Patuloy na binabaybay ng Bagyong Florita ang East Philippine Sea na may layong 460 kilometers silangang bahagi ng Tuguegarao City, Cagayan o 420 kilometers silangang bahagi ng Casiguran, Aurora.
Napanatili ng Bagyong Florita ang lakas ng hanging aabot sa 55 kilometers per hour at pagbugsong aabot sa 70 kilometers per hour.
Ayon kay PAGASA weather specialist Aldczar Aurelio, inaasahang kikilos ang Bagyong Florita sa bahagi ng Northern Luzon sa bilis na aabot sa 20 kilometers per hour.
Kasalukuyang hinahatak ng Bagyong Florita ang Southwest Monsoon o Hanging Habagat kung saan, naaapektuhan nito ang Southern Luzon at Visayas.
Sakaling hindi magbago ang pagkilos ng Bagyong Florita, asahan na maglalandfall ito pagsapit ng Martes ng hapon o gabi sa baybayin ng Cagayan o Northern Isabela.
Posible din itong maglandfall sa Babuyan Islands at dadaan sa West Philippine Sea at maaring maging severe tropical storm habang palabas ng Philippine Area of Responsibility (PAR) pagsapit ng Miyerkules ng gabi.
Sa ngayon, nakataas ang Tropical Cyclone Wind Signal No. 1 sa hilagang bahagi ng Aurora, hilaga at silangang bahagi ng Isabela, at silangang bahagi ng Cagayan.