Binatikos ni Sen. Kiko Pangilinan ang pagkakaroon ng mataas na bilang ng mga manggagawang Chinese sa dalawang malaking tulay na ipinapagawa ng Department Of Public Works and Highways (DPWH) sa Metro Manila na pinopondohan ng Chinese government.
Ayon kay Pangilinan, dapat na maging prayoridad ang mga Pilipinong manggagawa pagdating sa pagbibigay ng oportunidad o trabaho lalo’t marami ang naapektuhan ngayon ang hanapbuhay dahil sa COVID-19 pandemic.
Ngunit depensa naman ni DPWH Undersecretary Emil Sadain, 45% lamang ang Chinese workers sa ginagawang Binondo-Intramuros Bridge, 55% dito ay mga Pinoy na manggagawa.
Sa ginagawa naman aniyang Estrella Pantaleon Bridge, 31% ang mga Chinese workers at 69% ang mga Pilipino.
Gayunman hindi kumbinsido si Pangilinan at iginiit na malaki pa rin ang bilang ng mga Chinese workers.