Judith Estrada-Larino

Binawi ni dating Labor Secretary Marianito Roque ang Certificate of Candidacy (COC) nito bilang Senador sa 2022 National Elections.

Ipinabatid ni Roque na papalit siya o magsisilbing substitute niya ang kasalukuyang Labor Secretary Silvestre Bello, III sa ilalim ng Lakas-CMD.

Personal ang dahilan ni Roque sa pag atras sa pagtakbong senador sa susunod na eleksyon.

Samantala, inihayag ni Labor Spokesperson Rolly Francia na hindi pa nakapagpasya si Bello kung sasabak o hindi sa 2022 Senatorial Elections bagamat may hanggang Lunes pa ito sakaling gustuhing pumalit kay Roque.

Nag positibo sa red tide toxin ang ilang lugar sa siyam na lalawigan.

Kasunod na rin ito nang isinagawang examination ng BFAR at Local Government Units sa mga sample shellfish na kinuha sa ilang coastal areas.

Kabilang sa mga coastal areas na nag positibo sa red tide ang Dauis at Tagbilaran City sa Bohol, Biliran Island, Daram Island, Maqueda, Villareal, Cambatutay, Irong Irong at San Pedro Bays sa Western Samar, Cancabato Bay, Tacloban City sa Leyte, Matarinao Bay sa Eastern Samar, Dumanquillas Bay sa Zamboanga Del Sur, Baroy sa Lanao Del Norte at Lianga Bay sa Surigao Del Sur.

Ipinabatid pa ng BFAR na nag positibo rin sa red tide toxin ang mga karagatang sakop ng Marivels, Limay, Orion, Pilar, Balanga, Hermosa, Orani, Abucay at Samal sa Bataan.

Malaki ang posibilidad na gawin din sa Metro Manila ang limitadong face to face classes.

Ito ayon kay DepEd Director Roger Masapol ay kasunod na rin nang pagganda ng sitwasyon kontra COVID-19 sa Metro Manila.

Ipinabatid ni Masapol na positibo ang tugon ng Pangulong Rodrigo Duterte sa kahilingan nilang payagan ang mas marami pang paaralan na masakop ng pilot implementation ng limited face to face classes na magsisimula sa November 15.

Sinabi ni Masapol na isandaang public schools sa buong bansa maliban sa NCR, Cordillera Administrative Region, Region at Region 4B ang handa nang makiisa sa pilot in person classes.

Lima pang money changing shops na iligal na nag ooperate sa Makati City ang ipinasara na ng Bangko Sentral ng Pilipinas (BSP).

Kaugnay ito sa mahigpit na pagkilos ng BSP laban sa operasyon ng mga fly by night money service business.

Ayon sa BSP, walang registration mula sa kanila ang mga nasabing money changing shops na nag ooperate sa night time entertainment district na pinupuntahan ng mga dayuhan.

Sa kabuuan ay nasa sampung illegal money changing shops na ang naipasara na ng BSP ngayong taon.

Umaasa ang mga alkalde sa Metro Manila na susuportahan ng Pangulong Rodrigo Duterte ang hirit nilang huwag nang magsuot ng faceshield maliban na lamang sa mga ospital at pampublikong transportasyon.

Kasunod na rin ito nang pagpasa ng ordinansa ng ilang Metro Mayors kaugnay sa pag limita sa pagsusuot ng faceshield.

Una nang ring nagpasa nang kaparehong polisiya ang ilang LGU sa mga lalawigan kontra sa obligadong pagsusuot ng faceshield.

Pinag aaralan na ng DILG kung paano ipatutupad ang no vaccine, no subsidy policy para sa mga hindi pa bakunadong beneficiary ng 4P’s o Pantawid Pamilyang Pilipino Program.

Ayon kay DILG Undersecretary Jonathan Malaya, maraming 4P’s beneficiaries ang tumatanggi pa ring magpa bakuna kontra COVID 19.

Dahil dito, sinabi ni Malaya na isinusulong nilang ma-disincentivize ang mga unvaccinated government aid recipients.

Naisumite na sa DSWD ang panukalawang huwag bigyan ng cash assistance ang mga hindi pa bakunadong beneficiaries ng 4P’s.

Papanagutin ng COMELEC ang mga kandidato sa 2022 National Elections na gagamit nang tinatawag na deep flakes sa kanilang kampanya.

Ito ayon kay COMELEC Spokesperson James Jimenez ay dahil malinaw sa certificate of candidacy na pinirmahan ng mga kandidato ang hinggil sa deep fakes o mga video na dinoktor o pinagtagpi tagpi upang palabasin ang isang personalidad na may sinasabi o ginagawa taliwas sa totoong sinasabi o ginagawa nito.

Sinabi ni Jimenez na sa ngayon ay naungusan na ng Youtube ang Facebook dahil maraming nakukuha ritong content na ikinakalat din sa ibang social media.

Naungkat sa pagdinig ng Senate Blue Ribbon Committee hinggil sa 2020 COA report sa DOH ang mga mamahaling sasakyang nakapangalan sa negosyanteng si Rose Nono-Lin na isinasangkot sa mga kuwestiyonableng transaksiyon sa gobyerno nuong nakalipas na taon.

Binigyang diin ni Lin na sadyang mahilig ang asawa niyang bumili ng mga sasakyan lalo na’t sapat naman ang naipundar nila mula sa mga lumago nilang negosyo bago mag pandemya.

Ayon pa kay Lin, natural na sa kaniyang asawa at mga kaibigang negosyante nito ang pagkahilig sa mga sasakyan kaya’t normal na ang pagkakaruon ng mga bagong sasakyan na ang ilan ay nakapangalan sa kanya.

Natuwa naman si Blue Ribbon Committee Chair Richard Gordon sa anito’y positibong pananaw at diretsahang pagsagot ni Lin hinggil sa mga nasabing kotse.

Kasabay nito, nangako si Lin na makikipagtulungan sa mga otoridad upang matunton ang mga taong tunay na sangkot sa nasabing isyu.

Mahigpit nang tinututukan ng gobyerno ang pagkakasa ng mandatory vaccination laban sa COVID-19.

Ito ayon kay General Restituto Padilla, Jr. , Spokesman ng National Task Force Against COVID-19 ay para mapataas ang bilang ng mga nababakunahan.

Sinabi ni Padilla na puspusan ang pagtalakay ng IATF sa isyu ng mandatory vaccination kung saan partikular na ikinukunsider ang mga usaping legal.