Ipapatupad pa rin ang bagong traffic plan sa paligid ng Terminal 3 ng Ninoy Aquino International Airport (NAIA) kahit matapos na ang holiday season.
Ayon kay Manila International Airport Authority General Manager Jose Angel Honrado, nakikipag-ugnayan na sila sa mga local stakeholders at maging sa Metropolitan Manila Development Authority (MMDA) para sa nabanggit na plano.
Sa ilalim ng bagong traffic plan, itinakda ang innermost lane ng Circulo del Mundo sa Rotonda bilang priority lane para sa mga pasahero ng eroplano patungong NAIA Terminal 3 na maaaring gamitin sa mga motorista na manggagaling sa Sales Road.
Habang ang mga motorista na manggagaling naman sa Baclaran ay hindi na papayagan na makakaliwa sa Rotonda papunta ng New Port Mall at sa halip ay kailangan nilang dumiretso sa Andrews Avenue at mag u-turn sa harap ng Remington Hotel patungo sa nabanggit na mall.
By Rianne Briones
