Itinuturing ni Atty. Levito Baligod na kathang isip lamang ni Pork Barrel Scam Queen Janet Lim Napoles ang umano’y banta sa buhay at seguridad sa loob ng kaniyang piitan sa Camp Bagong Diwa sa Taguig City.
Ito’y makaraang hilingin ni Napoles sa Department of Justice na ilipat siya ng piitan kasunod ng paglalagay sa kaniya sa provisional witness protection program kaugnay ng pork barrel fund scam.
Ayon kay Baligod, imposible aniyang mapasok ng mga masasamang loob ang pasilidad ng BJMP sa loob mismo ng kampo na tahanan ng Special Action Force ng PNP.
Naniniwala si Baligod na nais lamang ng DOJ na burahin sa isipan ng publiko ang nagawang kasalanan ni Napoles sa bayan na nagkamal ng milyun-milyong piso mula sa pondo ng pamahalaan.
Una nang inihayag sa DWIZ na napasok umano ng mga hindi natukoy na salarin ang piitan ni Napoles sa BJMP facility sa Taguig kaya ito humihirit na mailipat ng piitan.
“Ang nangyari po diyan, I was told na pinasok yang cell ni Janet at pinutol yung mga lock tapos kinuha yung kanyang mga records at kinuha yung ilang pera. Naka document po yan kaya hindi po mahirap aprubahan yan.”
(From Sapol Interview)
