Sisimulan na ngayong araw, Nobyembre a-disi-siete ang dagdag na doses ng bakuna o booster shot laban sa Covid-19 para sa mga frontliners.
Kasunod ito ng pag-apruba ng Food and Drug Administration ng Emergency Use Authorization sa ilang brand ng bakuna para magamit bilang booster shot.
Ayon sa FDA, maaari lamang ibigay ang booster shot makalipas ang hindi bababa sa anim na buwan mula nang makumpleto ang primary series ng mga bakuna o mula nang maging fully-vaccinated ang isang indibidwal.
Kabilang sa mga maaring gamitin bilang ikatlong dose ng bakuna ay ang kaparehong brand na Pfizer, Moderna, Astrazeneca, at Sinovac.
Samantala sa naging pahayag ni Vaccine Czar Carlito Galvez Jr., bibigyan ng kalayaan ang mga health workers na makapili ng brand ng booster shot pero nakadepende pa rin ito sa available na suplay.
Umaasa naman si Galvez na masisimulan na ang pag-roll out ng Covid-19 booster shots sa mga senior citizen at immunocompromised individuals sa susunod na Linggo. —sa panulat ni Angelica Doctolero
