Judith Estrada-Larino

Nagpasya kapwa ang russia at ukraine na magbigay ng humanitarian corridors para sa mga sibilyang naiipit sa kaguluhan sa Ukraine.

Kinumpirma ito ni russian delegation head vladimir medinsky matapos tuldukan ang ikalawang yugto ng peacetalks sa pagitan ng Ukraine at Russia

Umikot aniya sa militar, international at humanitarian issuess at maging sa future political regulation ang naging pag uusap ng magkabilang panig.

Nagkasundo rin ang magkabilang grupo sa posibilidad na pansamantalang tigil putukan sa mga lugar kung saan nagkakaruon ng paglikas.

Wala pa namang itinakdang petsa ang ikinakasang ikatlong round ng peacetalks sa pagitan ng russia at Ukraine.  

Wala nang magiging boses ang mga marginalized sector kapag binuwag ang party list system.

Binigyang diin ito sa DWIZ ni UP Professor Danilo Arao, Convenor ng Grupong Kontra Daya sa kabila ng malaking pagkukulang sa implementasyon ng nasabing sistema.

Sinabi ni Arao na tiyak na mayayaman at mai-impluwensya lamang ang mauupo sa puwesto at limitado talaga ang magiging boses ng mga nasa tinaguriang laylayan ng lipunan.

Kasabay nito, kinuwestyon ni Arao ang COMELEC sa pagpapalusot ng mga aniya’y hindi karapat-dapat na party list groups bagamat inaasahan na niyang gagamiting argumento ng komisyon ang desisyon ng Korte Suprema nuong 2013 na hindi lamang pang marginalized sectors ang uubrang masakop ng party list system.

Mahigit 100 Pilipino pa ang nananatili sa Ukraine.

Ipinabatid ito ni DFA Undersecretary Sarah Lou Arriola na nagsabi ring nasa halos 200 Pinoy seafarers ang stranded sa Black Sea sa gitna na rin ng patuloy na pagsakop ng Russia sa Ukraine.

Ayon kay Arriola, 27 Pinoy kabilang ang 21 seamen ang nakausad na pa-Moldova at nakatawid na sa Bucharest sa Romania para makauwi na ng Pilipinas.

Nasa 15 Pinoy aniya ang nasa Hungary na, siyam sa Austria at apat sa Romania kaya’t nasa loob pa ng Ukraine ang 116 pang Pilipino.

Sinabi ni Arriola na 19 na Pinoy na ang nakauwi ng Pilipinas habang ilang Pinoy na may mga asawang Ukrainian nationals ay nasa nasabing bansa pa rin sa kabila ng krisis dito.

Nanatili sa 3% ang naitalang inflation sa nakalipas na buwan.

Ito ayon sa Philippine Statistics Authority (PSA) ay sa kabila ng krisis sa Ukraine kung saan tumaas sa 3% ang consumer price index na nasa target pa rin ng gobyerno.

Una nang inihayag ni BSP Govenor Benjamin Diokno na maaaring manatili sa target ang inflation basta’t hindi lamang tataas sa 95 dollars kada bariles ang presyo ng Dubai Crude.

Ang inflation rate ay bilis ng pagtaas ng presyo ng mga produkto at serbisyo.

Bigo si pinoy qualifier Alex Eala na makausad sa round 2 ng W25 Joue Le Tours sa France.

Ito ay matapos ipahiya ni Russian number 2 Seed Oksana Selekhmeteva si Eala sa kanilang bakbakan.

Ayon sa sports analysts, nag-improve o gumanda ang performance ni Selekhmeteva laban kay Eala sa 2-0 na kanya ring tinalo sa straight set sa third leg ng 2021 W15 Manacor.

Una nang nagsanib puwersa sina Eala at Selekhmeteva at nanalo sa 2021 Roland Garros Girls Double Title.

Mahigit isang taon matapos ang kanilang unang sagupaan sa International Tennis Federation Women’s World Tennis Tour, umakyat kapwa ang world rankings nina Eala na WTA World Number 580 at Selekhmeteva na WTA World Number 207.

100% nang ipatutupad ng MRT 3 ang passenger capacity nito simula bukas, March 1 kung kailan isasailalim sa alert level 1 ang Metro Manila at halos 40 pang lugar sa bansa.

Ito ay matapos ihayag ng Department of Transportation (DOTR) na mahigit 1000 pasahero ang kayang isakay ng kada train set o nasa halos 400 kada bagon.

Ayon sa DOTR, ang pagtataas ng kapasidad ng mga tren ay tugon nila sa pagtaas din ng demand sa pampublikong transportasyon sa pagbubukas ng mas maraming establishment sa Metro Manila.

Kaugnay nito, pinaalalahanan ng DOTR ang publiko sa pagpapatupad ng minmum public health standards kaya’t ipinagbabawal pa rin ang pag-uusap, pagkain, pag inom at pagsagot ng tawag sa telepono habang nasa loob ng tren.

Tatlong araw hanggang isang linggong pag-aaralan ng Metropolitan Manila Development Authority (MMDA) ang daloy ng trapiko sa Edsa at maging sa buong Metro Manila.

Ito ayon kay Traffic Czar Bong Nebrija ay bago pinal na maglatag at magsumite ng rekomendasyon sa Metro Manila Council (MMC) hinggil sa pagbalik ng number coding sa buong araw.

Kasunod na rin ito nang pagsailalim sa Metro Manila at halos 40 pang lugar sa alert level 1 simula bukas March 1.

Una nang inihayag ni Nebrija na bumibigat na ang daloy ng trapiko sa buong rehiyon at inaasahang mas dadami pa ang mga sasakyan sa pagsailalim sa alert level 1 ng NCR kayat posibleng ikasa na ang full implementation ng number coding.

Patay ang tatlong Chinese nationals na suspek sa pag kidnap sa kapwa nila Chinese.

Kasunod na rin ito ng engkuwentro ng kampo ng mga suspek at mga otoridad sa Paranaque City kung saan naman nailigtas ang dalawang biktima.

Ayon kay SPD Director Police Brigadier General Jimili Macaraeg, nakipag-barilan ang mga suspek sa mga pulis kayat nasawi ang mga ito dalawang linggo matapos dukutin ang mga kapwa Chinese.

Sinabi ni Macaraeg na posibleng sa isang malaking grupo nabibilang ang mga suspek dahil bukod sa mga armas, mayruon ding mga uniform ng sundalo at pulis at may plaka ang mga sasakyang ginagamit ng mga suspek sa kanilang modus.

Posible rin umanong tino-torture ng mga suspek ang mga biktima dahil nakakuha ng pala at baseball bat sa bahay na pinagtaguan sa mga dinukot.

Puspusan ang kampanya ng Bureau of Fire Protection (BFP) laban sa sunog sa tinaguriang Fire Prevention Month ngayong Marso.

Sinabi sa DWIZ ni BFP Spokeperson supt. Annalee atienza na dapat maging alerto ang publiko laban sa sunog lalo pa’t unti-unti nang nagbabalik sa normal ang sitwasyon kasunod nang pagsailalim sa NCR at iba pang lugar sa bansa sa alert level 1.

Ipinabatid ni Atienza na umiikot ang tema ng kampanya kontra sunog ngayon taon sa “Sa Pag Iwas Sa Sunog, Hindi Ka Nag-iisa.”

Higit na mapapalakas ang mga negosyo tulad ng mga tindahan at mga restaurant sa pagsailalim sa alert level 1 ng Metro Manila at iba pang lugar sa bansa.

Binigyang-diin ito ni Trade And Industry Secretary Ramon Lopez dahil maraming tao na ang lalabas at mag-o-opisina na kasama na yung mga sumailalim sa work from home arrangement nuong mga nakalipas na buwan.

Kasabay nito ipinabatid ni Lopez na mababawasan na rin ang requirements para sa intrazonal at interzonal travels tulad ng RT-PCR test at pnp clearance at malaking bagay pa rin aniya ang vaccination card.