Judith Estrada-Larino

Hindi na kailangang magpatupad muli ng curfew sa NCR

Ito ayon kay MMDA chairman Benhur Abalos ay dahil ang mga residente ng Metro Manila ay self-regulating na sa gitna na rin nang pagsirit pa ng kaso ng COVID 19.

Sinabi ni Abalos na natuto na ang lahat sa nangyaring pagtaas ng mga bagong kaso ng COVID-19 sa NCR kaya’t ang mga residente rito ay hindi na rin halos lumalabas sa pangambang mahawa sa virus.

Ipinabatid pa ni Abalos na halos wala nang tao at motorista ang mga mall at malalaking kalsada ng alas-5 ng hapon.

Gayunman, nananatili ang 10pm to 4am curfew sa mga menor-de-edad sa Metro Manila.

Epektibo rin tulad ng mga branded ang mga generic na gamot.

Binigyang-diin ito ng mga grupo ng mga pharmacist matapos himukin ang publiko na bumili ng generic brands ng gamot sa gitna na rin nang pagtaas ng demand ng mga gamot tulad ng paracetamol.

Ayon kay Jovelyn Blancaflor, chairman of the board ng Drugstores Association of the Philippines, lumalabas sa survey nila na walang shortage ng paracetamol bagama’t may kakulangan sa supply ng mga partikular na brand o mga aniya’y kilala ng tao.

Hinimok din ni Dr. Janette Jakosalem ng Pharmaceutical and Healthcare Association of the Philippines ang publiko na huwag matakot na bumili ng generic brand na sumailalim naman din sa masusing testing at rehistrado sa FDA.

Patuloy ang pagsirit ng kaso ng COVID-19 sa bansa matapos pumalo sa 26,458 ang mga bagong kaso ng nasabing virus.

Ang naitalang mga bagong kaso ay itinuturing na pinakamataas simula noong September 11, 2021 kung kailan sumirit sa 26,303 ang new cases.

Dahil dito, ipinabatid ng DOH na sumipa na sa halos 3 milyon ang kabuuang kaso ng COVID-19 sa Pilipinas kung saan naitala na rin sa 102,017 ang active cases.

Mahigit 3,000 ang asymptomatic, nasa 94,007 ang mild cases, halos 3,000 ang moderate cases, mahigit 1,000 ang severe cases at 307 ang critical condition.

Naitala naman sa mahigit 2.7 million ang total recoveries kabilang na ang mahigit 1,600 na mga bagong gumaling sa COVID-19.

Sumirit pa sa mahigit 52,000 ang death toll matapos maitala sa 265 ang mga bagong nasawi sa naturang virus.

Samantala, tumaas din ng halos apat na porsyento ang positivity rate mula sa 40% na naitala noong Biyernes.

Tahimik ang simbahan ng Quiapo sa bisperas nang paggunita sa Traslacion ng itim na Nazareno.

Kasunod na rin ito nang pagkansela sa Traslacion ng Itim na Nazareno sa Quiapo church dahil sa patuloy na pagsirit ng kaso ng COVID-19 kayat ikinasa na ang online mass.

Binigyang-diin ni Reverend Father Daniel Voltaire Hui sa misa na ang malalim na relasyon sa Panginoon ay hindi magagawa sa pagbisita lang sa Quiapo church o sa imahe ng Itim na Nazareno.

Samantala, sa paligid ng simbahan, bantay sarado ng mga pulis at walang tao o deboto na nakatatawid sa mga isinarang kalsada tulad ng Hidalgo at Villalobos streets na hinarangan na ng plastic barriers.

Mayroon ding mga pulis na nagbabantay sa Rizal Avenue at Carriedo para mapigilan ang mga debotong magtatangkang pumasok sa mga saradong kalsada bukod pa sa checkpoints na itinayo sa Southbound Lane ng Quezon Boulevard mula Fugoso street patungong Quezon Bridge.