Judith Estrada-Larino

Tinatayang 500K pang trabaho ang magre-resulta sa pagbaba sa Alert Level 1 ng Metro Manila at halos 40 lugar simula bukas, March 1.

Ayon kay Trade and Industry Secretary Ramon Lopez, asahan ng mga negosyo ang mas maluwag na mga panuntunan sa ilalim ng Alert Level 1 sa operating capacity, pag-aalis ng physical barriers sa mga establishment at optional na ang Work  From Home (WFH) arrangements.

Gayunman, tiniyak ni Lopez na dapat pa ring mahigpit na sundin ang health protocols kabilang ang pagsusuot ng face mask, regular disinfection, ventilation at vaccination.

Kasabay nito, ipinabatid ni Lopez na malapit nang maabot ng bansa ang 5% pre-pandemic employment rate.

Pinaghahanda na ng PAGASA ang mga Pilipino sa inaasahang mas mainit na panahon sa mga susunod na araw.

Ito ayon sa PAGASA ay kasunod na rin nang pagtatapos ng northeast monsoon o hanging amihan season na nagdadala ng malamig na panahon sa Luzon at iba pang bahagi ng bansa.

Ipinabatid ng PAGASA na nagsisimula nang maramdaman ang easterlies o mainit na hangin mula sa Pacific Ocean.

Gayunman, wala pang opisyal na deklarasyon ang PAGASA hinggil sa pagtatapos ng amihan season o pinakamalamig na panahon sa bansa na nagsisimula sa buwan on Oktubre o Nobyembre.

Pinaghahanda ng presidentiables ang gobyerno sa epekto ng bakbakan ng Ukraine at Russia, partikular ang presyuhan ng mga produktong petrolyo.

Kasunod na rin ito nang pagharap ng mga presidentiables sa debateng ikinasa ng CNN Philippines.

Ayon kay Senador Panfilo Lacson, ramdam na ngayon ang epekto ng tensyon pagdating sa presyo ng langis bagamat may probisyon sa 2022 General Appropriations Act na kapag tumama o lumampas sa 80 US dollars ang presyo ng kada bariles ng krudo ..kailangang maglabas ang gobyerno ng ayuda para sa mga apektado rito tulad ng mga tsuper at magsasaka.

Isinusulong naman ni Labor Leader Ka Leody De Guzman ang pagbuwag sa Oil Deregulation Law para makapanghimasok aniya ang gobyerno sa presyuhan ng langis at hindi makapagsamantala ang Oil Company sa krisis ngayon.

Bukod sa pagkakaruon ng Fuel Subsidy mula sa gobyerno, sinabi ni Robredo na dapat magkaruon ng Automatic suspension sa Excise Tax sa langis, bantayan ang sources ng kuryente, tutukan ang implementasyon ng VAT at ikunsidera ang iba pang maaaring mapagkunan ng supply ng kuryente.

Una nang ibinabala ng experts ang epekto sa presyuhan ng langis ng tensyon sa pagitan ng Russia at Ukraine matapos magpataw ng sanctions ang Western countries laban sa Moscow.

Tiwala ang mga Jeepney Transport Group na maaaprubahan ang hinihiling nilang limang pisong dagdag pasahe.

Kasunod na rin ito nang itinakdang pagdinig ng LTFRB sa fare hike petition ng FEJODAP bukas, March 1, sa gitna na rin ito ng serye nang pagtaas sa presyo ng oil products.

Binigyang diin ni FEJODAP president Ricardo Rebanio na halos wala nang nauuwing kita ang mga Tsuper at boundary na lamang ang naiipon ng mga ito dahil sa mataas na presyo ng oil products.

Nakahanda na ang go bags ng mga Pilipino sa KYIV sa Ukraine

Laman ng go bags ang mga importanteng dokumento at ilang personal na gamit para madaling bitbitin ng mga Pinoy sakaling tuluyang sumiklab ang giyera sa pagitan ng Ukraine at Russia.

Gayunman, ipinabatid ng ilang Pinoys sa Kyiv at Russia na kalmado pa sa ngayon ang sitwasyon maging ang mga locals sa kabisera.

Balik pasada na ang mga Public Utility Buses (PUB) sa mga inter regional ang ruta at mayruong tinatayang 80 kilometers na distansya o hindi tataas sa dalawang oras ang biyahe.

Ipinabatid ito ng LTFRB kapag ibinaba na sa alert level 1 ang Metro Manila sa March 1 basta’t mayruong mga kaukulang dokumento.

Kabilang dito ang valid at umiiral na Certificate of Public Convenience (CPC) kabilang ang mga mayruong expired na CPC subalit may inihaing application for extension of validity bago ang expiration nito bukod pa sa provisional authority at special permits.

Ayon pa sa LTFRB, ang mga turang inter regional sa metro manila kasama ang mga ruta ng provincial commuter na nagmumula sa Region 4A o Calabarzon na dating may Cubao Endpoint na inilipat na sa PITX ay papayagan nang bumalik sa orihinal nitong terminal sa araneta bus terminal.

Samantala, ang mga ruta namang nagmumula sa malayong bahagi ng South Luzon tulad ng Quezon, Region 4B o Mimaropa at Bicol ay kailangang may endpoint sa PITX kahit na ito ay may pre-COVID franchise na may endpoint sa Cubao.

Pinaalalahanan ng LTFRB ang PUB operators na mag secure ng QR code sa kada otorisadong unit bago ang operasyon at dapat na ipaskil ito sa harap ng windshield.

Tila nagbabayad na ng kanyang napakarami umanong atraso sa bansa si Dr. Naty Castro.

Ayon ito kay Undersecretary Lorraine Badoy, Spokesperson ng National Task Force To End Local Communist Armed Conflict (NTF ELCAC) matapos arestuhin ng mga otoridad si Castro dahil sa pagiging umano’y miyembro ng NPA Central Committee.

Sinabi ni Badoy na nauunawaan nila ang simpatiya ng mga kaanak ni Castro na aniya’y magaling magsinungaling at mapagbalatkayo kaya’t hindi batid ng pamilya nito ang aniya’y masamang gawain nito.

Pinasususpindi muna ni Election Lawyer Atty. Romulo Macalintal ang pagpapatupad ng mga regulasyon hinggil sa malalaking campaign posters na kinakabit sa mga private property.

Ito ang laman ng sulat ni Macalintal sa COMELEC kung saan ang kahilingang pansamantalang suspensyon hanggang March 25 o pagsisimula ng campaign period para sa local candidates para  mabigyan ng sapat na panahon ang COMELEC na marepaso ang mga regulasyon nito hinggil sa Oplan Baklas.

Kinuwestyon ni Macalintal ang pagbaklas ng illegal campaign posters sa mga pribadong lugar ng wala man lamang aniyang pasabi o pagdinig ..na malinaw na paglabag sa constitutional rights ng tao at due process.

Sinabi pa ni Macalintal na ang nilalaman ng Republic Act 9006 o Fair Election Act kaugnay sa election propaganda materials ay hindi applicable sa private persons o non candidates subalit sa mga kandidato at political parties lamang.

Binigyang diin ni Macalintal na may karapatan ang mga pribadong tao na ihayag ang kanilang idea o pananaw sa pamamagitan nang paglalagay ng campaign materials kahit pa galing sa mga kandidato sa kani-kanilang sariling pag-aari.