Naka-heightened alert na ang Bureau of Immigration o BI sa Ninoy Aquino International Airport o NAIA terminals at iba pang port of entry sa bansa dahil sa nalalapit na Association of Southeast Asian Nations Leaders’ Summit sa Nobyembre.
Ayon kay Immigration Commissioner Jaime Morente, nakikipag-ugnayan na sila sa iba pang mga law enforcement at intelligence agency ng gobyerno maging sa kanilang counterpart sa ibang bansa para tiyaking magiging mapayapa at walang makapapasok na dayuhang terorista sa kasagsagan ng ASEAN Summit.
Kasabay nito, nagpalabas na rin ang BI ng memorandum na nag- aatas sa mga immigration officer na maging mahigpit sa pag-profile ng mga pasaherong dumarating at papaalis sa bansa.
Inaasahang kabilang sa mga dadalo sa ASEAN ang ilang matataas na lider ng bansa tulad nina US President Donald Trump, Russian President Vladimir Putin at Chinese President Xi Jin Ping.
—-
