Nangako ang Britain ng parusa sa Russia.
Ito’y ayon kay British Prime Minister Boris Johnson ay matapos kilalanin ni Russian President Vladimir Putin ang Breakaway regions ng Eastern Ukraine na paglabag aniya sa international law at malinaw ng madilim na kinabukasan ng rehiyon.
Nakikiisa ang Britain sa Amerika at European leaders sa agarang pagkundena sa nasabing hakbangin ni Putin kasabay ang pagkakasa ng mabigat na parusa para rito.
Nagbitiw na sa tungkulin si Transportation Assistant Secretary Goddes Hope Libiran.
Ipinabatid ni Libiran na nagpasya siyang umalis sa DOTR para i-prioritize ang kanyang pamilya at maging ina sa kanyang nag iisang anak at hindi dahil sasama siya sa anumang kampanya o hindi na niya mahal ang kanyang trabaho.
Ayon kay Libiran, hanggang sa Lunes, February 28 siya mananatili sa puwesto matapos niyang maghain ng kanyang resignation nung February 4.
Nanindigan ang mga otoridad na lehitimo ang ginawang pag-aresto kay Dr. Naty De Castro na anito’y miyembro ng NPA-Central Committee.
Iginiit sa DWIZ ni PNP Caraga Chief Police Brigadier General Romeo Caramat na sinunod nila ang proseso sa ginawang pagdampot kay castro kaya’t nagtataka sila kung bakit maraming negatibong sinasabi ang kung anu anong grupo.
Muling inihayag ni Caramat na sumailalim sa medical check up si Castro bukod sa nakausap din ito ng Commission of Human Rights (CHR) sa rehiyon at maging ng kanyang pamilya.
Nananatiling normal ang sitwasyon sa Ukraine sa gitna ng tensyon sa pagitan nito at ng Russia.
Sa panayam ng DWIZ, sinabi ni Joy Fernandez Tolentino, OFW sa Kyiv, na sa kabila nito ay nangangamba pa rin sila sa posibleng mangyari.
Aniya, nakahanda na sila at maging ang mga mamamayan doon sakaling sakupin ng Russia ang dating Soviet Republic.
Nanawagan ang NAMFREL o national citizens’ movement for free elections sa Pangulong Rodrigo Duterte na i-prioritize ang merits at transparency sa pagtatalaga ng Comelec chair at dalawang commissioners.
Ayon sa NAMFREL na nais nilang isapubliko ng Pangulo ang mga pinagpipiliang kandidato sa pagka-commissioner ng Comelec para makilatis din ng mga mamamayan at makatulong sa pagtatalaga ng Pangulo sa mga bakanteng puwesto sa komisyon.
Mahalaga anitong matiyak ang transparency sa proseso at matukoy ang mga most qualified at competent appointees lalo pat nahaharap sa hamon ng pandemya ang isasagawang eleksyon sa buwan ng Mayo.
Kumikilos na ang gobyerno para makabawi sa bagsak na assessment ng European Union sa training ng Pinoy Seafarers.
Kasunod na rin ito nang isinagawang pulong ng mga kinatawan ng bansa at Senior European Union Officials sa belgium upang makapag comply ang bansa sa maritime safety protocols.
Nakipag pulong sa panig ng Pilipinas ang grupo ni Marina Chief Vice Admiral Robert Empedrad sa delegasyon naman ni Director Henrik Hololei at iba pang opisyal ng European Commission Directrorate General for Mobility and Transportation.
Ang nasabing pulong ayon sa EU ay magandang pagkakataon para malinaw ang mga panuntunan ng grupo kaugnay sa education, training at certification system ng mga Marinong Pilipino.
Halos 80% pa lamang ng immunization data ng mga Local Government Unit ang nai-upload nito sa vaxcertph.
Dahil dito, sinabi ni DICT acting secretary Emmanuel Caintic na posibleng abutin pa ng apat na buwan bago tuluyang mai upload ng LGU’s ang buong vaccination data nito para mailagay sa vaxcertph.
Na update na rin aniya nila ang vaxcertph kung saan isinama na ang booster shots at dagdag pang security measures batay na rin sa mga alituntunin ng World Health Organization.
Ipinabatid pa ni Caintic na tatlumput siyam na bansa tulad ng US, Australia, Canada, South Korea, Singapore at Japan na ang maaaring mai scan ang vaxcertph sa kanilang points of entry.
Nagkasa ng penitential walk ang Manila Archdiocese para sa maayos na May 9 Elections.
Ang nasabing aktibidad na sinimulan sa pamamagitan ng isang misa na pinangunahan ni Manila Archbishop Cardinal Jose Advincula ay dinaluhan ng mga pari mula sa iba’t-ibang simbahan sa Maynila at Religious Congregation.
Ang penitential walk ay sinimulan sa GomBurZa Memorial Marker sa Luneta Park hanggang sa Shrine of Nuestra Seniora De Guia sa Ermita.
Isinabay na rin ang penitential walk sa pagdiriwang ng ika-150th anniversary ng martyrdom ng mga paring Mariano Gomez, Jose Burgos at Jacintro Zamora (GomBurZa). —sa ulat ni Aya Yupangco (Patrol 5)
Binatikos ng World Health Organization (WHO) ang anito’y mababang testing rates ng mga bansa.
Kasunod ito nang pag amin ni WHO Technical Lead on COVID-19 Maria Van Kerkhove na nababahala sila sa mataas na bilang ng mga nasasawi bagamat mababa ang napapaulat na mga bagong kaso ng virus.
Dahil dito, iginiit ni Kerkhove ang patuloy na pagpapalakas ng vaccination roll-out gayundin ng testing sa gitna na rin nang pagtaas ng kaso ng Omicron variant partikular na sa Eastern Europe.
Nagkakasa na ng mga hakbangin ang Maynilad at Manila Water kaugnay sa patuloy na pagbaba ng antas ng tubig sa Angat Dam.
Ayon kay Jennifer Rufo, head ng Corporate Communications ng Maynilad, nakikipag-coordinate na sila sa National Water Resources Board at MWSS para tutukan ang posibleng epekto nang bumabagsak na water level ng Angat Dam.
Kinukumpleto na aniya nila ang mga itinatayong treatment facilities at inaayos na ang ilang poso para makakuha ng dagdag ng supply ng tubig bago ang tag-init.
Samantala, tiniyak naman ng Manila Water na naka standby na ang kanilang treatment facilities at mga poso sakaling magtuluy tuloy ang pagbaba ng antas ng tubig sa Angat Dam na nagsu supply ng halos 96% ng kailangang tubig sa Metro Manila.