Judith Estrada-Larino

Nakakatulong sa ekonomiya ng bansa ang pagiging romantic ng mga Pilipino na kadalasang lumalabas kapag Valentine’s Day.

Paniniwala ito ng ilang ekonomista na nagsabi ring natatapatan na ng Valentine’s Day spending ng mga Pilipino ang halaga ng mga ginastos nuong nakalipas na Pasko.

Ipinabatid ng mga ekonomista na batay sa pre-pandemic data, ang middle income market ay binubuo ng 15 milyon katao kung saan 30% ay inaasahang gagastos ng nasa average na 2,000 pesos para lamang sa Valentine’s Day o nasa kabuuang 9 trillion pesos.

Dahil sa global health crisis, sinabi ng mga ekonomista na mas nakikita nilang gagastos ang mga Pinoy sa pagbili ng tsokolate at bulaklak kaysa kumain sa hotels at restaurants bagamat bumababa ang mga naitatalang bagong kaso ng COVID 19.

Loot bags.

Ito ang makukuha ng bawat isang  magpapabakuna na may edad 5 hanggang 11 sa pagsisimula ng national roll out ng pediatric vaccination ngayong araw na ito.

Laman ng loot bags, ayon sa awtoridad ay mga kendi, cookies, makulay na masks, alcohol at mga lobo.

Ang pagbabakuna sa nasabing age category ay binuksan ng mga opisyal ng pamahalaan sa isang hotel sa Parañaque City.

Ibinaba ng DFA sa 30% ang work-force nito sa kanilang mga opisina sa mga lugar sa ilalim ng Alert Level 3.

Sinabi ng DFA na tumataas ang bilang ng mga empleyado nilang dinadapuan ng COVID-19 kaya’t nabawasan ang mga tauhan nila sa mga tanggapan nito.

Ayon sa DFA, nagpapatupad sila ng work-from-home at iba pang flexible work arrangements para ligtas ang kanilang mga empleyado at tuluy-tuloy na paghahatid ng mga pangunahing serbisyo sa taumbayan.

Pinaghahanda ni PNP chief police general Dionardo Carlos ang mga pulis para sa crowd control operations.

Sa gitna ito ng target ng gobyerno na mabakunahan ang mahigit 11 milyong kabataan mula 0-4 years old laban sa COVID-19 bago matapos ang buwan ng Hunyo.

Hinimok ni Carlos ang iba’t ibang police units na makipag-ugnayan sa kanilang counterparts sa kani-kanilang Local Government Units.

Binigyang-diin ni Carlos na hindi tulad ng naunang vaccination roll out, higit na dapat maging maingat sa pagbabakuna sa mga bata at kailangang mai-schedule ng mabuti ang pagturok sa mga ito para hindi mahalo sa mga matatanda.

Suspendido pansamantala ang operasyon ng mga tanggapan ng CHR Commission on Human rights sa Central Office, Metro Manila at Region 4B.

Ito ay para bigyan-daan ang contact tracing ng mga tauhan at indibidwal na nagkaruon ng transakyon sa CHR offices sa gitna na rin nang pagsirit ng COVID-19 cases.

Gayunman, ipinabatid ng CHR na mananatiling bukas ang official social media accounts ng CHR para sagutin ang concerns ng publiko.

Ang CHR offices ay sarado sa January 17 hanggang 21.