Judith Estrada-Larino

Pinababasura ng grupo ng Human Rights lawyers sa International Criminal Court (ICC) ang anumang kahilingang ipatigil ang imbestigasyon nito sa war on drugs campaign ng Duterte administration.

Ayon sa National Union of People’s Lawyers (NUPL), hinikayat nila ang ICC na huwag padala sa mga claim ng Duterte administration taliwas sa mga sadyang nangyayari sa paligid at hindi dapat palampasin.

Una nang itinigil pansamantala ng ICC ang nasabing imbestigasyon matapos hilingin ng gobyerno.

Tiwala ang konsulado ng bansa sa Los Angeles, USA na makakakuha ng hustisya para sa mga umano’y naging biktima ng Sex Trafficking case laban kay Pastor Apollo Quiboloy.

Kasunod na rin ito nang pagtiyak ni Consul General Edgar Badajos nang kahandaan nilang tulungan ang mga Pinoy citizen na biktima o akusado sa nasabing kaso dahil nasa ilalim ito ng hurisdiksyon ng US legal system.

Sinabi ni Badajos na umaasa silang magiging maayos ang sitwasyon para sa lahat at makamit ang hustisya ng mga biktima sa ilalim ng batas ng Amerika.

Ilan sa mga sangkot at biktima sa nasabing kaso ay naka base sa Los Angeles.

Pinagsusuot pa rin ng IATF ng faceshield ang publiko kung lalabas ng kanilang mga bahay.

Ito ayon kay National Task Force Against COVID-19 Spokesperson Restituto Padilla ay dahil mayruon pa ring mga establishments ang nag-o-obligang magsuot ng faceshield kahit pa niluwagan na ang quarantine.

Sinabi ni Padilla na dapat maging conscious pa rin ang lahat dahil ang pagsusuot ng faceshield ay dagdag proteksyon laban sa COVID-19.

Mas mabuti aniyang bitbit na lamang ang faceshield kahit saan magpunta at kung hindi naman ipapagamit ay sinupin lamang sa lalagyan.

Una nang inihayag ni Acting Presidential Spokesperson Karlo Nograles na maaari pa ring i-require ng establishments at workplaces ang kanilang customers at empleyado na magsuot ng faceshield.

Hinikayat ni Manila Archbishop Jose Cardinal Advincula ang mga mananampalataya na pagtuunan ng pansin si Kristo sa lahat ng aspeto ng buhay.

Bahagi ito ng mensahe ni Cardinal Advincula sa pagdiriwang ng dakilang kapistahan ng Kristong Hari.

Binigyang diin din ng Arsobispo ang kahalagahan ng tungkulin ng bawat botante sa paghalal ng mga karapat dapat na pinuno ng bayan sa 2022 national elections na aniya’y isang natatanging pagsasanay at mahalagang kabanata sa kasaysayan ng bansa.

Hinamon ng Kardinal ang mga Pilipino na piliin ang katotohnanang hatid ng panginoong Kristong Hari sa pagpili ng mga mamumuno ng lipinan na may pagpapahalaga sa dignidad ng nasasakupan at pagsusulong ng kabutihan ng lahat.

Tuturukan na rin ng booster shots ang mga papaalis na OFW.

Sinabi ni Vaccine Czar Carlito Galvez, Jr. Na nagpasya ang IATF na magbigay ng booster shots sa mga OFW at seafarers na papaalis ng bansa sa loob ng apat na buwan.

Ayon kay Galvez, hiniling na ng IATF sa Food and Drug Administration (FDA) na magsagawa ng mga kinakailangang inclusions at amendments para maisama ang migrant workers bilang priority sa booster shots.

Ipinabatid pa ni Galvez na posibleng mabigyan na rin ng booster shots sa susunod na taon ang mga nalalabing A4, A5 at general population kapag naabot na ang mahigit 50% ng populasyon na naturukan na ng second dose.

Mahigit 6,000 health care workers ang nakatanggap na ng booster shots.

Ayon ito kay Health Undersecretary Myrna Cabotaje kung saan hanggang nitong November 18, nasa 6, 457 healthcare workers ang naturukan na ng booster shot kontra COVID-19.

Ipinabatid ni Cabotaje na ang National Capital Region (NCR) ang nakapagtala ng pinakamaraming healthcare workers na nabigyan ng booster shoot o nasa 2, 811 sunod ang Cordillera Administrative Region (CAR) na nasa 1,457 at Region 3 sa 1,541.

Patuloy pa aniya silang kumukuha ng data mula sa iba pang rehiyon hinggil sa mga health workers na naturukan ng booster shot na sinimulan nuong Miyerkules.

Binalaan ng embahada ng bansa sa Amerika ang mga Pilipino laban sa mga scammer at fraud schemes.

Ayon sa advisory ng Philippine Embassy, ang mga nasabing panloloko ay kadalasang ini-uugnay sa embahada o sa mismong sugo ng Pilipinas sa Amerika.

Sinasabing nagkalat sa social media ang mga nasabing fraud scheme na tuma target sa mga Pilipino sa Amerika.

Dahil dito, pinayuhan ng embahada ang mga Pilipino na maging vigilant at kaagad isumbong sa mga otoridad ang anumang pagtatangka i-scam sila.

Metrics ang pangunahing pagba-basehan ng posibleng pagsailalim sa alert level 1 ng NCR.

Ayon ito kay Health Undersecretary Maria Rosario Vergeire sa gitna na rin nang pagpapalakas ng kampanya ng gobyerno kontra COVID-19.

Sinabi ni Vergeire na kailangang ma sustain ang low risk classification ng NCR sa loob ng dalawang incubation period.

Dapat aniyang matutukan pa rin ang mobility, pagsunod sa minimum public health standards at pagtugon ng Local Government Units (LGUs) sa pandemya.

Inihayag ni Vergeire na kapag tumaas ang mobility inaasahan na ng doh na ang hindi gaano o mababang pagsunod ng publiko sa minimum health standards ay magre resulta sa pagtaas ng kaso ng COVID-19.

Tatakbo sa pagka pangulo sa ilalim ng Katipunan ng Demokratikong Pilipino (KDP) si dating NTF-ELCAC Spokesperson Retired Lt. General Antonio Parlade, Jr.

Ito umano ay base sa nakuhang impormasyon ng COMELEC kung saan magsisilbing substitute ni KDP Presidentiable Antonio Valdes ang retiradong heneral.

Gayunman, sinasabing naghain ng kanyang COC si Valdes bilang independent presidential aspirant.

Magugunitang si Parlade ay nag resign mula sa NTF-ELCAC bago pa man mag retiro nitong nakalipas na buwan ng Hulyo.