Umakyat na sa 16 ang nasawi sa isinagawang pagsalakay ng mga awtoridad sa tahanan ng mga Parojinog sa Barangay San Roque, Ozamiz City sa misamis Occidental noong araw ng Linggo.
Ito’y makaraang masawi si Daryl Parojinog, pamangkin ng napatay na alkalde ng lungsod na si Reynaldo Parojinog Sr. na unang napaulat na nasugatan sa insidente.
Kapwa kinumpirma nila Atty. Ferdinand Topacio, abogado ng pamilya Parojinog at Superintendent Lemuel Gonda, tagapagsalita ng PNP o Philippine National Police Region 10 ang impormasyon hinggil sa pagpanaw ng nakababatang Parojinog.
Una nang nasawi sa nasabing pag-atake sina Mayor Parojinog, asawa nito at 13 iba pa nang manlaban ang kanilang tauhan sa mga awtoridad na magsisilbi sana ng search warrant.
