FEATURES

Sa China — natikman at naranasan ng mga kabataang tsino ang masiglang kultura ng Pilipinas sa programang “building bridges” na inilunsad ng Consulate General ng Pilipinas sa Guangzhou. Ginanap ito sa Jingshi Aoyuan Nanao experimental school bilang bahagi ng pagdiriwang ng Buwan ng Wika at ika-50 anibersaryo ng ugnayang diplomatiko ng Pilipinas at Tsina.

Tatlumpung piling estudyante ang lumahok sa mga larong tradisyunal gaya ng patintero, luksong tinik, at sipa, na naghatid ng kasiyahan at aral tungkol sa samahan, tiyaga, at pagkakaisa. Tampok din ang mga bugtong sa iba’t ibang wikang pilipino, na kanilang inihalintulad sa katumbas na mí yǔ ng kulturang tsino.

Bukod sa laro at palaisipan, natikman din ng mga estudyante ang ensaymada, ube, at kalamansi juice — mga pagkaing nagbigay lasa sa kulturang Pinoy.

Ayon kay Consul General Iric C. Arribas, layunin ng programa na itaguyod ang wika at kulturang Pilipino habang pinapalalim ang pagkakaibigan at pag-unawa sa pagitan ng dalawang bansa.

Mas pinalawak pa ng DENR, Provincial Government of Bataan, at AboitizPower ang taniman ng mangrove sa Orani, Bataan.

Nilagdaan ang Memorandum of Agreement nina Environment Secretary Raphael Lotilla, Bataan 3rd District Representative Gila Garcia, Orani Municipal Mayor Antonio Arizapa Jr., GNPower Mariveles at GNPower Dinginin President and CEO Aldo Ramos, at kinatawan mula sa Tubo-Tubo Fisherfolk Association.

Sa ilalim ng kasunduan, magtatanim at aalagaan ang karagdagang sampung ektaryang bakawan sa Orani. Dahil dito, aabot na sa dalawampung ektarya ang kabuuang mangrove site na pangangalagaan ng AboitizPower sa lugar.

Ang proyekto ay bahagi ng Project TRANSFORM o Transdisciplinary Approach for Resilience and Environmental Sustainability through Multistakeholder Engagement ng DENR.

Bukod sa pagiging tirahan ng mga lamang-dagat, malaking tulong din ang bakawan laban sa baha at daluyong, gayundin sa pag-absorb ng carbon dioxide na nakatutulong sa paglaban sa climate change.

Ipinatupad ng Lingnan International Education Innovation Pilot Zone ang “Large-Shared Campus + Small Colleges” model, kung saan isinusulong ang reforms gaya ng mutual learning sa pagitan ng China at foreign institutions, integration of arts and sciences, interdisciplinary studies, cross-selection of courses, mutual recognition of credits, at collaborative management. Layunin ng Pilot Zone na maging benchmark ng open educational development ng China, maging testing ground para sa reforms at innovations, at maging platform para sa China-foreign exchange at mutual learning. Nais din nitong suportahan ang pagbalik ng mga overseas students sa Tsina para sa ibayong pag-aaral at itaguyod ang integration ng education, research, industry, at urban development. Sa ngayon, nakapirma na ito ng agreements sa 22 kilalang Chinese at international universities. May halos 5,000 faculty at students na kasali sa komunidad, at inaasahang aabot sa 10,000 ang student population pagdating ng autumn semester ng 2025.

Dinadayo ngayon sa Xinglong, China ang Bali Village bilang natatanging atraksyong kultural na naglalarawan ng buhay ng mga Chinese migrants na bumalik mula sa Timog-Silangang Asya.

Sa makukulay na tanawin, kakaibang kaugalian, at masasarap na pagkain na may halong Southeast Asian charm, ipinapakita rito ang buhay ng mga overseas Chinese matapos silang bumalik sa Tsina. Sa bawat tanawin at karanasan, makikita kung paano nila pinanatili ang mga tradisyon at alaala mula sa kanilang pamumuhay sa ibang bansa.

Hindi lang ito basta pasyalan. Isa itong makabuluhang lugar na nagsasalaysay ng mayamang kasaysayan at pamana ng mga Chinese na dating nanirahan sa Southeast Asia. Sa ganitong paraan, patuloy nitong pinagbubuklod ang kultura ng Silangan at Timog-Silangang Asya, at ipinapakita ang kahalagahan ng pagkakaunawaan at pagkakaibigan ng dalawang rehiyon.

Lumahok ang Pilipinas sa Ika-22 ChinaJoy sa Shanghai, China sa ilalim ng programang Malikhaing Pinoy ng Department of Trade and Industry at Game Developers Association of the Philippines (GDAP).

Walong kompanyang Pilipino ang nagpakita ng galing sa game development at digital entertainment, tampok ang Philippine Pavilion na may 36 sqm. Ayon kay PTIC-Shanghai Vice Consul Jose “Jojie” Dinsay, malaking oportunidad ito para palawakin ang creative industry ng bansa at makipag-ugnayan sa mga kompanyang Tsino.

Kasabay ng ika-50 anibersaryo ng relasyong diplomatiko ng Pilipinas at Tsina, layon ng paglahok na patibayin ang ugnayang pang-ekonomiya at lumikha ng mas maraming kolaborasyon.

Inilunsad kamakailan sa lungsod ng Sanya, Hainan, China ang isang makabagong pasilidad na nakatuon sa pananaliksik at pangangalaga ng coral reef. Pinangungunahan ito ng Sanya Coral Reef Research Institute, na layuning paigtingin ang siyentipikong pag-aaral, internasyonal na kooperasyon, at rehabilitasyon ng yamang-dagat sa rehiyon.

Ang bagong sentro ay binubuo ng tatlong pangunahing yunit:

• Coral Reef Germplasm Laboratory, para sa pagpapanatili at pagpaparami ng mga coral species;

• Marine Eco-Environmental Stressors Laboratory, na tututok sa pag-aaral ng mga salik na nakaaapekto sa kalusugan ng karagatan;

• at Marine Environmental Monitoring Station, para sa tuloy-tuloy na pagbabantay sa kondisyon ng kapaligiran sa dagat.

Ayon sa pamunuan ng institusyon, layunin ng proyekto na suportahan ang pangmatagalang kaunlaran ng mga baybaying komunidad at palakasin ang kapasidad ng bansa sa konserbasyon ng marine biodiversity.

Itinuturing itong mahalagang hakbang sa mas malawak na layunin ng China na mapangalagaan ang mga likas na yaman nito, sa gitna ng lumalalang banta ng climate change at polusyon sa karagatan.

Matagumpay na naipakilala ng Hainan Waterlily Germplasm Repository sa China ang 345 uri ng waterlily mula sa limang pangunahing subgenera, kabilang ang halos lahat ng kilalang variety sa buong mundo.

Kumikita ang mga magsasaka ng hanggang 3,000 RMB o humigit kumulang 24,000 pesos kada araw mula sa apat na hektaryang taniman ng waterlily. Ginagawa nilang tsaa at halamang gamot ang waterlily, na ginagamit laban sa lagnat, sipon, at ubo.

Bukod dito, nakakagawa rin sila ng mga lotion at beauty products. Tinutulungan ng mga unibersidad sa Hainan ang mga lokal na magsasaka sa pag-develop ng mga produktong ito para mapalawak pa ang industriya.

Pormal nang binuksan ang “China Walk: Vibrant Hainan” Joint Media Tour at “ASEAN Partners” Media Workshop sa isang seremonyang pinangunahan ni Mr. Wang Bin, miyembro ng Standing Committee ng Hainan Provincial Party Committee at Minister ng Publicity Department.

Nagpahayag ng pasasalamat si Mr. Wang sa China Media Group (CMG) sa matagumpay na pag-oorganisa ng event, at sa mga media outlets mula sa ASEAN sa patuloy na suporta para sa Hainan Free Trade Port (FTP).

Dagdag pa niya, layunin ng programa na itampok ang mabilis na pag-unlad ng ekonomiya, mayamang kultura, at lumalagong industriya ng turismo sa Hainan.

Ipinromote ng Pilipinas ang world-class dive destinations nito sa diving, resort, and travel (DRT) show sa Beijing, China mula August 8–10, sa pangunguna ng Tourism Promotions Board (TPB). Tampok sa Philippine booth ang mga kilalang diving spots gaya ng Bohol, Romblon, Coron, at Anilao.

Isang highlight ng event ang Philippine Dive Night kung saan nagkaroon ng business-to-business meetings sa pagitan ng 16 na tourism stakeholders mula Pilipinas at mga Chinese buyers. Layunin nitong pasiglahin muli ang interes ng mga Chinese sa dive tourism ng bansa.

Ayon kay Tourism Attaché Rene Reyes, mahalaga ang pagbuhay ng kumpiyansa ng Chinese travelers, lalo’t umabot na sa mahigit 134,000 ang Chinese arrivals sa unang kalahati ng 2025.

Ipinagmalaki rin ni Ambassador Jaime Florcruz ang likas yaman ng Pilipinas na may higit 3,000 species ng isda at 480 klase ng corals, at hinikayat ang mga Chinese dive operators na makipagtulungan para sa sustainable dive tourism.

Patuloy ang suporta ng mga institusyong gaya ng PADI-China na kinikilala ang Pilipinas bilang isang “colorful diving destination.”