Krystine Belen

Ayon sa survey mula sa Social Weather Stations (SWS), siyam sa sampung Pilipino ang personal na nakaranas ng epekto ng climate change sa nakalipas na tatlong taon.

Kaya naman malaking tulong sa bansa ang pag-secure ni Pangulong Ferdinand ‘Bongbong’ Marcos Jr. ng high-resolution weather forecasting system gamit ang artificial intelligence (AI).

Sa sidelines ng 30th Asia-Pacific Economic Cooperation (APEC) Summit na ginanap sa San Francisco, California, sinaksihan ni Pangulong Marcos ang paglagda ng Department of Science and Technology (DOST) at ng leading AI meteorology company sa Amerika na Atmo, Inc. sa memorandum of agreement (MOA) na inaasahang magpapataas ng kalidad ng weather forecasting system at magpapatatag ng climate resilience ng Pilipinas.

Maraming hamon ang kinakaharap ng bawat bansa dahil sa climate crisis na kasalukuyang nararanasan natin ngayon. Upang malabanan ang mga hamon na ito, kailangang mayroong matatag na climate resilience ang isang bansa.

Tumutukoy ang climate resilience sa matagumpay na pag-manage sa mga epekto ng climate change, pati na rin ang pagpigil na lumala na ito.

Ayon kay Pangulong Marcos, makatutulong ang AI-powered weather forecasting system na mapatatag ang climate resilience ng bansa.

Sa paggamit ng AI technology, mas magiging mabilis ang weather predictions. Mabilis na nakakapag-proseso ng napakaraming datos ang AI algorithm. Dahil sa kakayahan nitong mag-analyze ng extensive data sets in real time, makapagbibigay ito ng timely at up-to-date report.

Bukod dito, madaling natutukoy ng AI ang mga pattern at correlations na hindi gaanong napapansin sa traditional analysis methods. Natututo rin ang AI mula sa history at real-time data. Nagreresulta ang mga ito ng mas accurate na weather predictions, na siya namang maaaring makatulong sa mga organisasyon na gumawa ng mas maayos na desisyon.

Nakararanas ang Pilipinas ng humigit-kumulang 20 bagyo kada taon na nagdudulot ng matinding pinsala sa imprastraktura at agrikultura, pati na rin sa pagkawala ng mga ari-arian at buhay. Sa paggamit ng AI-powered weather forecasting system, mapapahusay ang kakayahan ng pamahalaan na tumugon sa weather-related events, na siyang makasisiguro sa kaligtasan ng mga Pilipino. Maaari rin itong mapakinabangan sa maritime safety at infrastructure development, pati na rin sa mga sektor ng turismo at agrikultura.

Ayon nga kay House Speaker Martin Romualdez, naipakita ng inisyatibang ito ang determinasyon ni Pangulong Marcos na tugunan ang mga hamon sa climate change sa pamamagitan ng innovative solutions. Dagdag pa niya, hindi lamang nagtutulak sa technological innovations ang groundbreaking agreement na ito, kundi nangangakong makapagbibigay ng positive impact sa mga buhay ng mga Pilipino.

Isa ka ba sa mga laging babad sa internet?

Ayon sa Department of Information and Communications Technology (DICT), as of June 2023, 83% ng mga Pilipino ay internet users. Hindi nga lang lahat, maayos na nakakagamit ng internet, lalo na sa mga nasa liblib na lugar.

Pero huwag mag-alala dahil ayon kay Pangulong Ferdinand ‘Bongbong’ Marcos Jr., malapit nang magkaroon ng satellite ang Pilipinas na magpapahusay sa internet connection ng mga nasa malalayong lugar.

Ito ay matapos lagdaan ang isang kasunduan na maglulunsad ng internet satellite sa bansa. Ang unang internet satellite ay opisyal na tatawaging Agila.

May malalim na kahulugan ang pagpili ng pangalang Agila para sa unang satellite na dedicated sa pag-improve ng connectivity sa kasuluk-sulukan ng bansa.

Ayon kay Philippine Ambassador to the US Jose Manuel Romualdez, mapalalakas ng Agila ang technological advancements at international partnerships ng bansa.

Naging posible ang pagkakaroon ng internet satellite sa Pilipinas dahil sa kolaborasyon ng Astranis at Orbits na maglunsad ng MicroGEO satellites. Ang Astranis ay isang American company na gumagawa ng small and low-cost telecommunications satellites upang makapagbigay ng internet access sa remote areas. Ang Orbits Corp. naman ay sister company ng local internet service provider na HTechCorp. Isa ring satellite services provider ang Orbits na mayroong 20 years of experience sa pagpro-provide ng internet services para sa mga Pilipino.

Sa naturang partnership, itatalaga ng Astranis at Orbits ang unang dalawang internet satellites para sa Pilipinas. Nakatakdang ilunsad sa 2024 ang satellite, kasama ng apat pang karagdagang satellites mula sa Astranis.

Ayon kay Pangulong Marcos, makapagdadala ito ng internet sa unserved and underserved areas sa bansa. Inaasahan ding makakakalap ito ng $400 million investment over the next eight years.

Sa MicroGEO satellites, makikinabang ang higit 30,000 barangays at 10 million internet users. Inaasahan ding makalilikha ito ng mahigit 10,000 jobs para sa direct at indirect employees and partners.

Sa kanyang ikalawang State of the Nation Address (SONA) noong July 24, 2023, ipinahayag ni Pangulong Marcos ang commitment niyang ma-improve ang internet sa bansa.  Sa pagkakaroon ng internet satellite, mapagkokonekta na ang mas maraming Pilipino sa kabila ng hiwa-hiwalay na pulo ng Pilipinas.

Ready na maging leading investment hub of Asia ang Pilipinas. Ito ang sinabi ni Pangulong Ferdinand ‘Bongbong’ Marcos Jr. sa potential investors sa ginanap na Philippine Economic Briefing (PEB) sa San Francisco, California nitong November 15, 2023.

Sa kabila ng iba’t ibang hamon na kinakaharap ng bansa, kapansin-pansin pa rin ang paglago ng ekonomiya. Matatandaang mula sa 4.3% sa second quarter ng taon, lumago sa 5.9% ang gross domestic product (GDP) ng bansa ngayong third quarter ayon sa Philippine Statistics Authority (PSA). Ayon din sa nasabing ahensya, bumaba naman ang inflation rate ng 4.9% nitong October mula sa 6.1% noong September.

Dahil sa performance na ito, itinuring ang Pilipinas bilang pinakamabilis sa mga umuusbong na ekonomiya sa Asya. Ayon nga kay Pangulong Marcos, naungusan natin ang Vietnam, Indonesia, China, at Malaysia. Kumpiyansa naman ang Pangulo na maaabot ng bansa ang target nitong mapalago ang ekonomiya nang 6% to 7% para sa taong 2023.

Bukod dito, binanggit din ni Pangulong Marcos ang pagbibigay ng administrasyon niya ng favorable business environment at commitment sa kinakailangang reporma, kabilang na ang pag-amyenda sa Public Service Act, Foreign Investments Act, Retail Trade Liberalization Act at sa Implementing Rules and Regulations ng Renewable Energy Act. Nireporma rin ang fiscal incentives structure ng bansa sa ilalim ng Corporate Recovery and Tax Incentives for Enterprises (CREATE) Act na aniya ay inaasahang magreresulta sa pagdagsa ng investments sa strategic sectors ng ekonomiya ng Pilipinas.

Ayon kay Pangulong Marcos, sa pagreporma ng public-private partnerships (PPP) framework ng pamahalaan, mapadadali ang approval process, matitiyak ang kakayahang kumita ng PPP projects, at mabibigyan ng daan ang pagkakaroon ng quality infrastructure development. Dagdag pa niya, sinusuportahan ng mga repormang ito ang pangmalawakang infrastructure drive ng bansa.

Matatandaang ayon sa chair ng Japanese Chamber of Commerce and Industry (JCCI) na si Ken Kobayashi, naaakit ang Japanese investors na i-develop ang kanilang mga operasyon at negosyo sa Pilipinas dahil sa inaasahang increased workforce population at domestic demand nito. Dahil din sa stable at high-level economic growth ng bansa kaya naging attractive investment destination ang Pilipinas para sa Japanese businessmen.

Sa patuloy na panghihikayat at pagbubukas ng ekonomiya para sa foreign investors, makakaasang mas sisigla pa ang ekonomiya ng bansa sa ilalim ng kasalukuyang administrasyon.

Sa isang groundbreaking move, naging pinakaunang head of state si Pangulong Ferdinand ‘Bongbong’ Marcos Jr. na nakiisa sa 2023 Singapore FinTech Festival (SFF) gamit ang hologram.

Nasa Amerika man para sa 2023 Asia-Pacific Economic Cooperation (APEC) Summit, dumalo pa rin si Pangulong Marcos sa pinakamalaking financial technology event sa Singapore kung saan idiniin ng kanyang virtual presence ang commitment ng Pilipinas sa digital innovation and transformation.

Tumutukoy ang fintech o financial technology sa paggamit ng teknolohiya upang gawing awktomatiko ang mga pampinansyal na serbisyo. Dahil sa fintech, mas napabibilis ang transaksyon at mas nagiging convenient ito para sa mga negosyante at konsyumer

Nagbibigay ng plataporma ang Singapore FinTech Festival sa higit 500 exhibitors mula sa 134 na bansa, kung saan mapag-uusapan ang pinakabagong trends, opportunities, at challenges sa financial technology.

Nakatuon ang nasabing festival ngayong taon sa pagbuo ng Artifical Intelligence (AI) at ang posibleng paggamit nito sa financial services industry.

Dito, binanggit ni Pangulong Marcos ang GoDigital Pilipinas na may layong i-promote ang universal access sa digital services. Ang GoDigital Pilipinas ay isang movement na pinangangasiwaan ng Private Sector Advisory Council.

Sentro ng nasabing kilusan ang UnionDigital Bank, ang digital arm ng UnionBank. Naka-focus ang bankong ito sa promotion ng financial inclusion sa pamamagitan ng AI-powered banking solutions.

Hinikayat din ng Pangulo ang foreign investors na makilahok sa fintech space ng Pilipinas kung saan sinabi niyang bukas sa kolaborasyon ang bansa. Binigyang-diin din niya ang kritikal na papel ng pakikipagtulungan sa domestic at international stakeholders upang maging isang digital innovation and entrepreneurship hub ang bansa.

Makikitang sinisikap ng administrasyong Marcos na isulong ang digitalization at fintech sa bansa. Matatandaang noong July 13, 2023, iprinesenta ng Department of Information and Communications Technology (DICT) ang six priority projects ng ahensya sa ilalim ng e-governance. Kabilang dito ang eGovPay, isang secured government payment gateway na available sa users ng digital payment systems, gaya ng online and typical banks, e-wallets, ecards, kiosks, at cash payment systems.

Ayon kay Chief of Staff for e-Government ng DICT na si TR Mon Gutierrez, tinutulungan ng eGovPay ang pamahalaan na pasimplehin ang payment process dahil makapagbibigay ito ng automated reports at transparency. Mas mababa rin ang gastos dito.

Dahil sa limitadong paggalaw noong kasagsagan ng pandemya, mas maraming sektor ang nag-adapt sa digitalization, kung saan mas maraming serbisyo at produkto ang inaalok online. Naging pundasyon nito ang fintech, na siyang nagbigay-daan sa paggalaw ng ekonomiya sa panahon ng new normal.

Malaki ang oportunidad na maaaring makuha ng bansa sa patuloy na pagsusulong ng fintech, kaya naman maganda ang naging hakbang ni Pangulong Marcos na hikayatin ang investors sa naturang industriya upang mas mapaunlad ang ekonomiya ng Pilipinas.