Dahil gumagana naman nang maayos ang kanilang reproductive system, hindi ito imposibleng mangyari sa hinaharap.

Sa kabila ng pagiging kakaiba, hindi pumapayag sina Abby at Brittany na maging biktima ng kanilang pisikal na kapansanan. Nagsisikap silang mamuhay nang normal at produktibo, at dapat itong hangaan at respetuhin.

Kung titignan, aakalain mong mula sa ibang planeta ang mga nilalang na ito na naglalabas ng puting sapot.

Ito ang tinatawag na nemertea o ribbon worm, isang uri ng marine animal na naninirahan sa lupa o pinakailalaim ng dagat.

Appendage, o bahagi ng katawan na may kakaibang appearance at function, ang lumalabas na weblike substance sa ribbon worm. Tinatawag itong proboscis, isang organ na ginagamit ng invertebrates upang makahuli ng pagkain.

Ilan sa mga kinakain ng ribbon worms ang crab, snail, fish, at iba pang uod.

Bukod sa pagkain, ginagamit din ng ribbon worms ang kanilang proboscis bilang defense mechanism upang takutin ang kanilang predators.

Mayroong toxins ang proboscis na nagpapahina at paralyze sa prey ng ribbon worms, pati na rin sa mga magtatangkang kumain nito.

Kakaiba man ang ribbon worms, hindi ito dapat guluhin at saktan dahil gaya ng lahat ng nilalang sa mundo, mayroon itong mahalagang papel sa kalikasan.

Mahilig ka bang kumain ng potato chips? Hindi nakapagtataka kung oo, dahil bukod sa masarap itong pang-meryenda, lalo na habang nanonood ka ng favorite series mo, may vitamins at minerals din ito tulad ng potassium, vitamins E, C, and B6, at manganese.

Sa India, patok ang potato chips na gawang kalye dahil sa taglay nitong crispiness. Kahit ikaw mismo, pwedeng pwede gumawa ng Indian potato chips sa iyong bahay, basta sundin mo lang ang proseso at sikreto sa paggawa nito.

Kailangan munang ilagay ang mga patatas sa isang machine na may tubig upang malinisan ang mga ito. Tubig-ilog ang ginagamit ng ilang street vendors sa India.

Matapos ang ilang minutong paghahalo, bubuksan na ang machine kung saan mahuhulog ang mga patatas sa isang balde.

Gamit ang potato slicer, hihiwain na ang mga patatas sa ibabaw ng kumukulong mantika. Para hindi magdikit-dikit ang chips, kailangan itong patuloy na haluin.

Habang piniprito ang potato chips, dito na ilalagay ang isang kutsara ng saltwater o tubig-alat. Bukod sa nagbibigay ito ng kakaibang flavor, ito rin ang dahilan kung bakit nagiging malutong ang potato chips.

Kapag naririnig na ang crisp sound, pwede na itong i-scoop at lagyan ng iba’t ibang seasonings.

Masarap na, murang-mura pa ang Indian street food na ito. Hindi na nakapagtatakang patok ito sa mga Indian, pati na rin sa mga turista.

Paraiso para sa mga hayop, partikular na sa mga pusa, ang lungsod ng Istanbul sa Turkey.

Dito, hindi itinataboy ang mga pusa. Maging ang mga aso, malayang nakakagala sa mga lansangan nang hindi sinasaktan at ginugutom.

Kahit saan ka mapadpad sa Istanbul, hindi mawawala ang mga pusa. Sila ang sasalubong sa iyo sa bus stops, ferries, parks, at maging sa restaurants.

Walang nagmamay-ari sa mga pusa rito, ngunit tinitiyak ng mga residente na mayroon silang pagkain, inumin, at lugar na matutulugan.

Itinuturing na “quintessential pet” sa Islam ang mga pusa dahil sa taglay nitong kalinisan. Dahil higit sa 99% ng populasyon sa Turkey ay Muslim, itinuturo itong rason kung bakit alagang-alaga sa Istanbul ang mga pusa.

Kahit iba man ang relihiyon, maaari pa rin natin subukang gawing paraiso para sa lahat ng hayop ang sarili nating lugar; dahil ayon nga sa mga taga-Istanbul, ang mga taong hindi marunong magmahal sa mga hayop ay hindi kayang magmahal nang tunay sa iba.

Marami sa atin ang nais magkaroon ng sariling negosyo. Pero bago sumabak sa negosyo, dapat alamin mo muna kung ano ang siyensya sa likod ng sales o advertising dahil ito ang susi sa pagkakaroon ng successful business.

Sa katunayan, mayroong tatlong salita na kahit kailan, hindi mo dapat gamitin sa pang-eengganyo ng customers.

Una, expensive. Ayaw ng customers na malamang bumibili sila ng mahal dahil iisipin lang nilang sobra ang binayad nila. Imbes na sabihing expensive ang iyong produkto, tawagin mo itong premium.

Hindi mo rin pwedeng tawaging cheap ang iyong produkto o serbisyo dahil sa tingin nila, mayroon itong low quality. Instead, sabihin mong affordable ito para maisip ng customers na makakakuha sila ng good deal.

Panghuli sa listahan ang salitang try. Kapag sinabi mong try, iisipin ng iyong customers na may tiyansang mag-fail ang iyong produkto o serbisyo kung susubukan nila ito. Kung gamitin mo naman ang salitang explore, maipapahiwatig mong may opportunity pa itong mag-grow.

Mahalaga ang mabuting pagpaplano at pag-aaral sa negosyo, lalo na kung nagsisimula ka pa lang palaguin ito. Kaya kung gusto mong magtagumpay rito, sundin mo lang ang tips namin at paniguradong dadagsa ang iyong customers.

Lahat tayo, pamilyar sa hypnosis, isang kondisyon kung saan mas nagiging focused ang isang tao at nawawalan ng kontrol sa kanilang sariling aksyon at pag-iisip. Dahil madaling maimpluwensiyahan ang taong na-hypnotize, sumusunod agad ito sa anumang mungkahi o utos.

Ngunit alam mo ba na kapag gumuhit ka ng straight line sa harap ng isang nakahigang manok, mahi-hypnotize mo na ito?

Kapag makaramdam ng panganib ang ilang mga hayop, magpapanggap silang patay upang makaiwas sa peligro. Tinatawag ang behavior na ito na ‘tonic immobility,’ isang fear-based response na magdudulot ng temporary paralysis. Mas kilala natin ito bilang ‘play dead.’

Ito mismo ang nangyayari sa manok kung hawakan mo ito at guhitan ng tuwid na linya sa harapan nito. Hindi makagagalaw ang manok dahil bukod sa na-restrain ito ng itinuturing niyang predator, magfo-focus lang ito sa linya. Sa isipan ng manok, malapit na itong mamatay. Agad namang babalik ang senses nito kung buburahin ang linya.

Bagamat mukhang harmless at entertaining ang chicken hypnotism, hindi mo dapat ito subukan dahil nagdudulot ito ng malubhang stress at pagkatakot sa mga manok.

Tuwing panahon ng exams, may ilang paraan ang mga guro upang maiwasan ang pandaraya. Mayroong mga pinaglalayo ang upuan ng mga mag-aaral; mayroon ding kinukumpiska ang kanilang gadgets bago magsimula ang pagsusulit.

Dito sa atin sa Pilipinas, nauso naman ang pagsusuot ng anti-cheating hats. Agad na nag-viral worldwide ang videos at photos tungkol dito dahil sa pagiging unique at creative ng mga estudyanteng Pinoy.

Ginawang requirement ng ilang mga guro ang pagsusuot ng anti-cheating hats upang hindi makasilip ang mga estudyante sa papel ng kanilang mga kaklase habang nage-exam.

Maaari namang gumawa lang ng simpleng sombrero ang mga estudyante, ngunit hindi nila pinalagpas ang pagkakataong ito upang ipakita ang kanilang pagiging malikhain.

Mayroong mga mag-aaral na gumawa ng headgear na katulad ng sa ilang anime characters mula sa Pokémon, Naruto, Boku no Hero Academia, Chainsaw Man, at iba pa. Ang ilan, nagsuot pa ng wedding veil at helmet ng motor. May isang estudyante pa ngang pinantakip sa kanyang mukha ang sarili nitong underwear!

Ngunit ayon sa obserbasyon ng ilang netizens, posibleng magamit mismo ang anti-cheating hats upang makapandaya. Anila, maaari itong lagyan ng kodigo sa loob. Pagkontra naman ng iba, maaari namang i-check muna ang mga sombrero bago magsimula ang exam, kaya wala dapat ipag-alala.

Magandang paraan man ang anti-cheating hats upang mapanatili ang katapatan at integridad, nakatutulong din ang nakatutuwang paggawa nito upang mabawasan ang stress ng mga mag-aaral mula sa kanilang nararamdamang pressure tuwing exam.