Isang hinihinalang bomber o tagapagpasabog ng BIFF o Bangsamoro Islamic Freedom Fighter ang patay nang maharang ng mga pulis sa North Cotabato.
Kinilala ng North Cotabato PNP ang napatay na suspek na si Bads Basilan na residente ng Barangay Kudarangan sa bayan ng Midsayap.
Ayon sa mga awtoridad, sakay ng motorsiklo ang suspek nang harangin ito ng mga pulis sa isang checkpoint sa Barangay Dualing dahil walang plaka ang sinasakyan nito.
Subalit imbes na huminto, bumunot pa ng baril si Basilan at pinaputukan ang mga pulis sabay harurot sa kaniyang motorsiklo.
Ito naman ang siyang dahilan naman sa mga pulis para paulanan ng bala si basilan na siyang dahilan ng pagkasawi nito dahil sa tinamong tama ng bala sa iba’t ibang bahagi ng kaniyang katawan.
Nakumpiska mula kay Basilan ang isang kalibre kuwarenta’y singkong pistola, mga gamit at hindi gamit na bala gayundin ang isang fragmentation granade.
